¹ Em i tok bilong biktaun Ninive. Dispela buk i tok long driman bilong Nahum bilong Elkos. ² God Yawe i no inap larim ol man i lotu long ol god giaman na God Yawe i save belhat na bekim pei nogut long ol birua bilong em. ³ God Yawe i gat bikpela strong na i no save belhat hariap. Em i save mekim save long ol man i mekim asua. God Yawe, i save wokabaut insait long bikpela raun win na ren. Klaut i olsem das aninit long lek bilong em. ⁴ Em i kros long solwara na i drai, na em i mekim olgeta wara tu i drai. Basan wantaim Kamel i no gat strong na ol plaua bilong Lebanon tu i dai. ⁵ Ol maunten i save guria long strong bilong em na ol liklik maunten i save kamap olsem wara, graun na olgeta manmeri i save guria nogut tru long strong bilong em. ⁶ Husait inap sanap i stap long taim em i belhat? Husait inap long pasim strongpela belhat bilong em? Belhat bilong em i olsem paia i lait na ol ston i bruk nambaut. ⁷ God Yawe i save mekim gutpela pasin tru, Em i olsem strongpela banis tru na ol man i kam long em long taim bilong hevi, oltaim em i save mekim gut long ol. ⁸ Tasol em bai bagarapim tru birua bilong em olsem bikpela wara i tait na em bai kilim ol i dai. ⁹ Yupela ol manmeri i pasim tok long mekim wanem long God Yawe? Em bai pinisim yupela olgeta na yupela i no inap kamapim hevi namba tu taim gen. ¹⁰ Ol nil gras i raunim ol na kamap olsem bia bilong spakman na paia bai kukim ol olgeta olsem gras i drai pinis. ¹¹ Ninive, wanpela man namel long yu i gat tingting nogut bilong strongim pasin nogut na i laik mekim nogut long God Yawe. ¹² Tasol God Yawe i tok olsem, ''Maski ol i gat bikpela strong na bikpela lain i stap, mi bai katim ol na ol bai i no inap i stap moa. Mi bin givim hevi long Juda tasol mi no inap mekim moa. ¹³ Nau bai mi rausim ol hap plang i stap long yupela na bai mi brukim sen i kalabusim yupela.'' ¹⁴ God Yawe i givim strongpela tok long yu, Ninive. ''Bai i nogat ol lain tumbuna bilong yupela i stap moa. Mi bai rausim ol giaman god i stap long ol haus lotu bilong yupela. Mi bai wokim ol matmat bilong yupela, long wanem yupela i save daunim nem bilong mi.'' ¹⁵ Lukim, antap long ol maunten lek bilong wanpela man i bringim gutnius i kam na tokaut olsem pait i pinis. Juda, yupela amamas long ol bikpela dei bilong yupela na givim ol samting yupela i promis long God, ol lain nogut bilong kisim graun bilong yupela i no stap moa na i pinis olgeta.