¹ Kumanima ma posa, mu suka suka mu lutshiku lwa thethi lwa poosa, Madiya Magadala, ni Madiya mwekha endidi ku majiamu. ² Mu mbala yimoshi, mavu mayanjika kunikana kiangolu, wanjio mumoshi wa fumu wa katuka ku hulu, weza kukatula yala washikama a hulu diodi. ³ Mwila wenji woshu wakhedi kukedia, miledi yenji yakhedi mudi matuta ma mvula. ⁴ Asuta akhedi kukengidila majiamu evidi woma ayanjika kutekita. ⁵ Wanjio wakula kudi akhetu wa waleza esti, "Nu khala oku ni woma, kikuma ami niejika etsi nwenda nwahenga Yesu, oyu washidi akulunji. ⁶ Mweni keshiku epi henaha, kashi wa tokimini, mudi kioki kia nulejidi. Yizenu nutadi homa akhedi mwila wa fumu. ⁷ Ndangenu swalu nu leji alonguki jienji, 'Wa tokimini mu lufwa. Mweni wathetikila kwenda ku Ngadidi. Waya ku nu makinina kwenokuna. 'Ndaka yoyi ami niezanga ku nuleza." ⁸ Akhetu akatukidi tswalu ku majiamu, ni woma woshu, kashi mitshima miowu mia zadidi ni kieshi, endidi fishi, aya kuleza alonguki jienji. ⁹ Mu mbala yimoshi, Yesu wa makinini ku mesu mowu, wakula, "Mboti yenu." Akhetu ejidi penapena, amu kwata mu miendu, afukama, ni ku muhwa lukumu. ¹⁰ He Yesu wa waleza etsi, "Nwivoku woma. Ndenu nuleji apangi jienu ahiti ku Ngadidi. Eni aku ngu mona kwenokuna." ¹¹ Tangwa diakhedi kwenda akhetu, mu mbala yimoshi, asuta akhedi kukengidila majiamu avutukidi kwimbu, aya kuleza afumu jia anganga Nzambi mambu moshu pila yimahitidi. ¹² Anganga Nzambi ni amambuta ekha awongimini mu kutala mambu menamana, evwangana, anona fwalanga jingi ahwa asuta, ¹³ awaleza etsi, "Akulenu eki: 'Yesu' alonguki jienji ejidi mu pipa akaba mwila wenji ki nwakhedi nwalangala.' ¹⁴ Yivwa mambu menama matula kudi Gouvernere, etu tukumu shipisa mutshima twa mu tendudila namu pimbu, enu tukunu katula mu pashi. ¹⁵ Asuta anonini fwalanga, ahanga kioki kia walezidi. Mambu menamana ma mwangana kudi Ayuda tii lelu mwenedi. ¹⁶ Kashi alonguki kumi ni mumoshi endidi ku Ngadidi, ku mundonda owuna wa walejidi . ¹⁷ Tangwa dia mu mweni, eni amu shikishidi, kashi ekha akhedi ni pika. ¹⁸ Yesu wejidi penapena ni eni wa waleza etsi, "Kiyeka kioshu kia ku hulu ni kia ashi anguwa naki." ¹⁹ Ndangenu, kudi athu osu mu kifutshi kioshu, nu wekhinishi alonguki jiemi. Wa botikenu mu jina dia Tata ni Mwana, ni Pevi ya Longu. ²⁰ Wa longenu mu kulemvuka mu tsiku jioshu ji nia nuwhedi. Ejikenu etsi, Ami nidi nienu tangwa dioshu, tii ku tsuka ya thothu.