¹ Nya kebuah, menyade ke dikerindu sereta dikelengauke aku, ke nyadike pengaga nggau makota aku, bediri tegap alam Tuhan, menyade. ² Aku minta Euodia, alu aku minta Sintikhe besetuju nggau pangan dire alam Tuhan. ³ Alu aku minta nuan, pangan aku ke taluk, nulong sida indo to laban sida udah jamah amat nggau aku nusi Berita Injil, sama nggau Klemens, nggau semua sida bukae ke sama bekereja nggau aku, ke bise nama alam buku pengidup. ⁴ Seruran gaga ati alam Tuhan. Aku nando nya baru, gaga ati meh! ⁵ Awakke semoa urang nemu penyiru kita. Tuhan nyau damping. ⁶ Anang irauke utae, tang alam semua utae, bantaike semua peminta kita age Allah Taala ngena sampi, sampi peminta, nggau sampi terima kaseh. ⁷ Alu pemaik Allah Taala, te ngeluek peragam mensia, deka nyaga ati nggau rundeng kita alam Yesus Kristus. ⁸ Ke pengujung iya, menyade, semoa utae ke amat, ke manah, ke lurus, ke tuci, ke badas, ke nelap, ke pemado iya badas, ke tao dipuji, perundeng ke meh semoa utae nya. ⁹ Kereja semoa utae ke udah dipelajar, udah diterima, udah didinga, udah dipeda kita kereja aku, kereja meh semoa utae nya, alu Allah Taala ke mere pemaek deka seretai nggau kita. ¹⁰ Ati aku balat gaga alam Tuhan, laban kita diato nyau nemu kirohke aku baru. Iya ke amat, kita endang amat nemu kirohke aku suba, tang kita nadae peluang ndur kita ngayanka nya. ¹¹ Ukae reti nya aku sebanake penyuntok dire, laban aku udah belajar nemu puas ati nemuka aku suntok taoka nda. Aku nemu reti asai suntok, alu aku pan nemu reti asai bise utae. ¹² Alam semoa utae, aku udah nemu cara ke rahasia kena aku napi maya aku kenyang taoka lapar, maya aku mayoh utae taoka suntok. ¹³ Aku uleh ngereja semoa utae uleh Iya ke meri aku pengering. ¹⁴ Tang manah amat kita udah nggau aku besaopke penusah. ¹⁵ Kita urang Filipi sige nemu, leboh aku baru belabuo nusi Berita Injil suba, leboh aku angkat ari menua Makedonia, nadae jemaat deka nulong aku, kelimpah ari kita; ¹⁶ pengudah nya, leboh aku ba Tesalonika kita suah ngiromka tulong age aku. ¹⁷ Ukae reti nya aku minta pemeri nya, tang aku deka meda pemesai penguntung kita. ¹⁸ Aku udah nerima semoa bayar, lebeh ari cukup. Aku puas ati, laban aku udah nerima ari Epafroditus pemere ke dikiromka kita age aku, persembahan ke bau rengut, persembahan ke diterima sereta dikerinduke Allah Taala. ¹⁹ Alu Allah Taala aku, deka meri semua utae ke dipeguna kita, nitehke pengaya mulia Iya alam Yesus Kristus. ²⁰ Beri meh mulia age Allah Taala nggau Apai kitai belama-lama iya. Amin. ²¹ Beri tabi basa age genap iko urang kudus. Bala menyade ke begulae nggau aku dito, bela ngiromke tabi basa age kita. ²² Semoa urang kudus bela ngiromke tabi basa age nuan, kelimpah ari sida ke kereja alam istana Kaisar. ²³ Pengaseh ari Tuhan Yesus Kristus nyeretai roh nuan. Amin.