¹ Surat ari Paulus enggau Timotius, hamba Yesus Kristus, age semua urang kudus alam Kristus ke ba Pilipi, nyengkaum sida penilik jemaat enggau sida diaken. ² Pengaseh pengerindu enggau damai sejahtera ari Allah, Apai kitae, enggau ari Tuhan Yesus Kristus nyeretai kita. ³ Aku mere terima kaseh age Allah Taala aku genap kale aku ingatka kita. ⁴ Leboh genap kale aku besampi ke semua kita, aku besampi enggau ati te gaga. ⁵ Laban kenyau ari hari te keterubah nyentok ngagae diato, kita udah sama enggau aku ngerembaike Berita Injil. ⁶ Lalu aku nemu, Allah Taala ke udah ngepunke kereja te badas to ke kita, deka nemboke kereja nya leboh Hari Yesus Kristus. ⁷ Aku sige patut berunding baka to ke semua kita, laban aku endang seruran ingatke kita dalam ati aku, laban semua kita udah sama enggau aku ngereja pengawa te udah dibere Allah Taala age aku, nemuke leboh aku bejako ngemang sereta netapke pengamat Berita Injil alam rumah penjara to taoka ba luar. ⁸ Laban Allah Taala nemu aku amat lelengauke kita ngena pengerindu Yesus Kristus. ⁹ To meh sampi aku, ngambeke pengerindu kita majak nambah-menambah, sama enggau penemu enggau penalam perening kita, ¹⁰ ngambeke kita nemu mileh utae te pemado badas, alu nyadi tuci sereta nda tacat leboh Hari Kristus, ¹¹ penuh laban buah pengelurus te datae uleh Yesus Kristus, te mae puji enggau mulia ngagae Allah Taala. ¹² Aku dekaka kita nemu, menyade, utae te udah nyadi ba aku amat udah nulong ngerembaike Berita Injil, ¹³ datae ke semua urang ke nyaga istana Raja Besai, enggau semua urang bukae, nemu aku kena tan alam rumah penjara ketegal Kristus; ¹⁴ alu mayoh bala menyade nyadi kempang ati dalam Tuhan, alu majak berani agi nusi Firman Allah Taala. ¹⁵ Sekeda amat madahke pasal Kristus laban sida kepapas taoka mekit pangan dire, tang sida ke bukae, ari ati ke manah. ¹⁶ Sekeda nya ngereja nya ari pengerindu, laban sida nemu aku udah ditempat ke bejako ngeringke Berita Injil. ¹⁷ Raban te keterubah nya, madahke pasal Kristus laban sida tinggi ati ke dire mpu, ukae bepun ari ati ke amat, laban sida nguji ngenusahke ati aku leboh aku age alam rumah penjara. ¹⁸ Tang nya nadae ngacau, asal ga Berita Injil Kristus ditusi ngena semua macam cara, nemuke juluk ati nya salah taoka ngena. Alu aku gaga ati ke nya. ¹⁹ Sige amat, aku endang deka majak gaga ati, laban aku nemu, ari sampi kita, enggau ari tulong Roh Yesus Kristus, aku deka dilepaske. ²⁰ Aku endang ngarap sereta ngadang dire nda malu, tang bejako enggau naka pemerani, ngambeke Kristus meruan dimuliake alam tuboh aku baka selama, nemuke ngena pengidup taoka ngena pemati aku. ²¹ Laban ba aku, idup nya Kristus alu mati nya penguntung. ²² Enti aku majak idup ba dunya to, reti nya aku uleh ngereja mayoh age kereja te beguna. ²³ Alu aku nda nemu ni te patut dipileh aku. Aku nda nemu jalai mileh utae ari utae dua bengkah nya. ²⁴ Aku bise amat ati deka ninggalke pengidup to, alu begulae enggau Kristus, laban nya lebeh manah age; tang aku beguna age ba kita enti aku mengkang idup. ²⁵ Nya kebuah laban aku nemu nya, aku nemu dire deka mengkang idup alu majak diau enggau semua kita, ngemansang sereta meri pengaga ngagae kita alam pengarap, ²⁶ ngambeke aku mayoh age peluang temegah enggau kita alam Yesus Kristus leboh aku nemuai baru age kita. ²⁷ Utae te lebih beguna nya, kita nda tao nda idup nitehke ajar te dibae Berita Injil Kristus, ngambeke, nemuke aku bise enggau kita, taoka nadae enggau kita, aku uleh ninga kita sama seati, sama sepenemu, begandin bau bebendar bekereja ke pengarap te dibae Berita Injil. ²⁸ alu nda takutke munsoh kita. Ba munsoh kita, to nunjokke sida deka dirusak, tang ba kita, to nunjokke kita dilepaske. ²⁹ Semua utae to endang dikereja Allah Taala magang. ³⁰ Laban uleh pengaseh Iya, Iya udah meri kita hak ukae semina pecayake Kristus, tang mega ngenatke pemerinsa ketegal Iya, laban diato kita sama enggau aku bebendar ngereja pengawa, pengawa te udah dipeda kita kereja aku, alu agi mengkang dikereja aku diato, munyi te didinga kita.