¹ Balisesea malaha vole ivivela Nikodemasi Diuia ata kitae. ² Keu vavile Iesu vileo lolu atabeu baa ivai teteivale kolete alivelu bele isito Dilavaule avitu uge aule kee aii. ³ Iesu laviai avoe leleve leleve ula daa aa lavialu. Ata vadeu louale keale Otogoe tai. ⁴ Ige Nikodemasiu laviai avoe, atau bosiale keule oleve kateai, au aia uvue tai, tobatota u louai?. ⁵ Ige Iesu laviai avoe leleve leleve ula ata vadeu eta Munana tuvutale ue soliale keule baa Otogoe talivelu bele. ⁶ Olea abo aiale uale kea ataeala kea, isege oleu oleu Munana tuvule uale kea Munana tuvuvileala kea. ⁷ Momai huhu moeagalive. Isito daa aa lavialu u loua. ⁸ Hebulu loaleke aa iva solilu isi hebulu tiale ke iva solilu isito luluve ke ulale ale evi. Ke late, ale Munana tuvule uu loua. ⁹ Ige Nikodemasiu belai avoe keu oleve katealela keu. ¹⁰ Ige Iesu laviai avolu loui avoe au, au Iselalaea tisa alu?, isito hau kole lulele solilu? ¹¹ Leleve leleve ula, da loui aa lavialu, lo nona louvale keu loo vadeu ivala ai loo kee louva. Isi lo vadeu eviale kela lo ke belalava, isi loo ivale kela loo kelouva igeto au loi nonake evie solilu. ¹² Daa vatau aveve ko louge aa evie solige daa baa oleve kateai Otogo nanate aa haivui?. Keule aele malomaloai. ¹³ Atabe igaliu Otogoe tiesolilu, isito atau ese igaliu Otogole dobai lolu. ¹⁴ Mouseseu ute vai botoe letatavale ke late, atau ese abo vai letatavai. ¹⁵ Ige oleu ivai vai leleve tiale keale ukolikoli maulike vai. ¹⁶ Dilavau vatau atako nenila olalauai, au voo igali vai hanavalu, ige oleu au uvu vai vavui vai lelevetiale keule ukolikoli mauli kee vai auba voele alivelu bele. ¹⁷ Dilavau au voo vai hanavage, vata ko vai kotalivelu loiesolilu, isito ataea abo toela kalevai avoe loevelive ukolikoli mauli agisi. ¹⁸ Ata vadeu Iesu vai lelevetiale keu baa toelalivelu bele isegeto oleu kotove evie soliale keu amiga vai toelatige vesulu. Koseale ea abo uvu vai Dilavau voo Iesu vavue solilu. ¹⁹ Katealeluga kotaule ba loi abolai atagau vatae abolai lolu, igeto ea vaviu gusu kelu olalabo ai Otogou ataga homasiavalu. Kosealelu, huhuiabeu vatale ui toelalau. ²⁰ Ataea toela ai, atagaule toelaeabe vai atagatige ataeau toelaeabe ke ivai ataga kele. ²¹ Katealelu atavadeu atagae loale keule atau avoele kaluge abole atagave ke ivai loui koseai keu Dilava legau keu lolu. ²² Ke iae Iesu au Disaiboloeali Diudea vatavae tievelu tai keveo ui atake haivei Babatisoeaveva. ²³ Isege Dioniu avota ata babatisoeaveva Aeloni Salimue ee moeagaea keveo ualelu louive, ata moeagaea avoe loige. ²⁴ Dioni abo vai dibulae vaeava solisege. ²⁵ Isege nona voleu kele kobelalu, Dioniu Disaiboloea isi Diuia ata kele Babatiso isi ada totoavale kelabo ke belalai volelai louva. ²⁶ Isi vole lohomegei agisi Dioni vileo loevelu, loi laviai avoe Tisa, ata vole luta Diodana ee vaki vole ati lavisi usege aa louvale ata keu valae koveo ata Babatisoeaveva, ige ata moeagaea avoe tieviva. ²⁷ Ige Dioniu lavigei avoe ata voleuba haua kavalivelu bele, isito abole Otogoe vavuale ke ulaeala ke ava. ²⁸ Ige lale daele loui isito daba Keliso bele, ito abo daa vai unie hanavalu ige daa avolu unila lolu. ²⁹ Vo voleu vaa vole meialelivelu age kakoloveule au kakolou nona evisi avolu sisila kitae ai, kelu dii sisilakeu kitae. ³⁰ Eule loi kitaeasege daule ibilalu dobai loi valaveo ui. ³¹ Ata vadeu eue loale keule eue ui, isege ata vadeu vatae loale keule vatale ui. Vatau nonate loui isege eue Otogoe loale keule Otogou nonate loui. ³² Keu loi, loui daialu au vadeu ivaleke neni, igeto ataeau kotove ke evie solilu. Au vadeueveisi ivale ke loi loui ata haivelu, igeto atabe igaliu nona ke evie solilu. ³³ Ata vadeu kotove ke eviale keu vai lelevetilu, Dilava keu leleve. ³⁴ Ata vadeu Dilavau hanavale ke Dilavau nonalau ke louva. Dilavau au munana tuvu vavege igali galiai uvuiabele uale, kelega ea kele hauiva. ³⁵ Mamau au voolu isivi kitaealelu loui au hauke neni agisi adavele otovelu. ³⁶ Kele ata vadeu vove kevai lelevetiale keule ukolikoli mauli egete kevai isege olea kotove evie soliale keale mauli egete ke valivelu bele, isege mamaveu tuvu kitaeu avoele dobai.