¹ Tang nuan empu enda tau enda mere ajar iya ke bendar. ² Asuh sida ke lelaki, ke tuai age umur, nagang dire, bejimat berunding, tegap dalam pengarap, dalam pengerindu, sereta ngembuan ati iya ke tan. ³ Baka nya mega, asoh sida indo ke tuai age umur diau tuci, enda bejako ke urang, enda pengirup. ⁴ Asuh sida ngajar utai iya ke badas, ngambe sida uleh matih ngagai indo ke agi biak rindo age laki enggau anak sida, ⁵ nagang dire, diau tuci, ngintu ruang bilek sida enggau menyana, nelap, sereta nundok ngagai laki sida, ngambe jako Allah Taala nadai jalai mantah. ⁶ Baka nya mega, peransang lelaki iya ke age biak belajar nagang dire. ⁷ Ayan ke dire empu nyadi ke teladan iya ke badas dalam semua utai iya ke dikereja nuan, lalu dalam semua ajar nuan, ayan ke dire amat lurus ati, enda empelita ulah, ⁸ bejako menyana lalu nadai jalai mantah, ngambe urang ke ngelaban nuan nemu malu laban sida nadai jalai bejai age kitai. ⁹ Asoh ulon nundok ngagai tuan sida lalu ngemuas ke ati tuan sida dalam semua utai, sida enda tau besaut enggau tuan sida. ¹⁰ Anang encuri utai ari sida, tang ngayan ke dire endang seruran manah sereta tetap ati, ngambe dalam semua utai sida mae puji ngagai ajar iya ke diberi Allah Taala iya ke Juru Selamat kitai. ¹¹ Laban pengasih Allah Taala udah pegari, mae pengelepas ngagai semua mensia, ¹² ngajar kitai muai semua ulah iya ke jai, enggau semua pengingin dunya, lalu nemu nagang dire, diau lurus, sereta nangi ke Allah Taala dalam dunya tu, ¹³ sekumbang kitai ke nganti pengadang iya ke beberekat, enggau mulia Allah Taala, enggau Yesus Kristus iya ke Juru Selamat kitai, pegari ¹⁴ ke udah nyerah ke Dire ketegal kitai, ngambika Iya ulih nebus kitai ari semua penyai, lalu nuci ke dire Ia empu, ngambe kitai diempu Iya siku aja, lalu gagit ati ngereja pengawa iya ke badas. ¹⁵ Padah ke utai to ngagai urang. Peransang lalu rara urang ngena semua kuasa. Anang neju ke urang ngemaruh ke nuan.