¹ Stori bilong Nehemaia pikinini bilong Akalia em i raitim. Long mun bilong kislev, long namba 20 yia, mi stap long taun i gat strongpela banis long Susa, ² Hanani wanpela brata bilong mi i kam wantaim sampela man bilong Juda na mi askim ol long ol Juda i bin ranawe long kalabus ol i stap gut o nogat. Na Jerusalem tu i stap gut o nogat. ³ Ol i tokim mi olsem, ''Ol lain i stap yet i gat bikpela hevi na ol i no i stap gut, long wanem banis bilong Jerusalem i bruk na i op i stap na ol i kukim ol dua bilong banis pinis.'' ⁴ Taim mi harim ol dispela tok, mi sindaun na krai na bel hevi, long sampela dei mi tambu long kaikai na beten long God bilong heven. ⁵ Nau mi tok olsem, ''Yu God Yawe, God bilong heven, Yu God bikpela tru, yu save mekim kontrak na laikim ol lain i save laikim yu na bihainim ol tok bilong yu. ⁶ Harim beten bilong mi na lukim mi wokman bilong yu, long dei na nait mi beten long ol manmeri bilong Israel em ol wokman bilong yu. Mi tokaut stret long ol sin bilong ol manmeri bilong Israel. Mipela i bin mekim sin long yu. Mi wantaim ol lain bilong mi i mekim sin pinis. ⁷ Mipela i mekim pasin nogut tru long yu, mipela i no bihainim ol tok na lo yu givim wokman bilong yu Moses. ⁸ Yu tingim ol tok yu bin givim long wokman bilong yu Moses, ''Sapos yupela i givim baksait long mi, bai mi rausim yupela i go nambaut namel long olgeta ples, ⁹ Sapos yupela i kam bek long mi na bihainim ol tok bilong mi, maski mi rausim yupela i go nambaut longwe tru, bai mi kisim yupela na bringim yupela i kam long dispela ples mi bin makim long nem bilong mi bai i stap long en.'' ¹⁰ Em ol wokman bilong yu na ol manmeri bilong yu. Yu bin kisim bek ol long bikpela strong na pawa bilong han bilong yu. ¹¹ God Yawe, mi laik bai yu harim beten bilong mi wantaim ol wokman bilong yu, ol i save amamas long litimapim nem bilong yu. Nau yu helpim mi na marimari long mi long taim mi go lukim king.