¹ Mpolo, Sidive, we Timatio ku dibundu di Tesaloniki ku tata Nzambi we mfumu Yesu Kidisitu. Yambulu dizolo we mpwetiwu yi kala kwene benu. ² Tangu diakulu ntu hanawu matondo ku Nzambi mana ntu sambidawu samu di benukulu. ³ Ntu lu banzawu tangu diakulu mu ku kondo ku ku lembe ku di se di Nzambi tata, bisalu bi benu bi ku tambusulu, we dizolo di benu di ku sala kisalu, bunu lu cha dizolo dini diakulu, ku cha mbundu mu tangu di kusu mu nkati ka kimfumwetu Yesu Kidisitu. ⁴ Ba mpangi ba dizolo ba Nzambi, wu lu solo, ⁵ Mu diambu nsangu za betu za tukidi ku benu keku na mu ndingi mana dihiki ngolo, mu nkati ka mpefu yi kondo disumu we ku cha mbundu bungi. Mu bwabunu lu yaba dihiki na batu bengi ntu kele yi benu mu mamboti menu. ⁶ Yi bwawu benu lu landawu mbandu betu we yi mfumu, bunu lu bongele nsangu mu mandingi mengi lu mwene mpasi zengi we kiese ki tukidi ku mpefu Nzambi. v 7 Hoyi na mvutu, benu lu kumini mbandu ku batu bakulu ba Masedwani we ba Bakayi yi ba tambuswele. ⁸ Mu diambu kwene benu, ndingi mfumu yi mpanzene, mana keku na ku Masedwani we ha nkati Akayi, mwamunu we, mu biziki bi hiki. Munu di mpanzana dikwikidi di benu mu Nzambi. Ntwene yi nzala yi ku yiki bimi. ⁹ Ma musamu, biziki biakulu ntu kumini ba kwe hoyi bunu lu ntu yembe benu, bunu lu bisidi Nzambi wu biteke di lu sambididi Nzambi wu moyi we wu kiediki. ¹⁰ Ka kusu nati wu lu hingida benu zulu mwana yandi wu ka vumbele mu di fwa, kene Yesu wu hulusu nkabu za za kusu.