¹ Yesus alu bejako baru ngena jako sempama ngagai urang mayoh. Ko Iya, ² “Perintah surga tao di banding ka enggau siko raja ke nyendia ka pesta gawai nikah ke anak lelaki iya. ³ Iya ngasoh bala urang gaji iya ngangau ka urang ke udah diambi ngabang datai ngagai pesta gawai nikah nya. Tang sida enggai datai. ⁴ alu ngasoh bala urang gaji iya ti bukai, ko iya, ‘Padah ka ngagai urang ke udah diambi ngabang: Dinga kita, aku udah nyendia ka pengerami makai besai. Jelu sapi aku, enggau anak sapi aku ti gemo udah disayat, alu semua utai udah sedia magang. Datai meh kita ngagai pesta gawai nikah to.’ ⁵ Tang sida enda tentu iboh ka tesau nya alu mupuk ngagai endur bukai, siko ke umai, siko ngagai pengawa dagang iya, ⁶ alu sida ti bukai nangkap bala urang gaji raja nya, beduan alu munuh sida. ⁷ Raja nya alu ringat. Iya ngirum ka bala sedadu iya, munuh bala pemunuh nya, alu nunu nengri sida. ⁸ Udah nya iya bejako ngagai bala kuli iya, ‘Pesta nikah udah sedia, tang urang ke udah diambi ngabang enda tao datai. ⁹ Nya alai bejalai kita ngagai jalai raya alu ambi ngabang ngagai pesta nikah to semua urang ke di temu kita.’ ¹⁰ Bala kuli iya alu mansang ngagai semua jalai raya, lalu ngempuru ka semua urang ke di temu sida, urang ke manah enggau urang ke jai. Nya alai endur nikah nya nyau penuh laban bala pengabang. ¹¹ “Tang leboh raja tama, deka meda bala pengabang, iya tepeda ka siko lelaki ke enda ngena pekayan nikah. ¹² Iya alu bejako ngagai urang nya, ‘Unggal, baka ni ko nuan tama kito enda ngena pekayan nikah?’ Urang nya alu diau diri aja. ¹³ Udah nya raja alu bejako ngagai bala kuli iya, ‘Perekas kaki jari iya, alu buai iya ke luar ngagai endur ti petang, endur urang deka nyabak sereta bekerit ngeli.’ ¹⁴ Laban mayoh di kangau, tang mimit aja dipilih.” ¹⁵ Udah nya sida urang Farisi mupuk alu baum deka nyerat Yesus ngena jako Iya Empu. ¹⁶ Sida alu ngasoh bala murid sida enggau bala nembiak Herodian mansang ngagai Yesus. Ko sida, “Guru, kami nemu Nuan endang madah ka utai ti amat, alu ngajar utai ti amat pasal jalai Allah Taala, alu Nuan enda beduli ka urang, laban Nuan endang enda beduli ka sapa-sapa. ¹⁷ Nya alai padah ka runding Nuan ngagai kami. Kati kitai tao mayar cukai ngagai Raja Besai, tauka enda?” ¹⁸ Tang Yesus nemu ati sida endang jai. Nya alai Iya bejako, “Nama kebuah kita nguji Aku? Kita to urang ke pura-pura ngapa? ¹⁹ Pandang ka ngagai Aku duit kena mayar cukai!” Sida alu mai sesingkap duit ngagai Iya. ²⁰ Iya alu nanya sida, “Gambar sapa enggau nama sapa to?” ²¹ Sida alu nyaut, “Enggi Raja Besai.” Iya alu bejako ngagai sida, “Utai Raja Besai, beri ngagai Raja Besai, utai Allah Taala, beri ngagai Allah Taala.” ²² Leboh sida ninga nya, sida balat alit ati. Sida alu ninggal ka Iya, alu mupuk ari endur nya. ²³ Sari nya mega, sekeda urang Saduki, datai ngagai Iya. Sida nya urang ke ngumbai nadai pengangkat ari mati. ²⁴ Lalu sida nanya Iya, “Guru, Musa madah ka, ‘Enti laki mati nadai anak, menyadi laki iya enda tao enda jadi enggau balu nya, ngambika seduai iya bisi anak ngari ka menyadi iya.’ ²⁵ Nyadi sekali ba bala kami bisi tujuh iko urang diri menyadi. Iya ke tuai bebini, alu mati nadai anak, alu ninggal ka balu iya ke menyadi laki iya. ²⁶ Baka nya mega menyadi iya ti ke dua, ti ke tiga, nyentuk ngagai menyadi iya ti ke tujuh. ²⁷ Ke penudi iya, indu nya mega mati. ²⁸ Leboh pengangkat urang ari mati, sapa ari sida tujuh iko nya ke bempu bini nya? Laban semua sida bela udah ampit jadi enggau iya.” ²⁹ Tang ko Yesus nyaut sida, “Salah penemu kita, laban kita enda nemu Kitab Suci, tao ka kuasa Allah Taala. ³⁰ Laban, leboh pengangkat urang ari mati, sida nadai jadi melaki-bini, tao ka nikah, tang nyadi baka malaikat ti di surga. ³¹ Nyadi pasal pengangkat urang ari mati: kati kita nadai udah kala maca utai ti udah di padah ka Allah Taala ngagai kita, ³² ‘Aku to Allah Taala ke di sembah Abraham, Isak, enggau Yakub?’ Iya ukai Allah Taala ke urang ke mati, tang Allah Taala ke urang ke idup.” ³³ Leboh urang mayoh ninga nya, sida balat amat alit ati ke ajar Iya. ³⁴ Leboh urang Farisi ninga Yesus udah madam ka penemu urang Saduki, sida lalu begempuru. ³⁵ Siko ahli Hukum Taurat ari bala sida alu mantai ka siti tanya ngagai Yesus, deka nguji Iya. ³⁶ “Guru, ni pesan ti pemadu besai dalam Adat?” ³⁷ Ko Yesus bejako ngagai iya, “ ‘Rindu ka Tuhan Allah Taala nuan enggau pengabih ati nuan, enggau pengabih semengat nuan, enggau pengabih runding nuan.’ ³⁸ To pesan ti ke terubah sereta pemadu besai. ³⁹ Lalu pesan ti ke dua nya sebaka enggau nya: ‘Rindu ka pangan nuan baka nuan ke rindu ka diri empu.’ ⁴⁰ Semua Adat enggau ajar sida nabi beduduk ba pesan dua ite to.” ⁴¹ Leboh urang Farisi begempuru, Yesus nanya sida, ko Iya, ⁴² “Baka ni ko penemu kita pasal Kristus? Peturun sapa Iya nya?” Sida alu nyaut, “Peturun Daud.” ⁴³ Iya alu nanya sida, “Enti pia, baka ni ko Daud, ari iring Roh Kudus, ngumbai Kristus ‘Tuan’? Laban Daud empu nyebut, ⁴⁴ ‘Ko Tuhan bejako enggau Tuan aku: Duduk muak ari kanan Aku datai ke Aku udah ngengkah ka bala munsuh Nuan di baroh kaki Nuan.’? ⁴⁵ Enti Daud ngumbai Iya ‘Tuhan,’ baka ni ko Iya tao nyadi peturun Daud?” ⁴⁶ Nadai siko pan urang tesaut ka Iya, lalu kenyau ari nya, nadai age urang berani betanya ka utai ngagai Iya.