¹ Sori long dispela biktaun i pulap wantaim blut! Em i pulap wantaim tok giaman na ol stil samting, ol man i stap wantaim dispela pasin long dispela ples. ² Tasol nau i gat nois billong ol wip i pairap na nois i kamap long wil bilong karis wantaim lek bilong hos i pairap na nois bilong karis i ran i go. ³ Long hap i gat ol man bilong sindaun long hos i ran i kam na bainat bilong ol na spia bilong ol i lait olsem glas, ol i pait na kilim i dai planti man, namba bilong ol man i planti na i no inap long kaunim, ol birua i kilim olgeta na krungutim ol nambaut. ⁴ Dispela i kamap long wanem ol i bihainim pasin bilong bel kirap long mekim sin wantaim ol pamuk meri, em i save gut tru long mekim posin na em i salim em yet long dispela pasin pamuk bilong em na olgeta lain manmeri bilong kantri i bihainim dispela pasin bilong em. ⁵ "Lukim, mi no wanbel wantaim yu, dispela em God Yaweh i tok, mi bai rausim sket bilong yu na karamapim pes bilong yu na bai yu stap as nating na olgeta lain manmeri long kantri bai i lukim as nating bilong yu. ⁶ Bai mi tromoi, smel samting long yu na mekim yu i kamap doti na bai mi mekim yu olsem narapela lain na olgeta lain bai i lukim yu. ⁷ Em bai kam long yu olsem olgeta lain manmeri husat i lukim yu bai ranawe long yu na tok, Ninive em i bagarap na husait bai sori na krai long en?' Bai mi painim husait long strongim yu?" ⁸ Ninive, yu ting yu bikpela moa long biktaun Tebes, ol i wokim antap long Wara Nail olsem solwara i raunim em na kamap olsem banis bilong em? ⁹ Kes na Isip i stap strong bilong en na em i bosim ol na ol i no bruk nambaut, Put na Libia i bin poromanim em na stap wantaim em. ¹⁰ Tasol ol birua i winim Tebes na kisim ol i go long mekim wok kalabus. Ol i paitim ol pikinini bilong ol na kilim ol i dai long olgeta rot bum. Ol i pasim ol bikman na strongpela man bilong Tebes long ol sen. Na ol i pilai dais long makim ol na tilim long ol yet na kisim ol i go olsem wok boi nating. ¹¹ Yu bai kamap olsem ol man i spak na bai yu traim long hait na bai yu painim hap bilong stap gut longwe long birua bilong yu. ¹² Olgeta banis bilong yu bai i olsem diwai fik i mao na redi long pikim, sapos em i seksek em bai i pundaun na ol man bai i kisim long kaikai. ¹³ Lukim, ol man i stap wantaim yu em ol meri, ol birua i raunim yu na yu i stap ples klia olsem dua bilong banis i raunim graun bilong yu, paia i kukim olgeta banis i raunim ol. ¹⁴ Go kisim wara bilong dring i kam na redim ol pait samting bilong yupela, go kisim retpela graun na krungutim na mekim em i kamap malomalo na wokim brik bilong strongim banis bilong yupela. ¹⁵ Paia bai bagarapim yu long hap na ol bainat bai katim yu na bagarapim yu. Em bai bagarapim yu olsem yangpela grasopa i bagarapim olgeta samting. Yu i mas mekim yu yet planti olsem yangpela grasopa na bikpela grasopa. ¹⁶ Yu kamapim planti bisnis man bilong yu olsem sta i stap antap long skai, tasol ol i olsem yangpela grasopa i save bagarapim graun na plai i go. ¹⁷ Ol pikinini man bilong king i planti olsem ol bikpela grasopa na bikman bilong yu i olsem bikpela namba i bung long banis long taim bilong kol.Tasol taim san i kamap ol bai plai i go long ples nogat man i save long en. ¹⁸ King bilong Asiria, ol wasman bilong yu ol i slip, ol hetman i save go pas long yu ol i slip yet, ol manmeri bilong yu ol i stap nambaut long ol maunten na i nogat wanpela man long bungim ol. ¹⁹ I nogat wanpela marasin long mekim sua bilong yu i drai. Sua bilong yu bai i no inap pinis hariap. Olgeta lain manmeri long olgeta hap husait i harim stori bilong yu ol bai paitim han bilong ol na hamamas long yu. Husait bai ranawe long dispela strongpela sin bilong yu?