¹ Asuh bala nembiak nuan nunduk ngagai urang ke megai perintah enggau ngagai urang ke megai kuasa, ngasi ke sida, lalu sedia deka ngereja pengawa iya ke badas, ² enda bejako jai pasal urang, enda belaya, siro enggau orang, sereta bebasa ke semua urang. ³ Laban dulo menya kitai empu udah bele, enda ngasi, tesat, nyadi ulun semua macam pengingin enggau nyadi ulun ati iya ke selalu deka ngelantang ke dire, jai ati ngagai orang, kepapas ke urang, dipegede ke urang lalu begede ke pangan diri. ⁴ Tang lebuh pemadas, penelap enggau pengerindu Allah Taala iya ke nyadi Juru Selamat kitai pegari, ⁵ Iya nyelamat ke kitai, ukai laban kitai udah ngereja pengawa iya ke lurus, tang uleh pengasih Iya. Iya ke maso kitai, lalu ngadai ke kitai baru, lalu mere kitai pengidup iya ke baru uleh Roh Kudus, ⁶ nya dituang Ia ngagai kitai belimpah-limpah, uleh Yesus Kristus iya ke Juru Selamat kitai. ⁷ Nyadi, kitai digaga lurus uleh pengasih Allah Taala, lalu bempu pengidup iya ke meruan belama iya ke disadang kitai. ⁸ To jako iya ke bendar. Aku deka ke nuan bebendar ngemeran ke semua pekara nya, ngambe urang ke udah arap ke Allah Taala nemu ngereja pengawa iya ke badas. Semua utai nya badas magang sereta beguna ke semua urang. ⁹ Tang seliah ke kelikoh iya ke bele, tauka tusut pasal penatai ake ine, tauka penyerekang, enggau laya pasal Hukum Taurat, laban utai nya nadai pulai ke penguntung, sereta nadai guna. ¹⁰ Ngagai urang ke mae penyerekang baka nya, bere jako tangkan enda kurang ari sekale tauka dua kale, udah nya anang age bekaul enggau ia. ¹¹ Laban nuan nemu, urang ke baka nya endang jai sereta bedosa. Ia ngukom dire ia empu. ¹² Leboh aku ngasoh Artemas, tauka Tikikus, nemuai ngagai nuan, aku minta nuan enggau naka uleh nemuai ngagai aku di Nikopolis, laban aku udah mutus ke runding deka ngendoh dia leboh musin celap. ¹³ Enggau naka uleh, tulong Senas enggau Apollos nyendia ke dire mupok. Anang mere age seduai ia suntok sebarang utai. ¹⁴ Lalu awak ka bala kitai belajar ngereja pengawa iya ke badas, ngambe sida ia uleh nuntong utai pengidup sida ia, lalu pengidup sida ia menyana. ¹⁵ Semua urang ke enggau aku bela ngirum ke tabe basa ngagai nuan. Bere tabe basa kami ngagai pangan ke sama pengarap enggau kitai. Awak ke berekat Allah Taala meruan enggau kita semua.