¹ Leboh Yesus enggau sida murid Iya nyau datai semak Yerusalem, alu udah datai di Betfage ba Bukit Zaitun, Yesus bejako enggau dua iko murid Iya. ² Ko Iya, “Alai seduai mupuk ngagai kampung ti di mua nyin. Din seduai deka nemu siko keledai ditancang, enggau anak iya ngimbai iya. Buka tali jelu dua iko nya, alu bai seduai iya ngagai Aku. ³ Enti urang bisi bejako ngagai seduai, sebut aja munyi to, ‘Tuhan beguna ka seduai iya.’ Lalu iya deka ngasoh seduai mai jelu nya tekala nya.” ⁴ Utai to nyadi kena ngamat ka jako ti udah disebut Tuhan beseruan ka siko nabi: ⁵ “Padah ka ngagai anak indu Sion, Peda kita, Raja kita datai ngagai kita. Iya baruh ati, alu nepan keledai enggau nepan keledai ti age biak, ti anak keledai.” ⁶ Murid ke dua iko nya mupuk, alu ngereja utai ti diasoh Yesus. ⁷ Seduai iya mai keledai enggau anak keledai nya, alu ngelempai ka labong seduai iya ba belakang keledai dua iko nya, alu Yesus nepan ba jelu nya. ⁸ Mayoh amat urang ngancau labung sida ba jalai raya, alu sida ti bukai nyarau dan kayu alu ngancau dan kayu ba jalai raya nya. ⁹ Lalu bala urang ke bejalai dulu ari Iya enggau ke ngentudi ka Iya manjung: “Hosana ke Anak Daud! Beberekat meh Iya ke datai alam nama Tuhan! Hosana ba surga ti pemadu tinggi!” ¹⁰ Lalu leboh Iya tama ngagai Yerusalem, semua urang alam nengeri nya begau magang. Ko sida nanya, “Sapa urang nya?” ¹¹ Lalu ko urang mayoh nyaut, “Iya nya nabi Yesus ke datai ari Nazaret di menua Galilea.” ¹² Udah nya Yesus tama ngagai Rumah Sembayang alu muru semua urang ke bejual-bebeli dalam Rumah Sembayang nya. Iya nungkup ka mija urang ke penukar wang, enggau bangku urang ke nyual burung acang. ¹³ Ko Iya bejako ngagai sida, “Endang udah dituleh, ‘Rumah Aku deka dikumbai rumah sembayang.’ Tang kita ngaga iya nyadi sarang perumpak!” ¹⁴ Urang ke buta, enggau urang ke kait-kupit datai ngagai Iya alam Rumah Sembayang, alu Iya ngerai ka sida. ¹⁵ Tang leboh sida tuai imam enggau sida pengajar Adat meda utai ti badas ti di kereja Iya, sereta meda bala anak mit manjung alam Rumah Sembayang, “Hosana ke Anak Daud!” sida pedih ati alu bejako ngagai Iya, ¹⁶ “Kati Nuan bisi ninga utai ti disebut sida?” Yesus alu nyaut sida, “Bisi. Kati kita nadai udah kala maca: ‘Nuan udah ngasoh pantun puji ti pemadu badas pansut ari mulut bala anak mit, enggau anak mit ke benung nusu.’?” ¹⁷ Yesus ninggal ka sida, pansut ari nengri nya, mansang ngagai Betania, alu bemalam dia. ¹⁸ Leboh Iya mulai ka Diri ngagai nengeri tumu pagi hari siti, Iya lapar. ¹⁹ Iya tepeda ka sepun kayu ara ba tisi jalai. Iya alu mansang ngagai kayu nya. Tang Iya nadai nemu utai dia, semina daun aja. Lalu ko Iya bejako ngagai kayu nya, “Awak ka nuan enda agi bebuah!” Kayu ara nya alu layu tekala nya. ²⁰ Leboh sida murid meda nya, sida balat alit ati. Ko sida, “Baka ni ko kayu ara nya tau layu tekala nya?” ²¹ Lalu ko Yesus nyaut sida, “Enggau bendar Aku madah ngagai kita, enti kita arap alu enda kakang ati, kita uleh ngereja utai ti udah di kereja Aku ngagai kayu ara to. Lalu ukai semina nya aja, tang kita uleh bejako ngagai bukit to, ‘Angkat nuan alu buai diri empu ngagai tasik,’ alu utai nya deka nyadi. ²² Enti kita arap, kita deka nerima sebarang utai ti dipinta kita dalam sampi.” ²³ Leboh Yesus tama ngagai Rumah Sembayang, sida tuai imam, enggau sida tuai bansa Yahudi datai ngagai Iya leboh Iya benung ngajar, alu nanya Iya, “Kuasa nama kena Nuan ngereja utai to, alu sapa meri Nuan kuasa nya?” ²⁴ Disaut Yesus, “Aku pan deka mega nanya kita site tanya. Enti kita tesaut ka Aku, nya baru Aku deka madah ngagai kita kuasa ti di kena Aku ngereja utai to. ²⁵ Kati baptisan Yohanes datai ari surga tao ka ari mensia?” Sida alu bekelikuh enggau pangan diri. Ko sida, “Enti kitai nyebut, ‘Ari surga,’ Iya deka nyebut ngagai kitai, ‘Enti pia, nama kebuah kita enda arap ka Yohanes?’ ²⁶ Tang enti kitai nyebut, ‘Ari mensia,’ kitai takut ka urang mayoh, laban semua sida ngumbai Yohanes nabi.” ²⁷ Nya alai sida alu nyaut Yesus, “Enda kami nemu.” Lalu ko Iya bejako enggau sida, “Aku pan enggai meh madah ngagai kita kuasa ti di kena Aku ngereja utai to.” ²⁸ “Baka ni ko runding kita? Urang siko bisi dua iko anak lelaki. Iya mansang ngagai anak iya ke tuai, alu bejako, ‘Anak, alai nuan krja ba kebun anggur sari to.’ ²⁹ Alu ko anak tuai iya nyaut, 'au, Apai,' tang iya enda nurun kerja. ³⁰ Udah nya apai iya mansang ngagai anak iya ke biak agi, alu bejako munyi nya mega enggau iya. alu ko iya nyaut, 'Enggai.' Tang udah nya, iya ngubah runding diri, alu nurun kerja ³¹ Ni bagi seduai nya ke ngereja utai ti di kedekaka apai seduai iya?” “Iya ke dudi,” ko sida nyaut. Yesus alu bejako ngagai sida, “Enggau bendar Aku madah ngagai kita, bala pengumpul cukai enggau bala indu sundal deka tama dulu age ari kita ke dalam Perintah Allah Taala. ³² Laban Yohanes Pemaptis udah datai ngagai kita nunjuk ka jalai ngagai pengelurus, alu kita enda arap ka iya, tang sida pengumpul cukai enggau bala indu sundal arap ka iya. Indah leboh kita meda utai nya nyadi deh kita enda nesal ati ke dosa kita alu arap ka iya. ³³ “Pending ka jako sempama site to. Urang siko bisi sebidang tanah. Iya numbuh ka kebun anggur ba tanah nya, niri ka pagar ngelingi kebun nya, numbak lubang endur ngaga pitan anggur, alu ngaga sebuah menara. Udah nya iya nyiwa kebun anggur nya ngagai urang, alu bejalai ngagai menua bukai. ³⁴ Leboh maya ngetau, iya ngasoh bala kuli iya mansang ngagai urang ke nyiwa kebun anggur nya, deka ngambi buah. ³⁵ Bala urang ke nyiwa kebun nya alu nangkap bala kuli iya, malo siko, munuh siko, alu nuko siko ti bukai ngena batu. ³⁶ Urang nya alu ngasoh mayoh age kuli iya ti bukai mansang ngagai kebun nya. Bala urang ke nyiwa kebun nya alu ngereja ngagai sida baka ti udah di kereja sida ngagai bala kuli ke dulu. ³⁷ Udah nya iya ngasoh anak laki iya empu, ko iya, ‘Sida tentu deka bebasa ka anak laki aku.’ ³⁸ Tang leboh bala urang ke nyiwa kebun anggur nya meda anak lelaki iya datai, sida alu bejako enggau pangan diri, ‘To urang ke bempu waris. Aram kitai munoh iya alu ngerampas pesaka iya!’ ³⁹ Nya alai sida nangkap anak iya, muai iya ari kebun anggur nya, alu munoh iya. ⁴⁰ “Nya alai leboh urang ke bempu kebun anggur nya datai, nama utai ti deka di kereja iya ngagai urang ke nyiwa kebun anggur nya?” ⁴¹ Disaut sida, “Iya deka munoh urang ke jai nya, alu ngasoh urang bukai nyiwa kebun nya, iya nya urang ke deka meri iya buah leboh maya ngetau.” ⁴² Ko Yesus bejako enggau sida, “Kati kita nadai udah kala maca dalam Kitab Suci: ‘Batu ti enda diguna tukang rumah udah nyadi batu ti pemadu beguna. To utai ti udah dikereja Tuhan, alu ba mata kami, utai nya badas’? ⁴³ Nya alai, Aku madah ngagai kita, Perintah Allah Taala deka di ambi ari kita, alu diberi ngagai urang ke deka mansut ka buah Perintah nya. ⁴⁴ Urang ke laboh ninggang batu nya, deka redak, alu iya deka ngeredak ka urang ke laboh ninggang iya.” ⁴⁵ Leboh sida tuai imam enggau urang Farisi ninga jako sempama Yesus, sida nemu Iya bejako ka pasal sida. ⁴⁶ Sida bisi amat ati deka nangkap Iya, tang sida takut ka urang mayoh laban sida ngumbai Yesus nabi.