¹ Mpolo, Sidive, we Timatio, ku dibundu di Tesalonika mu Nzambi tata betu we mfumu betu Yesu Kidisitu. Yambulu ngolo we mpweti mu lweke di Nzambi tata betu yi kala ku benu mu zini di mfumu betu Yesu Kidisitu. ³ Tu tuku vutulu matondo ku Nzambi bilumbu biakulu mu diambu di benu, Bampangi. Mu diambu bwabunu bene mu kiese, mu diambu mu dikwikidi di benu di kele di yele bungi, dizolo di mosi mosi ku benu di basa ku mutu yandikulu mu nkati ka benu. ⁴ Di betu betu tu hoyawu mu diambu di benu yi dilendu mu diambu di Nzambi. Tu hoyidawu ku kasa ku mbundu benu we dikwikidi di benu di monikawu ku benu. Tu hoyidawu ata ba lu vutululawu mpasi benu lu kasawu mbundu. ⁵ Kiene kinsisu ki songidawu na lwene ba ku nungu mu kusambisama ku Nzambi, mu ku manisi na lwene ba ku wana mu kimfumu ki Nzambi ki lu mwenenewu mpasi. ⁶ Kwene mamusamu na Nzambi ka vutulawu mpasi ku bana vutulawu mpasi, ⁷ di ka lu heke kiese benu lwene mu kiadi. We ka lu sadisawu ha ka kusu moniki mfumwetu Yesu ku zulu we mambasi mu ngolo za yandi. ⁸ Mu nkati ka kizangi ki mbawu yi ngolo ba ba konele ku mu yaba Nzambi ka ba wulu nkabu we ba ba kondele ku tambusulu nsangu za mfumwetu Yesu. ⁹ Ba bongo ndolo yi mvulu yi mvulu ba kala kiana yi mfumu we kimfumu ki ngolo za yandi. ¹⁰ Ka sla misamu miamini mu kilumbu ki ka bongo dikumu ku batu we mu ku tala bana bakulu ba tambusulu. Mu diambu bakulu bana ba tambusulu dikwikidi. Mu diambu lu tambusulu kimbangi ki betu. ¹¹ Mu diambu diadini tu sambidawu tangu diakulu mu diambu di benu. Tu sambidawu mu diambu Nzambi betu ka lu bongo batu ba bunkete ba ka telele. Tu sambidawu mu diambu ka wanisi mamboti we bisalu biandi bi dikwikidi mu ngolo zandi. ¹² Tu sambidawu bwabunu mu diambu zini di mfuwetu Yesu di bongo dikumu ku benu. Tu sambidawu mu diambu benu lu bongo dikumu kwene yandi, mu diambu di ngolo za Nzambi wetu we mfumu betu Yesu Kidisitu.