¹ Mu diambu, lu yebe benu benu bampangi na kusu ku betu kwene benu ku keloko ku mpamba. ² Lu yaba na betu ntete ke ntu mwene mpasi mana ke ba ntu chele ku bese Fidimpo. Betu ntu tambusele mu Nzambi betu mu diambu di ku lu kamba misamu mi bunkete mi Nzambi ha nkati ka ba ba kondawu ku wakasana. ³ Mu diambu ku siamisi ku betu ku yisidieku mu ki fu, holo mu misamu, holo mu bumpala. ⁴ Mana ntu landa mana ka hoyele Nzambi mu diambu ntu di hana mu ndingi Nzambi, ku hoyeloko na batu ba tumawu batu ba bunkete. Mu diambu ntu moniki ba bunkete ku Nzambi mu diambu yandi talawu mambundu ma batu. ⁵ Mu diambu ntweku we tangu di ku cha misamu mi ku lebe nga bu lu yebe holo ku zulu, Nzambi kene mbangi. ⁶ We dingi dikumu di batu, di tukawu kwene nge holo ku batu ba hiki, ntu nka bisi dikumu bunu ntwene bangenzi ba Kidisitu. ⁷ Mu ku hoyi ku bunkete ntu kele kaka batu ba lebamawu ha nkati ka benu, nga ngudi wunu dikawu we lebawu bana bandi. ⁸ Yi bwawu ntu kele yi nzala yi ku hana dizingu di betu mu diambu di benu. Ntu kele yi kiese ki ku kabisi we benu, keku ndingi na ndingi Nzambi mpamba mana we dizingu di betu, mu diambu benu lu kumini batu ba ntalu mu diambu di betu. ⁹ Mu diambu lu yubuku bampangi, kisalu ki betu we mpasi za betu. Mpibi we muni ntu sadidi, mu diambu ku yaku kala ata mutu fene na ka bongo buzitu bu batu. Mu tangu diene, ntu bongele ndingi Nzambi. ¹⁰ Lwene bambangi, Nzambi mpe kene mbangi, nki mpidi bi kele bi fu bi batu we ku kondo disumu, ku kondo diambu ku mesu ma batu. ¹¹ Mu mpidi ya yini, lu yebe nki mpidi we mosi wu benu nga tata yi bana bandi, ntu lu longelewu we ku lu heke ngolo. ¹² Ntu henewu kimbangi na: Lu kangalawu bunu ka zola Nzambi, ka lu telawu mu diambu dikumu di kimfumu ki yandi. ¹³ Di mu nsungi yi, ntu tuku vutulu matondo kwene Nzambi, na mu tangu lu bongele kwene betu ndingi Nzambi yi lu wudi, lu yi tambuseloko nga ndingi mutu, mana lu yi bongele bunu yene bunu ndingi Nzambi. Ya ndingi yene mu kisalu kwene benu lu yi tambusele. ¹⁴ Mu diambu benu, bampangi, lu yiki ba ba landawu misamu mi ma nzo ma Nzambi ma yandi ma menawu kwene Yuda mu Kidisitu Yesu, mu diambu, lu mwene mpasi ku bampangi ba benu, mpasi za zana mpe ba bongele Bayuda. ¹⁵ Ku kele Bayuda ba mu hondele mu mfumu Yesu we ngenzi. Ku kele Bayuda ba ntu kudidi. Ba mu hekaku kiese Nzambi mana bene ba mbeni ba batu bakulu. ¹⁶ Ba tuku ntu bisidi ntu longo ndingi Nzambi ba ba kondele bayuda mu diambu ba huluku. Yi bwawu ba chawu tangu diakulu masumu ma bawu ma vulu. Nkabu Nzambi za ba budidi bawu. ¹⁷ Ntu kele ba ntu kabisi we benu ba mpangi, mu tangu di nkeke mu ki mutu mana keku ku mbundu. Ntu zolele bungi mu ku lu mono ¹⁸ Mu diambu ntu zolele ntusu kwene benu, mana Mpolo, Mbala zengi mana mafu yi ma ntu kasidi nzidi. ¹⁹ Mu diambu nki ntu fene ku sidi mbundu ku dise, holo kiese ki batu, holo mpu betu yi dikumu ku dise di mfumu betu Yesu ka kusu? Keku benu, batu ba hiki? ²⁰ Mu diambu benu lwene dikumu di betu we kiese ki betu.