¹ Pila yeneyi enu nudi akhetu dihanenu kudi alumi jenu. hangenu kiene kina kikuma ata atweka kazodidiku kulemvuka mundaka mu yifu ya kaji jiowu akumbudi kukonda ndaka. ² Kikuma amoni yifu yowu ya masonga ni ya lujitu. ³ Leka ikhadi ya kuhanga konda kumwekana hanji. kutunga kwa tshuki ilunga ya wola ni miledi ya ilumbu eyi. ⁴ Kashi ikhadi ya muthu wa mukatshi ka mutshima. ni kuwaha kwa tangwa dia lawu ni mabanza malembama ma shipidi yeni yoyi yidi mboti kumesu ma Nzambi. ⁵ Kikuma akhetu a pimbu atangwa dia thama akhedi kumwekana kiene kina. akhedi ni kivuvu kudi Nzambi akhedi ni ulemvu kudi a lumi jiowu. ⁶ Kieni kioki Sala wakhedi ni ulemvu kudi Abalahami wakhedi kumutambila fumu enji.Kikimweni mudi ana jienji kidi wahanga mambu medi pimbu kidi etshi nwendoku nwevwa woma wa pashi. ⁷ Pila imoshi enu amala walunga kujinga mu kwvangana ni akhaji jienu mudi mabungu makonda ngolu nu feti ku wahwa lukumu mudi esthi owu washila yima dia kabu dia lujingu. hangenu ekina kikuma isambu yenu aleki ku kwivwa. ⁸ Kieni kioki enu osu khalenu mabanza mamoshi khalenu athu amboti khalenu ni zola dia athu ekha khalenu mudi ana atata mu moshi ni kudikulumusa. ⁹ Nu vutuloku mambu ma bola ni mabola to matuka ni matuka idi mboti nu sakumuningi kieni kioki Nzambi anu tambikididi kikuma nu khadi awa akanona lusakumunu. ¹⁰ Owuna ukuzola moyi ni kumona mamboti afeti kuleka kwakula mambu mabola afeti kuleka makusu. ¹¹ Akatuki mu njila jia bola a hangi mambu ma pimbu. Ahengi ngemba a ilabi. ¹² Mesu wa fumu menda ma mona athu amboti matu menji menda mevwa isambu Nzambi kendoku kuzola athu awa enda kuhanga kubola. ¹³ Nani yowu waka nu hanga kubola kidi enu nwenda hanga mambu ma mboti. ¹⁴ Kidi nwenda mona pashi kikuma kia mambu ma mboti nudi ni lusakumunu. Nwivwoku woma kia kwivwanga eni nukhaloku mitshima mu wulu. ¹⁵ Nufeti kuhwa Nzambi luzitu mu mitshima yenu nukhadi nwa kubama mu kuhana mvutu kudi muthu mwosu waka nuhula kikuma kiaki nu kushianga mutshima kudi Nzambi. Hangenu yosu ni lujitu. ¹⁶ Khalenu ni ngindu jia pimbu kikuma athu anu tukananga sambu dia lukwikilu lwenu kudi Yesu evi soni kikuma enda akula kubola kwenu mudi esthi mudi athu a bola. ¹⁷ Idi mboti kidi Nzambi wazola etshi nu moni pashi kikuma wenda hanga mambu ma mboti mabola loni. ¹⁸ Yesu epi wa mweni pashi mbala imoshi kikuma kia masumu mweni muthu wa mboti wamona pashi sambu dia etu twakhedi athu abola mukutuneha kui Nzambi. Amu jiyidi ni mwila wenji ata ekina wa tokimini ni moyi mu nzila ya pevi. ¹⁹ Mu kipevi wendidi kulonga jipevi jia bola jidi kikimweni mu boloku. ²⁰ Jia lekidi loni kulemvuka mu khenda Nzambi wa khedi kumakinina kilumbu kia Nowa mu yilumbu yakhedi kutunga masuwa Nzambi wa hulushidi kandambu ka athu mioyi nana mu meya. ²¹ Ekhi kidi kifwanusu kia mbotika yanu hulushidi kesuku mudi etshi kusukula masumu mumwila mudi etshi kuhana kuhwa muthu ngolu jia mabanza ma mboti kudi Nzambi mu nzila ya kutokama kwa Yesu Khidishitu. ²² Yesu wudi ku khoku dia Nzambi dia kitata wudi ku wulu a wanjio luyalu kudi mweni.