¹ Lebuh yesus adai di nengeri Betlehem, alam menua Yudea, lebuh rambau Herodes nyadi raja, peda meh ,urang Majus datai ari Timur ngagai Yerusalem. ² Ko sida nanya, “Dini endur anak mit ke deka nyadi raja orang Yahudi adai? Kami bisi meda bintang Iya pansut di timur, lalu kami datai deka nyembah Iya.” ³ Lebuh Raja Herodes ninga nya, iya enggau semua urang di Yerusalem alu irau ati. ⁴ Iya alu ngumpul ka semua tuai imam enggau sida pengajar Adat, lalu nanya ngagai sida endur alai Kristus adai. ⁵ Ko sida madah ngagai iya, “Di nengeri Betlehem alam menua Yudea, laban utai to udah dituleh siko nabi: ⁶ ‘Nuan Betlehem ti di menua Yehuda, nuan ukai nengeri ti pemadu mit enti dibanding ka enggau pemerintah ti bukai di menua Yehuda, laban ari nuan deka datai siko pemerintah ti deka nyadi pengibun Umat- Aku Israel.’ ” ⁷ Herodes alu mesau ka urang Majus nya, alu nemu ari sida maya bintang nya pansut. ⁸ Iya alu ngasoh sida mupuk ngagai Betlehem. Ko iya, “Mupuk meh kita, alu giga enggau bebendar endur alai anak mit nya, alu lebuh kita udah tetemuka Iya, padah ka ngagai aku, ngambika aku uleh mega datai alu nyembah Iya.” ⁹ Udah ningga utai ko raja, sida alu mupuk, alu bintang ti udah dipeda sida di Timur bejalai dulu ari sida datai ke iya nyau ngetu ari atas endur alai anak mit nya. ¹⁰ Lebuh sida meda bintang nya, sida gaga amat ati. ¹¹ Sida tama ngagai rumah nya, alu meda anak mit nya, enggau indai Iya Maria. Sida belutut alu nyembah Iya. Udah nya sida muka ma sida, alu meri ngagai Iya emas, kemenyan, enggau mur. ¹² Sida alu pulai ngagai menua sida empu nengah jalai bukai laban sida udah diberi jako tangkan alam mimpi, enda nyagi sida pulai ngagai Herodes. ¹³ Lebuh urang Majus udah mupuk, siko malaikat Tuhan pansut ba mua Yusuf alam mimpi, alu bejako ngagai iya, “Angkat nuan. Bai anak mit nya enggau indai Iya rari ngagai menua Mesir. Diau dia nyentuk ngagai maya aku ngasuh nuan ninggalka menua nya, laban Herodes baru deka ngiga anak mit nya, alu munuh Iya.” ¹⁴ Yusuf alu angkat, mai anak mit nya enggau indai Iya malam nya, alu mupuk ngagai menua Meisr. ¹⁵ Sida diau di menua nya nyentuk ngagai maya Herodes mati. To ngamatka jako ti udah disebut Tuhan beseruanka siko nabi, “Aku ngangau ka Anak Aku pansut ari menua Mesir.” ¹⁶ Lebuh Herodes nemu diri udah ditipu urang-urang Majus nya, iya pedis ati. Iya alu meri atur ngasuh semua anak mit ke lelaki, ke umur dua taun ke baruh, di Betlehem enggau di menua ti ngelingi nengeri nya, dibunuh magang, nitihka maya ti udah ditemu iya ari urang -urang Majus. ¹⁷ Nya meh jalai jako Tuhan ti disebut nabi Yeremia dikamat ka: ¹⁸ “Munyi nyawa bisi didinga di Rama, munyi urang ke bekedui nyabak. Rahel nyabak ka bala anak iya. Iya enggai diperindang, laban sida nadai agi.” ¹⁹ Lebuh Herodes udah mati, siko malaikat Tuhan pansut alam mimpi ngagai Yusuf di menua Meisr, ²⁰ alu bejako, “Angkat. Bai anak mit nya enggau indai Iya, alu pulai ngagai menua Israel, laban urang ke deka munuh Iya, udah mati.” ²¹ Yusuf alu angkat, mai anak mit nya enggau indai Iya, alu pulai ngagai menua Israel. ²² Tang lebuh Yusuf ninga Arkhelaus udah nganti apai iya Herodes nyadi raja menua Yusuf, iya takut mansang ngagai menua nya, alu lebuh iya udah diberi jako tangkan alam mimpi, iya alu mupuk ngagai menua Galilea, ²³ Iya alu diau ba sebuah nengri ti dikumbai Nazaret. To ngamatka jako ti udah disebut Tuhan beseruanka sida nabi: “Iya deka dikumbai Urang Nazaret.”