¹ Lebuh maya nya, Yohanes Pemaptis datai alu belaboh ngajar di menua puang Yudea. ² Ko iya, “Nesal ati ke dosa kita, laban Perintah surga nyau damping!” ³ Yohanes nya meh urang ke dikenang nabi Yesaya leboh iya nyebut, “Siko urang ngangau di menua puang: ‘Sediaka jalai ke Tuhan. Gaga jalai Iya rurus!’ ” ⁴ Gari Yohanes digaga ari bulu unta. Belulang ti melit punggung iya digaga ari kulit jelu, alu iya beridup makai buntak enggau ai manyi. ⁵ Urang ari Yerusalem, ari serata menua Yudea, enggau ari serata menua ti damping Sungai Yordan datai ngagai iya. Sida ngako dosa sida, ⁶ alu Yohanes maptis sida ba Sungai Yordan. ⁷ Tang leboh Yohanes meda mayoh urang Farisi enggau urang Saduki datai minta iya maptis sida, iya alu bejako ngagai sida, “Kita anak ular beludak! Sapa ngasoh kita rari ari pengeringat ti deka datai? ⁸ Bebuah meh kita kena nunjuk ka kita amat udah nesal ati, ⁹ alu anang nyebut ngagai diri empu, ‘Kami to peturun Abraham,’ laban aku madah ngagai kita, Allah Taala uleh ngaga batu to nyadi peturun Abraham! ¹⁰ Ndah diato deh kapak udah sedia deka mungga urat kayo. Semua kayo ti enda mansut ka buah ti badas, deka ditebang, alu dibuai ngagai api. ¹¹ “Aku maptis kita ngena ai, kena nunjukka kita udah nesal ati, tang Iya ke datai dudi ari aku, bekuasa agi ari aku. Ndah mincing sendal Iya deh aku enda tao. Iya deka maptis kita ngena Roh Kudus enggau api. ¹² Bekakas ti dikena Iya nampi bisi ba jari Iya. Iya deka nampi alu nyimpan gandum alam setor Iya, tang Iya deka nunu ampa alam api ti enda nemu padam.” ¹³ Udah bekau nya Yesus datai ari Galilea ngagai Yohanes di Sungai Yordan ngambika Iya dibaptis uleh Yohanes. ¹⁴ Yohanes nguji nagang Iya. Ku Yohanes, “Aku baru patut dibaptis uleh Nuan, alu Nuan datai ngagai aku?” ¹⁵ Tang ku Yesus nyaut iya, “Awakka baka nya aja diatu. Laban kitai enda tao enda ngereja semua utai ti lurus.” Yohanes alu besetuju. ¹⁶ Lebuh Yesus udah dibaptis, Iya pansut ari alam ai. Langit alu tebuka. Iya alu meda Roh Allah Taala nurun alu inggap ba Iya baka burung acang. ¹⁷ Siti nyawa alu bejako ari surga, “To Anak ke dikesayau ka Aku. Aku rinduka Iya.”