1 Tsugangi ko inaagn na ngangn e atwung, 2 oyajingagni na ngyama vear ne mvuru ignu ve; djwi, amuu ntangu eyikikiwo oshin onagn, wamiyama banzio ne mvuru iwo wakajia ve. 3 Kanagni vear ali ne bolog, kamsi eli gnu vear ali ne bolog, kanagni vear alepiiwo mpay, kamsi djuung ignu ileyen mpay inagn. 4 Wuo vear ankum wayii n'osiang n'ivea, ntir e wear na wum ekwon ngya na mbin, djwi Nzeam ayabag nde ewu e wa nduma na vear alekii itaay. 5 Oyapeagni djuung ignu na nziya ekri ve, yiagni n'osiang na vim elignu na wo, djwi Nzeam ndemie atubinde ndenden: "Mposinga ve, mpofanga mpi ve." 6 Eli n'ekaagn enkum esikugsu ntuba susun: "Nkum alensarisi me, kaku vim esilur me ve; nge esikug nkie wur djwi na me?" 7 Kanagni ankum agnu ayolongagni along a Nzeam; liragni oshin oyii luzingu ewo, mby osadjiagni lukwikilu ewo. 8 Yezu- Kristu ali ko oshin omog, na lii, na luo ti mvwe nw mvwe. 9 Oyasiangagni along eshin n'eshin ti along angingien eshwi ne kati egnu ve, djwi ekug wuo itura ignu iyi biu na ngrasia, kansi epa djwi na vim anda ve, enagn eli wuo ko ya vear amisakama na wo. 10 Sili na kunda, vear akie otshia ne tabernacle kakuwo na mbug enda neti ve. 11 Djuung i wagnam eli, watun aluung awo n'ondii e santu ya nkum epea empeab djwi na masumu i vear, djung inagn atsawo mbwo tshiya nelien e wiya. 12 Wog enagn, Yezu mpi, ayen nde mpay inde nelien e epfug e wiya, djwi mpea vear ande djuung i santu. 13 Yag sipueagni, sitsu etay eli nde, nelien e wiya, silueragni nsogn iyi nde. 14 Djwi, ne buu nendien, kaku su na wiya eyazira ve, kansi sileling wiya eyasayia mby. 15 Ne dzin inde, sipiagni ya Nzeam, empeab djwi n'ompeande lokumu, eling ntuba ngean: otuba esipwe n'odzum esituba dzin inde. 6 Mpi oyajingagni na nkie iwuo ve, na nkie nkab ve, djwi Nzeam atsande mvey osiang n'oshin empeab ene. 17 Lemfukagni ya ankum agnu, peagni wo luzitu djwi eli wog vear atsandir moyo ignu, wog vear ayasama ne nteang e Nzeam; eyi oshin onagn djwi wakii wog n'osaing, kansi epa n'ignie n'etura ve, enagn epayia mfunu djwi na gnu ve. 18 Samagni djwi na su, djwi sibansa susun sili n'etura ewuo, yug sileang nkie vim ankum n'oshin owuo. 19 Enagn siwugna ya gnu na nkie wog, djwi nkagni ngya eveang-eveang etay egnu. 20 Nzeam e ngemba, eyikey mbiya Nkum eninen n'ewa, nde wur elir ameme eyikii alien a mvwe na mvwe n'aluung a Yezu-Kristu, 21 opiagni biu n'etshia ewuo djwi okugagni luzolo ende; akii vim esivey nde osiang ya gnu, ne dzin i Yezu-Kristu eli na lokumu e mvwe na mvwe! Amen! 22 Atwung, ndawugna ya gnu na mvey otuba along ane n'itura ignu, djwi ntofugnagni onkeana ekukwe. 23 Jiagni gnugnun otwung osu Timotei wamopur ne bolog, yug atikum ntshu ine nendien, mby ayayiame ti nde n'ondiragni. 24 Peagni mbea ya ankum agnu evuru e Nzeam, na wa santu inkum. Wasantu eli n'Italia watotumagni mbea. 25 Ngrasia eyii ya gnu gnankum! Amen!