¹ Tok bilong God Yawe i gat bikpela strong i kam long mi i tok olsem. ² "God Yawe i gat bikpela strong i tok, mi gat stronpela tingting long Saion wantaim bikpela amamas na mi gat strongpela tingting long em wantaim bikpela belhat! ³ God Yawe i gat olgeta strong i tok olsem: Mi bai go bek long Saion na bai mi stap insait namel long Jerusalem, bilong wanem ol bai i kolim Jerusalem olsem Biktaun bilong Toktru na maunten bilong God Yawe, ol i kolim Maunten i Holi! ⁴ God Yawe i gat bikpela strong i tok olsem, ol lapun man na ol lapun meri bai wanpela taim gen istap insait long ol rot bilong Jerusalem na olgeta manmeri bai holim stik long han bilong ol long wanem em i kamap lapun pinis. ⁵ Ol pikinini man na meri bai i pulap na pilaipilai insait long ol rot bilong biktaun. ⁶ God Yawe i gat bikpela strong i tok olsem: Taim sampela samting i hat long ai bilong ol dispela liklik hap manmeri bilong dispela taim, orait em bai i no inap hat tumas long ai bilong mi a? God Yawe i tok olsem. ⁷ God Yawe i tok olsem: Lukim, mi laik kisim bek ol manmeri bilong mi long graun bilong hap we san i kamap na long graun bilong hap we san i go daun. ⁸ Bilong wanem mi bai kisim ol i kam bek gen na ol bai i stap insait namel long Jerusalem, ol bai i kamap ol lain manmeri bilong mi yet na Mi bai i kamap God bilong ol insait long stretpela na trupela pasin. ⁹ God Yawe i gat olgeta strong i tok olsem, yupela husait nau i wok long harim ol wankain tok i kam long maus bilong profet taim ol i stat long wokim as pos bilong haus, dispela haus bilong mi, God Yawe bai i givim strong long yu long wokim haus lotu. ¹⁰ Long ol dispela taim ol manmeri i no bin bungim ol kaikai, olsem na ol i no bin i gat hap kaikai bilong man wantaim ol wel abus na i no bin i gat bel isi wantaim ol birua husat i go o i kam. Mi mekim ol i stap birua wantaim ol wantok bilong ol yet. ¹¹ Tasol nau dispela taim bai ino wankain olsem pastaim ol i bin i stap, Mi bai stap wantaim ol dispela liklik hap manmeri, dispela em stronpela tok bilong God Yawe i gat olgeta strong. ¹² Olsem na pasin bilong bel isi bai i kamap na ol wain bai i karim pikinini kaikai bilong en na graun bai i givim kaikai em i kamapim na ol liklik ren bai i pundaun long skai, Mi yet bai i mekim ol liklik lain manmeri i kisim ol dispela samting. ¹³ Yupela i stap olsem piksa i go long ol narapela kantri i stap insait long bikpela bagarap, ol lain bilong Juda na lain bilong Israel. Olsem na bai mi kisim bek yupela na yupela bai i kamap olsem blesin. Yupela i noken pret; larim han bilong yupela i ken stap strong! ¹⁴ God Yawe i gat olgeta strong i tok olsem, Olsem tasol Mi i gat bikpela tingting long bararapim yupela taim ol lain tumbuna bilong yupela i mekim mi belhat, God Yawe i gat olgeta strong i tok na i no hariap long mekim wanpela samting, ¹⁵ na tu bai mi tingting long ol dispela dei i kam long mekim gut long Jerusalem gen na ol lain bilong Juda, olsem na yupela i noken pret, ¹⁶ Dispela em ol samting yupela i mas mekim: olgeta manmeri na ol lain i stap klostu long ol i mas tok tru tasol. Skelim wantaim trupela tingting na tok tru na kamapim bel isi long haus dua bilong yu. ¹⁷ Yupela i noken i gat tingting nogut long bagarapim narapela manmeri i stap klostu long yupela na noken laikim giaman tok promis bilong wanem em ol dispela samting mi no save laikim! God Yawe i tok olsem." ¹⁸ Nau tok bilong God Yawe i gat olgeta strong i kam long mi i tok olsem, ¹⁹ "God Yawe i gat olgeta strong i tok:Yupela i bin lusim kaikai long 4 mun, 5 mun, 7 mun na namba 10 mun bai i kamap taim bilong singsing na amamas, long ol lain bilong Juda! Olsem na laikim tok tru na stretpela pasin. ²⁰ God Yawe i gat olgeta strong i tok olsem, ol manmeri bai i kam bek gen na tu ol manmeri husait i stap long ol kainkain biktaun. ²¹ Ol lain bilong wanpela biktaun bai i go long narapela biktaun na i tok, 'Kam yumi i go hariap long askim samting long God Yawe na painim God Yawe i gat olgeta strong! Yumi yet tu bai i go.' ²² Planti manmeri na ol strongpela kantri tu bai ol i kam long painim God Yawe i gat olgeta strong insait long Jerusalem na ol bai i askim God Yawe long marimari long ol! ²³ God Yawe i gat olgeta strong i tok olsem, insait long ol dispela dei, 10-pela man bilong wanwan tokples na kantri bai holim hap klos bilong yu na tok, 'Larim mipela i go wantaim yupela, bilong wanem mipela i harim olsem God i stap wantaim yupela!"