¹ Nya alai diatu orang ke dalam Yesus Kristus nadai kena ukum agi, ² laban adat Roh ti meri pengidup dalam Yesus Kristus, udah ngelepaska aku ari adat dosa enggau pemati. ³ Laban Allah Taala udah ngereja utai ti enda ulih dikereja Adat laban mensia lemi. Nya alai Iya ngirumka Anak Iya Empu ngena gamal mensia ti bedosa, ngambika Iya muai dosa, ngukum dosa dalam tubuh mensia ⁴ ngambika atur ti lurus ti dibai Adat dikamatka dalam kitai ke idup nitihka peneka Roh Kudus, ukai nitihka peneka mensia. ⁵ Laban orang ke idup nitihka peneka mensia berundingka utai ti dikinginka mensia, tang orang ke idup nitihka peneka Roh Kudus berundingka utai ti dikedekaka Roh Kudus. ⁶ Runding ti ditumpuka ngagai peneka mensia, nuju ngagai pemati, tang runding ti ditumpuka ngagai peneka Roh Kudus, nuju ngagai pengidup enggau pemaik. ⁷ Nya kebuah runding ti ditumpuka ngagai peneka mensia, bemunsuh ngelaban Allah Taala. Iya enda nunduk ngagai adat Allah Taala, laban iya ti bendar, iya endang enda ulih nunduk ngagai Adat nya, ⁸ lalu orang ke nurutka peneka mensia, enda ulih ngerinduka ati Allah Taala. ⁹ Tang kita ukai idup nitihka peneka mensia. Kita idup nitihka peneka Roh, laban Roh Allah Taala diau dalam kita. Barang sapa nadai Roh Kristus, ukai nembiak Kristus. ¹⁰ Tang enti Kristus diau dalam kita, taja pen tubuh kita mati laban dosa, Roh Allah Taala meri kita pengidup laban pengelurus. ¹¹ Enti Roh Iya ke udah ngangkatka Jesus ari mati, diau dalam kita, Iya ke udah ngangkatka Kristus ari mati, deka mega meri pengidup ngagai tubuh kita ti nemu mati, ulih Roh Iya ke diau dalam kita. ¹² Nya alai, menyadi, kitai berutang, tang ukai ba mensia lalu idup nitihka peneka mensia, ¹³ laban enti kita idup nitihka peneka mensia, kita deka mati, tang enti, ulih Roh Kudus, kita munuh pengawa ti bedosa ti dikereja tubuh kita, kita deka idup. ¹⁴ Laban semua orang ke diiring Roh Allah Taala endang anak Allah Taala. ¹⁵ Laban kita ukai nerima roh ti ngasuh kita nyadi ulun penakut baru, tang kita udah nerima Roh ti ngiru kita nyadi anak Allah Taala. Lebuh kitai ngangau, “Abba! Apai!” ¹⁶ iya nya Roh Kudus Empu ke besaksi ngagai roh kitai, madahka kitai tu anak Allah Taala, ¹⁷ lalu enti kitai tu anak Allah Taala, kitai bempu waris Allah Taala, sama bempu waris enggau Kristus, laban enti kitai amat merinsa sama enggau Kristus, kitai deka mega dimuliaka sama enggau Iya. ¹⁸ Aku ngira, pemerinsa ti ditatka kitai diatu, enda ulih dibandingka enggau mulia ti deka dipandangka ngagai kitai. ¹⁹ Laban semua utai ti udah digaga Allah Taala endang balat lelengau nganti Allah Taala mandangka bala anak Iya, ²⁰ laban semua utai ti udah digaga Allah Taala endang ditaga nadai reti agi, ukai ulih peneka sida empu, tang ulih peneka Allah Taala ke ngaga iya baka nya, ²¹ ngarapka semua utai ti udah digaga Allah Taala dilepaska ari tubuh sida ti nemu buruk, lalu bulih pengelepas ti bemulia ti endang enggi bala anak Allah Taala. ²² Kitai nemu, semua utai ti digaga Allah Taala, bedemuh magang natka diri pedis nyentuk ngagai diatu, baka indu ke radai deka beranak. ²³ Lalu ukai semina nya aja, tang kitai empu ke terubah diberi Roh Kudus mega bedemuh dalam ati kitai nganti diri diiru nyadi anak, reti nya tubuh kitai ditebus. ²⁴ Kitai diselamatka laban pengadang. Utai ti dikumbai pengadang nya ukai utai ti dipeda kitai. Laban sapa ngadangka utai ti udah dipeda iya? ²⁵ Tang enti kitai ngadangka utai ti apin dipeda kitai, kitai nganti iya enggau ati ti liat. ²⁶ Baka nya meh chara Roh Kudus nulung kitai lebuh kitai lemi. Kitai enda nemu chara kitai patut besampi, tang Roh Kudus minta ngagai Allah Taala ngarika kitai ngena demuh ti enda ulih ditelah. ²⁷ Lalu Allah Taala, ke mansik ati kitai, nemu runding Roh Kudus, laban Roh Kudus minta ngarika nembiak Tuhan nitihka peneka Allah Taala. ²⁸ Kitai nemu, dalam semua utai, Allah Taala endang bekereja ke penguntung orang ke rinduka Iya, ke dikangauka Iya nitihka juluk ati Iya. ²⁹ Laban orang ke udah dikelala Allah Taala kenyau ari pun, mega diletak Iya nyadi sebaka enggau Anak Iya, ngambika Anak Iya nyadi Aka Tuai ke sida menyadi Iya dalam ruang bilik ti besai nya. ³⁰ Lalu orang ke udah diletak Iya nyadi sebaka enggau Anak Iya, mega dikangauka Iya; lalu orang ke dikangauka Iya mega digaga Iya lurus; lalu orang ke digaga Iya lurus, mega diberi Iya mulia. ³¹ Enti pia, baka ni ku jalai kitai bejakuka pasal utai tu? Enti Allah Taala setanah enggau kitai, sapa ulih ngelaban kitai? ³² Allah Taala enda ngalau Anak Iya Empu, tang nyerahka Iya ke kitai semua. Enda ka Iya enggau Jesus Kristus deka mega meri kitai semua utai bukai? ³³ Sapa ulih bedawaka orang ke udah dipilih Allah Taala? Allah Taala Empu ke ngumbai kitai nadai penyalah! ³⁴ Sapa ulih ngukum kitai? Yesus Kristus ke udah mati, ke udah diangkatka idup baru, ke duduk muak ari kanan Allah Taala, ke deka bejaku ngarika kitai. ³⁵ Sapa ulih nyeraraka kitai ari pengerindu Kristus? Kati penusah, tauka pemedis, tauka pemerinsa, tauka lapar pungkang, tauka penyeranta, tauka utai ti tau nganu nyawa, tauka pedang, ulih nyeraraka kitai ari pengerindu Kristus? ³⁶ Munyi ti udah ditulis, “Ketegal Nuan meh kami dibunuh sepemanjai hari. Kami tu baka bedus ti deka disayat.” ³⁷ Nadai! Dalam semua utai nya kitai lebih ari pemenang, ulih Iya ke rinduka kitai! ³⁸ Laban aku nemu, nadai utai, nemuka pemati, tauka pengidup, tauka melikat, tauka bala pemerintah, tauka utai ti diatu, tauka utai ti jemah ila, tauka kuasa, ³⁹ tauka dunya ti di atas enggau dunya ti di baruh, tauka semua utai bukai ti udah digaga Allah Taala, ulih nyeraraka kitai ari pengerindu Allah Taala dalam Yesus Kristus Tuhan kitai.