¹ Athu lawu adishidi mu kisalu kia kusonika mu ndonga mambu mahitidi mu katshi ketu pila kaka yevidi kudi, ² amalongi a tsangu ya mboti mu luyadjiku akhedi a themu ejidi kwikhina asadi a ndaka. ³ Henihohu ami mweni nia mweni etshi, ninoni tsangu jia bathu ku kushina mu ku kusonikina mambu medi mu ndonga, kudi ayi muthu wa bathu Thiofidi. ⁴ Nia zola wijiki masonga ma malongi ma wa nonini. ⁵ Mu tangwa diakhedi Herode fumu wa Zude, Kwakhedi ni Nganga Nzambi mu moshi jina dienji Zakadiya, wakhedi mu ndonga ya Anganga Nzambi a ku Abia. Mukhetu wenji wakhedi mujikulu wa Aloni, jina dienji Luzebeti. ⁶ Owu mbadi akhedi alunga kumesu ma Nzambi, akhedi kulemvuka mu tshiku jioshu ni yituma ya Nzambi. ⁷ Kashi kakhediku ni mwana kikuma Luzebeti wakhedi mukobu, owu mbadi akhedi anuna mu tangwa mwenedina. ⁸ Lutshiku lumoshi Zakadiya wakhedi kuhanga kisalu kia kinganga Nzambi, kumesu ma Nzambi yakhedi tangwa dia kipi kiowu mu kuhanga. ⁹ Mu pila ya mesana mu kusola khia Nganga Nzambi wu kutwadisa, eni ombidi bwadi mu kusola oyu wu kwingila mu nzu ya Fumu mu koshia mupafu. ¹⁰ Kipi kioshu kia athu akhedi hanji ni kusambila Nzambi mu tangwa dia makabu ma mupafu. ¹¹ Wanjio wa Fumu wejidi ku mu wudikila, wa makana ku koku dia kitata dia mesa menda kwoshila Nzambi mupafu. ¹² Kia mweni wanjio, Zakadiya wekhinini kisakasaka ni kutekitanga. ¹³ Kashi wanjio wa mulejidi etshi: "Wivoku woma, Zakadiya, kikuma yisambu yeyi Nzambi wa hivwa. Mukhetu weyi Luzebeti wa kabuta mwana wa yala. Waka muhwa jina Yowani. ¹⁴ Wa kakhala kudi ayi mutwa wa kieshi ni kieshi, athu lawu aka sepila kikuma kia kutetuka kwenji. ¹⁵ Kikuma wa kakhala muthu mujima kumesu ma Fumu. Ka kanwa oku ata maluvu, ata kalapa lo. Wa kazala ni pevi ya Longu katuka mu vumu dia mama enji. ¹⁶ Akwa Yisaledi engi a ka vutuka kudi fumu wudi Nzambi wowu. ¹⁷ Wa kenda kumesu ma Nzambi ni Pevi ni ngolu jiakhedi ni Eliya, mu kuvutula mitshima mia tata kudi ana jiowu ni kusadisa akwa mutwa ngolu anoni mayela ma athu a pimbu, kikuma kia ku hangikila Fumu kikanda kienji." ¹⁸ Zakadiya wa lejidi wanjio etshi, "Kiehi nia ka mejiya? Kikuma nia nuna, mukaji epi mvula jia pusana." ¹⁹ Wanjio wa mu vutudidi etshi, "Ami nidi Gabriel, nienda ku makana kumesu ma Nzambi. Athumini nizi ku kuleza tshangu mweneji jia waha. ²⁰ Wu kwikina kamama, waka lunga kwakula kaka, lutshiku lwa kahangama mambu menama. Kikuma ayi wa kwikididiku mu ji ndaka jiemi jia kahangama mu tangwa dioji." ²¹ Athu a makininanga Zakadiya, ni kuyituka kikuma wa jingidi hengi mu nzu ya Nzambi. ²² Kiela wa wudika, ka kukidiku ku wakusa; eni abakishidi etshi, wa mweni mbona mesu mu nzu ya Nzambi. Wakhedi kuwa hangila kaka yi dimbu, kwakulanga lo. ²³ Tangwa dienji dia kisalu ki diahwidi, wa vutukidi kunzu yenji. ²⁴ Kumanima ma matangwa, mukhetu enji wemita. A ngonda a tanu wakhedi wa swama mu nzu, ni kwakula mweni esthi: ²⁵ "Tala mambu mapimbu ma ngu hangila Fumu. Womba mesu kudi ami ni khenda jienji mu katula soni jiemi kumesu ma athu." ²⁶ Vumu dienji ki dia lungishidi a ngondi a sambenu, wanjio Gabriel a mu tumini kudi Nzambi ku vidi dimoshi dia Ngadidi jina diodi Nazaleti, ²⁷ kudi mwana mukhetu mumoshi wakonda kwijika kadi yala, wakhedi ni kilaji kia wala kia yala mumoshi jina dienji Yosefi, mukwa kikanda kia Davidi. Jina dia mwana mukhetu Madiya. ²⁸ Wejidi kudi mweni, wa mu leza etshi: " Mboti yeyi, ayi Nzambi wa kwivila khenda jingi! Fumu wudi ni ayi." ²⁹ Kievidi kienekina wa diyangishidi hengi, ni ku dihula kikuma kia mboti mwene yina. ³⁰ Wanjio wa mu lejidi etshi, "Wivwa oku woma, Madiya, kikuma ayi wudi Muthu wa fhunu yingi kumesu ma Nzambi. ³¹ Tala,. wa kemita vumu dia mwana wa yala, wa ka muhwa jina Yesu. ³² Mweni wa kakhala muthu mujima, aka bula ku mutambika mwana Nzambi. Fumu Nzambi wa ka muhwa kifumu kia khakha enji Davidi. ³³ Mweni wa kayala kimakulu kikanda kia Yisaledi, Luyalu lwenji lwa ka suka oku. ³⁴ Madiya wa leza Wanjio etshi: "Kiehi makakhala, kikuma ami nijiku kadi yala?" ³⁵ Wanjio wa mu vutudila etshi, "Pevi ya Longu yakheza kudi ayi, ngolu jia Nzambi jia ka kusweka. Kienikioki mwana wa katetuka kudi ayi, wa kakhala wa vedila, aka bula ku mutambika mwana wa Nzambi. ³⁶ Pangi eyi Luzebeti wemitini ni mweni vumu mu kinunu kienji. Wa lungisa kadi a ngonda a sambanu, akhedi kwakula etshi wudi mukobu. ³⁷ Kikuma Kushiku ni mambu ma lunga kukhala tototu kudi mu Nzambi." ³⁸ Madiya etshi: "Ami nidi musadi wa Fumu. Leka moshu mahangami kudi ami mudi ki wakula." He wanjio wa mushisa. ³⁹ Kaka mu tangwa mwenedina, Madiya wendidi tswalu ku vidi dimoshi mu mindonda ya thothu ya Zude. ⁴⁰ Wengididi munzia Zakadiya wahwa Luzebeti mboti. ⁴¹ Kiela Luzebeti wanona mboti ya Madiya mwana mu vumu wa nikinina. Luzebeti wazadidi ni Pevi ya Longu. ⁴² Wakudidi mu ndaka ya ngolu etshi: "Ayi wudi ni lusakumunu mu katshi ka akhetu oshu, leka lusakumunu lukhadi kudi mbuma yi wudi nayi mu vumu. ⁴³ Ami nani kikuma mama ya Fumu wemi eji ku ngu thala. ⁴⁴ Kikuma ki niela nievwa mboti yenji, mwana mu vumu diemi wa nikana ni kieshi. ⁴⁵ Kieshi kudi mukhetu oyu wa kwikididi kikuma mambu ma mu lejidi kudi Fumu ma ka hangama. ⁴⁶ He Madiya wakula etshi: "Nienda nia hana lukumu kudi Nzambi mu mutshima wemi woshu. ⁴⁷ Nidi ni kieshi kikuma Nzambi wudi muhulushi wemi. ⁴⁸ Kikuma mweni wa ngushia ami musadi wenji, ami nia konda fhunu. Athu oshu a ka bula kuthambika kimona mbote. ⁴⁹ Kikuma Nzambi wa ngolu jioshu, ma pangila ami mambu majima, jina dienji wa longu. ⁵⁰ Khenda jienji jidi kudi athu a makanda moshu enda ku mu jitisa. ⁵¹ Mweni wahangidi mambu ma kuyituka mu ngolu jienji, mweni epi wa mwanga athu edi azala ni lulendu mu mitshima miowu. ⁵² Wa katula a fumu ajima mu luyalu luowu, wa zangula awana a konda lukumu. ⁵³ Mweni wenda kudisa athu edi ni nzala ni yima yingi, kashi a mvwama, wenda ku wa tusula mokhu. ⁵⁴ Mweni wa sadishidi asadi jenji ana a Yiseledi, mu ku wa leza khenda jienji. ⁵⁵ mudi kioki kiakudidi kudi a khakha jietu Abalahami ni ana jienji kiamakula. ⁵⁶ Madiya wa jingidi ni Luzebeti kitezu kia a ngonda asatu tii kokhu kwa vutukidi kunzienji. ⁵⁷ Tangwa dia Luzebeti dia kubuta ki dia lungidi, wabutidi mwana wa yala. ⁵⁸ Athu akhedi kujinga pena pena ni mweni ni kikanda kienji, kievidi pila ya hangidi Fumu mambu mahitangana kuhwaha kudi mweni, akhedi ni kieshi kingi. ⁵⁹ Mu lutshiku lwa nana endidi kwingisa mwana mukhanda, azodidi ku muhwa jina dia tata enji Zakadiya. ⁶⁰ Kashi mama enji wakudidi etshi: "Loni a ka bula ku mutambika Yowani." ⁶¹ Eni akula etshi: " Nani wudi ni jina mwene dina mu kikanda kienu?" ⁶² Eni akhedi kuhanga yidimbu kudi tata enji mu kwijika khia jina a kubula ku mu tambikila. ⁶³ Mweni wa lombidi dibaya, wa sonika eki, "Jina dienji Yowani." Eni oshu ayitukidi. ⁶⁴ Mu mbala yimoshi wa yanjikidi kwakula epi ni kuhwa Nzambi Lukumu. ⁶⁵ Athu akhedi kujinga ni eni homa ha moshi, evidi woma. Thothu yoshu ya Zude yakhedi kwakudila kaka mambu menamana. ⁶⁶ Athu oshu evidi mambu menamana, a maswekidi mu mitshima miowu, ni kudihula etshi, "Mwana mweno oyu wa ka khala nani?" Kikuma ngolu jia Nzambi jia khedi ni mweni. ⁶⁷ Tata enji Zakadiya wazadidi ni Pevi ya Longu wa yanjika kubikula etshi: ⁶⁸ "Lukumu kudi Fumu Nzambi wa Yiseledi, kikuma weza kujinga ni athu jienji mu ku wa hulusa. ⁶⁹ Wa tu hudishila kibongu kia ku hulukila mu kikanda kia Davidi musadi wenji. ⁷⁰ Kioki kiakudidi mu kanu dia mbikudi jienji a longu a tangwa dikulu. ⁷¹ Kuhuluka ku mokhu ma ambeni ni ku mokhu ma athu henda ku tumenga. ⁷² Mweni wevididi a khakha jietu khenda, wa bambuka epi pila yevwanganini nteti enji mweni, ⁷³ ni pila ya zengididi ndefi kudi khakha Abalahami etshi: "Mweni waka tuhwa, ⁷⁴ kia katukatula ku mokhu ma ambeni, etu tuleki kukhala ni woma wa ku mu hangila mu moyi wetu. ⁷⁵ Tukhadi athu a bathu edi ni kinunga ku mesu menji mu lujingu lwetu lwosu. ⁷⁶ Ayi mwana emi, aka bula ku kutambika Mbikudi wa Fumu Nzambi. kikuma, wa kathetila a mesu ma Fumu, mu ku hangika kwiza kwenji, ⁷⁷ ni mu ku tendudila athu jienji njila ya ku hulukila ku manima ma kulomba ndolula ya kubola. ⁷⁸ Nzambi wetu wa ka tulolula kikuma wudi ni kenda jingi ni luzolu. Wa wudisa Mwania mudi tangwa katuka ku hulu. ⁷⁹ Dienda kukienzula kudi athu awa edi mu pipa ya lufwa, ni kutusadisa mu kulaba njila ya kiedika. ⁸⁰ Mwana wakhedi kukula ni kwikhina ngolu mu ki Pevi. Wa jingilanga mu thothu ya zelu ni zelu tii mu lutshiku lwejidi kuwudika ku mesu ma ana Yiseledi.