¹ Kati kita enda nemu, menyadi--aku bejaku ngagai orang ke nemu Adat--Adat semina bekuasa atas orang lebuh orang nya agi idup? ² Ambika banding, indu ke bisi laki, ditanchang adat ngagai laki iya, seagi-agi laki iya idup; tang enti laki iya mati, iya dilepaska ari adat ti nanchang iya ngagai laki iya. ³ Lalu iya deka dikumbai butang enti iya diau enggau lelaki bukai lebuh laki iya empu agi idup. Tang enti laki iya mati, iya dilepaska ari tanchang adat nya, lalu enti iya belaki baru, iya enda butang. ⁴ Baka nya mega kita, menyadi. Kita udah mati ke Adat, laban kita diatu udah nyadi raban tubuh Kristus, ngambika kita seraban enggau pangan diri, diempu Iya ke udah diangkatka idup baru ari mati, ngambika kitai bebuah ke Allah Taala. ⁵ Lebuh kitai idup dalam tubuh kitai tu, pengingin kitai ti bedosa, ti disungkak Adat, mengkang bekereja dalam tubuh kitai, lalu ngeluarka buah ke pemati. ⁶ Tang diatu kitai udah dilepaska ari Adat, mati ari utai ti udah nanchang kitai suba, ngambika kitai enda agi nyadi ulun Adat ti lama udah ditulis, tang nitihka jalai ti baru ti diberi Roh Kudus. ⁷ Enti pia, baka ni ku jalai kitai bejaku? Kati kitai ngumbai Adat nya dosa? Enda! Enti nadai Adat, aku tentu enda nemu utai ti dikumbai dosa. Aku tentu enda nemu reti utai ti dikumbai inginka utai orang, enti Adat nadai udah nyebut, “Anang inginka utai orang.” ⁸ Tang dosa udah tetemuka peluang dalam Adat, lalu ngaga semua macham pengingin ke utai orang dalam ati aku. Enti nadai Adat, dosa mati. ⁹ Aku menya udah idup ari luar Adat, tang lebuh pesan datai, dosa idup baru lalu aku mati, ¹⁰ lalu pesan ti besemaya deka meri pengidup, udah munuh aku. ¹¹ Laban dosa, lebuh iya udah tetemuka peluang dalam pesan nya, nipu aku lalu munuh aku ngena peluang nya. ¹² Nya alai, Adat endang kudus, lalu pesan endang kudus, lurus, sereta badas. ¹³ Enti pia, kati utai ti badas mai pemati ngagai aku? Enda! Dosa ti mai pemati ngagai aku, ngena utai ti badas, ngambika dosa dipandangka endang amat dosa, lalu ulih pesan, dosa nya dipandangka amat utai ti pemadu jai. ¹⁴ Laban kitai nemu, Adat endang asal ari Roh Allah Taala, tang asal aku ari mensia ke dijual nyadika ulun dosa. ¹⁵ Aku enda nemu utai ti dikereja diri, laban aku enda ngereja utai ti dikedekaka aku, tang ngereja utai ti dipegedika aku. ¹⁶ Nyadi enti aku ngereja utai ti dikenggaika aku, reti nya aku besetuju ngumbai Adat nya badas. ¹⁷ Nya alai, ukai aku ke ngereja utai nya, tang dosa ti diau dalam aku. ¹⁸ Laban aku nemu, nadai utai ti badas diau dalam aku, reti nya, dalam tubuh aku. Aku keran deka ngereja utai ti ngena, tang aku enda ulih ngereja utai nya. ¹⁹ Laban aku ukai ngereja utai ti badas ti dikedekaka aku, tang ngereja utai ti jai ti dikenggaika aku. ²⁰ Enti aku ngereja utai ti dikenggaika aku, ukai aku ke ngereja utai nya, tang dosa ti diau dalam aku. ²¹ Nya alai, aku nemu, tu amat adat ba aku: lebuh aku deka ngereja utai ti badas, aku lalu milih penyai. ²² Laban dalam ati aku, aku endang rinduka adat Allah Taala, ²³ tang aku meda dalam tubuh aku, adat bukai beperang ngelaban Adat ti dalam ati aku lalu nanchang aku ngena adat dosa, ti diau dalam tubuh aku. ²⁴ Naka meh penusah aku tu! Sapa deka ngelepaska aku ari tubuh tu ti mai aku ngagai pemati? ²⁵ Aku meri terima kasih ngagai Allah Taala ulih Yesus Kristus Tuhan kitai! ²⁶ Nya alai, ngena runding aku, aku nyadi ulun adat Allah Taala, tang ngena tubuh aku, aku nyadi ulun adat dosa.