¹ Kieni kioki Khidishitu wa mweni pashi mu mwila wenji hangamenu mutshindu wumoshi kikuma kumakiosu mtuhu wa mona pashi mu mwila wenji wa manisa ni masumu. ² Muthu wa mutshindu owu kendoku ka jinga mu yizola zola ya athu kashi mu luzolu lwa Nzambi mu lunjingu lwenji lwosu. ³ Kikuma tangwa dingi twa hitisa kuhanga luzolu lwa apani. Muku kibanga wakhedi kujinga lujingu lumoshi lwa bola wakhedi ni mabanza mabola wakhedi kuzola maluvu nwakhedi mu mafeti menda kunwa maluvu ni kuhanga mambu lawu mabola enu epi nwakhedi kusamba isambu ya bola ya kusamba Nzambi ya iteki. ⁴ Enda a yituka mu kumona etshi nwendoku epi nwaya kudi eni ni isalu yowu ya bola enda akula kubola kwenu. ⁵ Aka wehula kudi muthu owu wa kasambisa athu a moyi ni awa afwa. ⁶ Mu kikuma kiene kina tsangu ajilongidi epi kudi a mvumbi. ata awa sambishi mu kimuthu mudi athu enda jinga mudi Nzambi mu kipevi. ⁷ Tshuka ya mambu mosu ya lunga kieni kioki khalenu longi mu kipevi nu langaloku mu mabanza kikuma kia isambu. ⁸ Kumanima ma mambu mosu khalenu enu mweni ni zola dia lawu kikuma zola dienda kuwinda masumu ma lawu. ⁹ Khalenu ni zola yambanganenu enu mweni enu mweni kukonda kubokuta. ¹⁰ Muthu mwosu wudi ni dikabu dimoshi edi nadi dihangilenu sambu dia athu ekha hangenu kiene kina mudi athu awa enda kusweka makabu ma mutshindu ni mutshindu nwa nona ma pamba kudi Nzambi. ¹¹ Kidi muthu wakula mudi ukulonganga jitshiku jia Nzambi kudi muthu wayi hangila leka ayihangi ni ngolu jiku muhusanga Nzambi. Hangenu mambu mu pila athi Nzambi anoni Lukumu mu jina dia Yesu. kudi Yesu Khidishitu kumu ni ngolu jia mvula ni mvula. amen. ¹² Apangi aluzolu nu monoku mudi kima kia kuyituka kumekama kwa thuya kuku twijilanga mudi etshi kima kimoshi kialunga kiku nwijilanga. ¹³ Ata jia lawu jia Khidishitu kunwijila khalenu ni kieshi sambu ni enu epi nu khadi ni kieshi tangwa lukumu lwenji lwaka mwekhana. ¹⁴ Kidi etshi enda a nu tukana kikuma kia jina dia Khidishitu nu khadi ni lusakumunu sambu pevi ya khembu ni pevi ya Nzambi idi ha wulu dienu. ¹⁵ Muthu kamonoku pashi mudi muthu wenda ku jiya athu mudi muthu mwiji mudi muthu wa bola kiva loni muthu wa konda kuswekanga mambu. ¹⁶ Kidi etshi muthu wenda mona pashi mudi mukhidishitu ka khaloku ni soni a hani matondu kudi Nzambi kikuma kia jina dienji. ¹⁷ Sambu tangwa dia fundusu ya yanjika mu yinzu ya Nzambi. Kidi ya yanjika munzu a Nzambi kieyi ya kakhala kudi awa akonda loni kulemvukila tsangu ja Nzambi. ¹⁸ Kidi etshi athu a pimbu aka huluka mu pashi ya kakhala kudi athu a bola ni athu a masumu. ¹⁹ Kieni kioki athu a kamwanga pashi mu luzolu lwa Nzambi a hani mioyi yowu kudi Nzambi wa hanga ima yosu oku ni kuhanga mambu ma mboti.