¹ Teofile, okabi me n'okeana eme e nteang, vii ankum ayibani nkie Yezu, ilelongikinde , ² tii ko eshu eyivean nde n'olung, ntangu eyishir nde mpea nsiku i nde, na biu e Mpeve -Santu, ya wantumwa iyison nde. ³ Ne mby e mpay iyiyen nde, akeampwe ne luzingu ne nteang ewo, ayegne vim entsign djwi waji wuwun eli ndug, oyenikiwo tii nshu onign, alakabikinde vii a ekub e Nzeam. ⁴ Ntangu eyikinde ti wo enagn, apea nsiku na nkwon ntsa etey na yerusalem, kansi wakwung elaga eyapii Tea, nda wo ndenden : "Vii ayokabagni me: ⁵ Yoane apikinde mbotika e vay, kansi gnu, etisatsuga ivim i nshu, ayavey gnu mbotika e Mpeve-Santu." ⁶ Wantumua ntangu emisanga wo wankum ondii omog, woyue: "Nkum, enagn wog ntangu eyakiara yie ekub e Israel?" ⁷ Akeara ndenden: "Epa djwi gnu ojiagni ntangu ewo ti eshu ewo etubi Tea n'ekub ende . ⁸ Kansi ntangu eyayia Mpeve-Santu ne kati egnu, ayavea gnu biu emog, mby ayayiagnu ntiegn ime ne Yerusalem, ne buu enkum e Yudea, ne buu e Samaria, ti ne nsuka e buu. ⁹ Ko ntangu emishir nde ntuba vim ankum, s'avean nde dzug, ne viy a wo walir, tii adzuba ne mafuba ne viy awo. ¹⁰ Ko ntangu eyilirikiwo olung, ne mbala emog vear ape watilwer ileam i siy-siy, ¹¹ wuwun: "Gnu, ampeam a Galilea ane, djwi na nge emisagnuyima kog oliragni olung? Yezu emivean dzug olung ene, ayakeande k'oshin omog emikien nde n'olung." ¹² Mby s'akey wo Yerusalem, yim ombim e olive, eyii mbeama na Yerusalem, n'otey ata kilometre emog (e mbug emog e sabbat ). ¹³ Ntangu emikum wo, wavean dzug, ondii oyikiwo nshu inkum. Ayiwo Petelo, Yoane, Jaki, Andre , Filipu, Thomas, Bartelemi, Mati, Jaki e mon Alife, Simon zelote, na Yude mon e Jaki. ¹⁴ Akum wo wankum kamsi wur emog, ayiwo biu ne bisamu, ti ankear, ti Maria mea e Yezu, mpi ti atwung nde. ¹⁵ Ne nshu inagn, Petelo ayima ne ngnina atwung, ayiwo ata vear nkama emog n'omab, atuba ndenden : ¹⁶ "Atwung ampeam, eli wuo vii ayitubi Mpeve-Santu n'enkeana eyifugn wo ekug, atubinde n'odzum e David djwi na Yudasi, nde wur eyiyi ndaag vear ayitshung Yezu. ¹⁷ Djwi ayinde emog ne kati esu mpi ayinde n'ikab otshia eleki su. ¹⁸ Wur enagn , ntangu emishum nde evur na ifutu e ekri e ipwo iyikinde, amilog, djung inde asug wo ne ngnina, nsobo inkum nelien. ¹⁹ Vii anagn, vear ankum apier ne Yerusalem ajiiwo, evur e nde apiwo dzin n'otuba ewo e wiya: Hakeldama, etuba wuwun: evur e aluung. ²⁰ Wog enagn, wamifugn n'onkeana e wa lim wuwun: "Siangagni evur ende esayia e ngy, mpi wur akwon mpier neti, wur emuu avey ondag eyikikinde nde." ²¹ Ekug wuo, wur emog ne kati e vear ayii ti su ne ntangu enkum eyike Nkum Yezu ti su, ²² yim ko mbotika e Yoane tii eshu eyivean nde n'olung, wur emog ayii ntiegnti su, n'osin oyikey nde mbiy n'ewa." ²³ Wapur vear ape: Yozefo eviewo Barsabas, eyipiiwo dzin imuu Justus, ti Matiasi. ²⁴ Mby wasama ngean: "Nkum, yie wur ejia itura isu sankum, oteyegni nagn emison yie ne kati e vear ape ane, ²⁵ djwi avey ikab inde n'otshia e ntumwa eyipiy Yudasi, djwi atsu ne mbug eyisoon nde." ²⁶ Wabug dzeke, dzeke elog ya Matiasi, s'otsug wo ondii omog ti wantumwa djum n'emog enagn.