¹ Mu tangwa mwenedina tshiku yimoshi ya wudikidi kudi Cesar Oguste mu kutanga athu oshu mu kifutshi. ² Kutanga mwenoku kwakhedi kwa thethi. Kwa hangimini mu tangwa diakhedi Kirinisi twadishi wa Siri. ³ Athu oshu akhedi kusonikisa majima mowu koshu muthu kwimbu dienji. ⁴ Yosefi epi wa katukidi ku Nazareti, mu thothu ya Ngadidi. Wendidi ku Zude, ku vidi dia Davidi, dienda ku tambika Betelehemi. Kikuma mweni wakhedi mu kikanda kia Davidi. ⁵ Mweni epi wendidi kudisonikisa ni Madiya, oyuna wakhedi kuzola kukwela, wakhedi ku mila miadi. ⁶ Tangwa diakhedi kwenokuna, misongu ya kubuta ya mukwata. ⁷ Watetidi mwana wa yala, wathethi. Wa mu winda miledi. Wa mu langika mu keshi dienda kudila ambiji, kikuma homa ha kulangala hakhediku mu nzu ya anzenza. ⁸ Kwakhedi, mu kizunga mwenekina ni angungudi akhedi kulangala mutemu mu kukeba mamemi mowu. ⁹ Ebukididi wanjio mumoshi wa Fumu weza kuwa wudikila, khembu ya Nzambi ya wa ngalumukina, ekhina woma woma. ¹⁰ Wanjio wa waleza etshi: "Nu khala oku ni woma; kikuma ami nia nu nehina tsangu yimoshi ya waha, yi kuhana kieshi kingi kudi yikanda yoshu. ¹¹ Lelu, anu butila, ku vidi dia Davidi, Mvulushi mumoshi, wudi khidishitu, wudi epi Fumu. ¹² Talenu kidimbu ki nwa ka mwijikila, enu nwa kamona mwana wa kuhwinda miledi wa langala mu keshi dienda kudila ambiji." ¹³ Mu mbala yimoshi awanjio ekha akatukidi ku hulu ezidi kubundangana ni awana a thethi, ayanjika kuwa Nzambi ni kwakula etshi: ¹⁴ "Lukumu kudi Nzambi ku hulu, ngemba henaha hashi henda kujingila athu a wenda kukumbula." ¹⁵ Kiela awanjio awashisha, avutuka ku hulu, angungudi, ayanjikidi ku diakudila owu mweni etshi: "Twendenu tii ku Betehemi, mu kutala mambu mabwa, ma tulejidi Fumu. ¹⁶ Eni endidi tswalu amona Madiya, Yosefi ni Mwana, wakhedi wa langala mu keshi dienda kushia madia ma ambiji. ¹⁷ Kiela amona kienekina, eni aleza athu mambu ma walejidi matadila mwana mweno oyuna. ¹⁸ Athu oshu akhedi ku wevwa ayitukidi, mu kwivwa mambu ma walejidi angungudi. ¹⁹ Madiya wakhedi wadibata, ni kubanza ku mutshima wenji mambu mevidi. ²⁰ Kumanima angungudi avutukidi, ni kwenda ni kuhwa Nzambi lukumu mu mambu moshu mahangidi, amana mevidi ni mamweni, kikuma moshu mahitidi kioki kia walejidi wanjio. ²¹ Tangwa dia lungishidi matshiku nana, amwingishidi mukhanda, amuhwedi jina Yesu, jina dia walejidi wanjio kiakhedi mama owu kwimita kadi lo. ²² Tangwa dia lungidi matshiku ma kwenda kudikatula mvindu malunga, mudi kiakhedi kwakula tshiku ya Moise, Yosefi ni Madiya a mu sendidi ku Yeluselemi mu ku muhana kudi Fumu, ²³ kioki kia sonikiniki mu tshiku ya Fumu etshi: "Mwana wa yala mwoshu, wathethi wudi wa Fumu." ²⁴ Eni ahanini makabu ma kimenga kioki kienda kwakula tshiku ya Fumu etshi: "apijio mbadi mukaji ni mulumi." ²⁵ Muthu mumoshi wakhedi kujingila ku Yeluselemi jina dienji Simeon. Wakhedi muthu wa bathu kumesu ma Nzambi. Wakhedi kumakinina lutshiku Nzambi aka katula Khenda jia Yisaledi, Pevi ya Longu yakhedi ni mweni. ²⁶ Pevi ya longu ya mulejidi etshi, ka kafwa oku kadi tii koku kwa kamona Khidishitu watuma Fumu. ²⁷ Pevi ya Longu ya sendidi Simeon mu nzu ya Nzambi. Kiela Yibuti asenda mwana owu Yesu mu kulungisa mambu menda kwakula tshiku, ²⁸ wa munonini ha mokhu menji, wahana matondu kudi Nzambi, wakula mwene etshi: ²⁹ "Tangwedi he, Fumu, leka ami musadi weyi nifu ni kieshi, kioki ki medi mu bibila. ³⁰ Kikuma mesu memi ma mona njila yeyi ya kuhulukila, ³¹ eyi yi wahangikila athu oshu. ³² Wadi mwekinisa kudi athu akonda kukwijika, wahana lukumu kudi kikanda kieyi kia Yisaledi." ³³ Tata enji ni mama enji akhedi kuyituka mu mambu makhedi kwakula kikuma kia mwana. ³⁴ Simeon wa wa sakumunini, waleza Madiya mama enji etshi: "Mwana oyu, wa sodiwa mu kubwisa ni kuzangulusa athu lawu edi mu kikanda kia Yiseledi, wudi mudi kidimbu kia kaneha kuselangana, ³⁵ kudi ayi mweni wudi poku ya mwela ya ka tobula mitshimia mu kumwekinisa ngindu jia athu lawu mupenza. ³⁶ Kwakhedi epi ni mbikudi mumoshi wa mukhetu jina dienji Ana, mwana wa Fanwedi mu kikanda kia Aser. Wakhedi wa nuna. Wajingidi ni mulumi enji mvula tsambwadi kumanima ma lufwa lwa mulumi enji, wakhedi enjimweni. ³⁷ Wakhedi mufidi ji mvula makumi nana ni jiwana. Tangwa dioshu wakhedi kujingila mu nzu ya Nzambi ni kusambila, pipa mwania ni kulangala nzala. ³⁸ Kaka mu tangwa mwenedina mweni wejidi ni kuhwa Nzambi matondu, ni kwakula mambu ma Yesu kudi athu oshu. Wakhedi kumakinina etshi Nzambi a katudi Yeluselemi mu kihika. ³⁹ Kiedidi eni amanisa mu kuhanga mambu moshu makhedi kwakula tshiku ya Nzambi, avutukidi ku Nazaleti mu thothu ya Ngadidi. ⁴⁰ Mwana wakhedi kukula, ni kwikhina ngolu, wazadidi ni mayela. Lusakumunu lwa Nzambi lwakhedi ni mweni. ⁴¹ Tatenji ni mamenji akhedi kwenda koshu mvula ku Yeluselemi ku khinji ya Paki. ⁴² Kiedidi wa lungisa mvula kumi ni jiadi, endidi ku khinji mudi kiakhedi kifu kiowu. ⁴³ Tangwa diela khinji yahwa, avutukidi kwimbu diowu. Yesu mwana owu wasadidi ku Yeluselemi, kashi tatenji ni mamenji kejikidiku. ⁴⁴ Eni abanjidi esthi wakhedi ni apangi jiowu ekha akhedi kuvutuka nawu. Ahangidi kilumbu kia mvimba mu njila, he ayanjika ku muhenga kudi a pangi jiowu ni kudi a nduku. ⁴⁵ Kiela kumumona lo, eni avutukidi ku Yeluselemi mu ku muhenga. ⁴⁶ Kumanima ma matshiku masatu, a mumweni mu nzu ya Nzambi wa shikama akatshi ka a malongi ma Ayuda. Wakhedi ku wevwa, ni kuwehula mihu. ⁴⁷ Athu akhedi ku mulaba, akhedi kuyituka kikuma kia mayela menji ni pila yakhedi kuwa vutudila mvutu jienji. ⁴⁸ Kiela eni amumona, ayitukidi. Mama enji wa muleza etshi: "Mwama emi kikuma kiakhi watuhangila kienekina? Tala, tata enu ni ami twenda twakuhenga ni woma wingi." ⁴⁹ Mweni etshi: "Kikuma kiaki enu nudi ku ngu henganga ? Enu nwejikidiku etshi ni feti kukhala munzu ya tata yamemi?" ⁵⁰ Kashi eni kabakishidiku mambu makudidi mweni. ⁵¹ He mweni wendidi nawu njila yimoshi ku Nazaleti, wakhedi kuwa lemvukila. Mama enji wakhedi kusweka mambu menamana moshu ku mutshima wenji. ⁵² Kashi Yesu wakhedi kwikhina mayela mengi, ni kukula kwingi, ni kuhwa Nzambi kieshi ni athu.