¹ Bung wantaim na toktok namel long yupela yet, yupela ol kantri i no save sem long pasin nogut bilong yupela- ² bipo long ol dispela tok i kamap tru na dispela ol samting i kam na i go olsem win i sakim skin bilong wit i go, bipo long belhat nogut bilong God Yawe i pundaun antap long yupela, bipo long dei bilong bikpela belhat bilong God Yawe i kam long yupela. ³ Painim God Yawe, yupela ol manmeri bilong graun husat i save daunim yupela yet na i save bihainim olgeta lo bilong em! Painim stretpela pasin. Painim pasin bilong daunim yupela yet na yupela bai i stap gut long dei bilong belhat bilong God Yawe. ⁴ Long wanem Gasa bai i nogat man i stap na Askelon bai i bagarap olgeta. Ol bai i rausim i go aut Asdot long taim san i stap antap yet na ol bai i pulim na kamautim Ekron! ⁵ Sori long ol manmeri i save stap arere long nambis, em kantri bilong ol Keret! God Yawe tu i bin toktok planti long yu, Kenan, graun bilong ol Pilistia. Bai mi bagarapim yu i go inap long taim nogat wanpela i stap. ⁶ Olsem na nambis bai i kamap gutpela hap graun bilong ol wasman bilong sipsip na hap bilong ol sipsip i ken stap long en. ⁷ Ol liklik lain bilong Juda i stap yet bai i kisim na bosim olgeta graun i raunim nambis, em ol lain husat bai i lukautim sipsip bilong ol long hap. Long apinun ol manmeri bilong ol bai i sindaun long ol haus bilong Askelon, long wanem God Yawe God bilong ol bai i lukautim ol na givim bek ken ol planti gutpela samting ol i bin lusim. ⁸ ''Mi bin harim ol Moap i tok pilai na ol Amon i mekim ol tok i no tru taim ol i tok pilai long ol manmeri bilong mi na surikim mak bilong ol. ⁹ Olsem na taim mi stap yet- dispela em tok bilong God Yawe, God bilong Israel i stap antap- Moap bai i kamap olsem Sodom na ol manmeri bilong Amon bai i olsem ol Gomora, ples nogut bilong pilim pen na olsem bikpela hul i go daun tru na bai i stap ples nating oltaim. Tasol ol liklik hap lain bilong mi i stap yet long kantri bilong mi bai i kisim bek olgeta samting bilong ol.'' ¹⁰ Dispela bai i kamap long Moap na Amon, long wanem ol i hapim ol yet na ol i bin tok pilai na daunim ol manmeri bilong God Yawe em God Yawe i gat olgeta strong. ¹¹ Olsem na bai ol i pret long God Yawe, long wanem em bai i tok pilai na lap long olgeta giaman god bilong dispela graun. Olgeta manmeri long narapela hap na manmeri long ples em i stap long en na long hap graun i go pinis long en, arere bilong nambis ol bai lotu long em. ¹² Bai mi katim yupela ol lain Kus tu wantaim bainat bilong mi, ¹³ na God bai pait long ol lain long hap not na bagarapim Asiria long han bilong em. Long dispela as bai Ninive i kamap olsem ples drai nating. ¹⁴ Na ol abus i save kaikai gras bai i stap long hap na tu olgeta abus bilong ol kantri. Aul bilong ples nating na aul i save singaut planti, tupela bai i malolo na i stap antap long tawa. Ol bai i singsing na nois bilong ol bai i kam autsait long ol windua. Ol samting i bagarap, bai i stap long ol dua na ol piksa ol i bin katim long diwai sida bai i kamap ples klia. ¹⁵ Dispela biktaun i save amamas tru na em i no save pret, em i tok olsem long bel bilong em, ''Em Mi tasol, nogat wanpela i olsem Mi.'' Long wanem rot em i kamap ples nogut bilong ol abus i stap long en. Olgeta lain i kam i go arere bai ol i lukluk wantaim belhat na soim han bilong ol long em.