¹ Long de namba 8 Moses i singautim Aron na ol pikinini bilong em wantaim ol hetman bilong ol Israel long kam bung. ² Taim ol i bung pinis, orait Moses i tokim Aron olsem, "Kisim wanpela yanpela bulmakau man bilong mekim ofa bilong rausim sin na wanpela yanpela sipsip i no gat mak na sua samting i bagarapim skin bilong en, long mekim ofa bilong kukim olgeta na mekim olsem long God Yawe. ³ Yu mas tokim ol manmeri bilong Israel olsem, ' Kisim wanpela meme man bilong mekim ofa bilong rausim sin na wanpela bulmakau man na wanpela sipsip, tupela i winim wanpela krismas na i no gat mak na sua samting i bagarapim skin bilong ol, long mekim ofa bilong kukim olgeta; ⁴ na yu mas kisim wanpela bulmakau man na yanpela sipsip man bilong mekim ofa bilong kamap wanbel wantaim God Yawe na ofa bilong kukim wit ol i miksim wantaim oliv wel, bilong wanem God Yawe bai kamap long yupela nau. ⁵ Olsem na olgeta manmeri i karim olgeta samting Moses i bin tokim ol long kisim i kam long haus sel na olgeta Israel i kam bung na sanap long lotu long God Yawe. ⁶ Orait Moses i tok, dispela em wanem God Yawe i tokim yupela long mekim olsem, bai glori bilong Bikpela i kamap long yupela." ⁷ Moses i tokim Aron, kam klostu long alta na givim ofa bilong rausim sin na ofa bilong kukim olgeta na mekim ofa bilong rausim sin bilong yu yet pastaim na bilong ol narapela, olsem God Yawe i bin tok". ⁸ Olsem na Aron i go klostu long alta na i kilim yangpela bulmakau man, bilong mekim ofa bilong rausim sin bilong em yet. ⁹ Ol pikinini bilong Aron i kisim blut bilong abus i kam long em na Aron i putim pinga insait long blut na i tromoi nambaut long ol kom bilong alta na kapsaitim blut long as bilong alta. ¹⁰ Bihain, Aron i kukim gris na tupela bilum pispis na skin samting i karamapim lewa long alta olsem ofa bilong rausim sin olsem God Yawe i bin tokim Moses. ¹¹ Na em i kukim olgeta mit na skin long paia i stap autsait long kemp. ¹² Aron i pinisim dispela ofa, orait bihain em i kukim paia bilong pinisim olgeta na ol pikinini bilong em i givim blut long kapsaitim wantaim long olgeta hap arere bilong alta. ¹³ Na bihain ol i givim em ofa bilong kukim olgeta, ol liklik hap hap i stap yet wantaim het. Aron i kukim olgeta long alta. ¹⁴ Aron i wasim olgeta insait bel samting na lek na kukim antap long alta paia bai i kukim olgeta. ¹⁵ Bihain Aron i kisim ol ofa bilong manmeri na ofarim long Bikpela. Em i kisim wanpela meme ol manmeri i bringim na kilim i dai na mekim ofa bilong rausim sin bilong ol, olsem bipo em i bin mekim long namba wan meme. ¹⁶ Aron i kisim ofa bilong kukim na ofarim olsem bipo God Yawe i bin tokim em. ¹⁷ Na em i kisim plaua na mekim ofa bilong kukim wit. Em i kisim liklik hap plaua long han na i kukim plaua long alta wantaim dispela ofa bilong paia i kukim olgeta olsem long moning taim em i bin mekim. ¹⁸ Em i kilim tu bulmakau na sipsip na bringim bilong mekim wanbel ofa bilong ol manmeri. Ol pikinini bilong Aron i givim blut bilong abus long tromoi wantaim i go long olgeta sait bilong alta. ¹⁹ Orait bihain ol i katim gris bilong bikpela fatpela bulmakau na yangpela sipsip we gris i pas long teil na i karamapim insait hap bodi bilong en na tupela bilum pispis na ol bodi samting i karamapim lewa. ²⁰ Ol i kisim hap bodi ol i bin katim pinis na putim antap long bros na bihain Aron i kukim gris antap long alta. ²¹ Aron i holim bros na lek long han sut na apim i go i kam long ai bilong Bikpela olsem ofa bilong givim em yet long Bikpela, olsem bipo God Yawe i bin tokim Moses. ²² Aron i mekim ol dispela bilong rausin sin na kukim long paia long mekim ofa belong wanbel pinis. Orait em i litimapim tupela han bilong em long ol manmeri na i tokim ol olsem, God bai i mekim gut long ol na em i lusim dispela ples na i kam daun. ²³ Moses na Aron igo insait long haus sel, bihain tupela i kam autsait gen na i tokim ol manmeri bai God i mekim gut long ol na bikpela glori bilong God i kamap ples klia long ol. ²⁴ God Yawe i salim strongpela paia i kam daun na i kukim na pinisim tru olgeta gris na ol abus ol i bin ofaim long alta. Taim olgeta manmeri i lukim dispela, ol i singaut strong na daunim ol yet na putim pes i go daun.