¹ Bikpela i karamapim pikinini meri bilong Saion aninit long klaut bilong belhat bilong em. Em i tromoi pinis gutpela lait bilong ol Israel long heven i kam daun long graun. Em i no tingim ples em i save putim lek bilong em long dispela dei bilong belhat. ² Bikpela i bagarapim olgeta samting na em i nogat bel sori long olgeta taun bilong Jekop. Long dispela dei belhat bilong em i go moa na em i bagarapim biktaun bilong pikinini meri bilong Juda, long pasin bilong i no onarim em, em i kam daun long graun wantaim kingdom na strong bilong em. ³ Wantaim belhat em i rausim olgeta strong bilong Israel. Em i rausim hansut bilong em long ol birua. Em i kukim Jekob olsem bikpela lait bilong paia na bagarapim olgeta samting klostu long em. ⁴ Wankain olsem birua i taitim bunara bilong em na i kam klostu long yumi, wantaim hansut bilong em, em i redi long sutim spia. Em i kilim olgeta husait i bin amamas long em insait long sel haus bilong pikinini meri bilong Saion, em i kapsaitim belhat bilong em olsem paia. ⁵ Bikpela i kamap olsem birua. Em i daunim Israel, em i daunim olgeta haus bilong en. Em i bagarapim strongpela banis em i save hait long en. Em i mekim planti manmeri i sori na krai namel long pikinini meri bilong Juda. ⁶ Em i raunim haus lotu bilong em olsem wanpela gaden haus. Na em i bagarapim olgeta bikpela ples bilong bung. God Yawe i kamapim tupela samting bilong ol i ken lusim tingting long Saion, em bung bilong mekim promis na dei Sabat, em i belhat nogut tru long king na pris long wanem em i les long ol. ⁷ Bikpela i givim baksait long alta bilong em na em i no laik long ol samting bilong em i stap insait. Em i givim olgeta samting i go long han bilong ol birua. Ol i sanap na singaut insait long haus bilong God Yawe, olsem dispela taim ol i bin makim long mekim bikpela pati. ⁸ God Yawe i tingting long bagarapim banis bilong biktaun bilong pikinini meri bilong Saion. Em i opim han bilong em na makim i go long bagarapim bikpela banis. Em i mekim strongpela banis i seksek na olgeta yet i pundaun. ⁹ Bikpela dua bilong banis tu i pundaun i go insait long graun, em i bagarapim na brukim olgeta pos bilong bikpela dua bilong em. Ol king bilong em wantaim ol pikinini man bilong king tu i stap namel long ol dispela kantri na lo i no moa stap olsem na ol profet i no lukim driman i kam long God Yawe. ¹⁰ Na ol nambawan pikinini meri bilong Saion i nogat toktok na ol i sindaun long graun .Ol i tromoi das long het bilong ol na ol i werim klos bilong soim sori. Ol yangpela meri bilong Jarusalem i putim het bilong ol i go daun long graun. ¹¹ Olsem na ai bilong mi i pulap long aiwara na bel bilong mi i pulap long sori na mi wari tru long wanem samting pikinini meri i bin wokim long ol manmeri na ol liklik pikinini i airaun na pundaun insait long ol liklik rot bilong biktaun . ¹² Taim ol i pundaun long ol liklik rot bilong biktaun olsem ol man i gat sik na nogat strong, ol i tokim mama bilong ol olsem," Wit na wain i stap we?" Laip bilong ol i kapsait olsem mama i givim susu long liklik pikinini. ¹³ Bai mi tok wanem long yu, pikinini meri bilong Jarusalem? Long wanem samting bai mi skelim wankain long mekim gut long yu, yangpela pikinini meri bilong Saion? Sua bilong yu i bikpela olsem solwara. Husait inap oraitim yu?. ¹⁴ Ol profet bilong yu i lukim giaman driman long yu. Ol i no inap putim ol hait sin bilong yupela i kam aut ples klia na inapim gutpela bilong yu, tasol long yu ol bai mekim giaman tok na i no inap kisim ol i go stret. ¹⁵ Ol dispela lain husait i go pas long rot ol i paitim han bilong ol long yu. Ol i singaut na tanim het bilong ol long pikinini meri bilong Jarusalem na i tok, "Dispela em biktaun ol i bin kolim 'Bilas i Gutpela tru na Amamas bilong Olgeta hap bilong Graun?" ¹⁶ Olgeta birua bilong yu i opim maus bilong ol na tok bek long yu. Ol i kaikai tit bilong ol na i tok, "Mipela i daunim em pinis! Em dispela dei mipela i wetim i stap. Mipela i bin stap yet long lukim." ¹⁷ God Yawe i mekim wanem samting em i tingim pinis long mekim. Em inapim tru tok bilong em, em i nogat sori long yu na i bagarapim yu na tokim ol birua i amamas long wanem ol i mekim long yu, em i givim moa strong long ol birua bilong yu. ¹⁸ Bel bilong ol i singaut long Bikpela, ol banis bilong pikinini meri bilong Saion. Mekim aiwara bilong yu i mas pundaun olsem wara i save rong long dei na nait. Yu noken malolo long krai na larim aiwara bilong yu i mas kam yet. ¹⁹ Kirap na singaut bikmaus long nait na long taim tudak i laik karamapim ples na ol i lukluk i stap. Kapsaitim bel bilong yu olsem wara long ai bilong Bikpela. Apim han bilong yu long em long laip bilong ol pikinini husait i hangre wantaim ol i airaun na pundaun long olgeta liklik rot. ²⁰ God Yawe, lukim ol manmeri bilong yu na sori long mipela. Inap ol meri i ken kaikai pikinini i stap insait long bel bilong ol na pikinini ol i bin lukautim long en? Inap ol pris na ol profet i stap insait long haus bilong Bikpela i ken katim ol long ai bilong Bikpela? ²¹ Olgeta yangpela na ol lapun i pundaun long das bilong ol liklik rot. Ol yangpela man na ol yangpela meri bilong mi, yu bin kilim ol i dai na tu yu no sori long ol. ²² Yu askim em long singautim ol manmeri long dispela bikpela dei, tasol mi pret long olgeta hap long dispela taim na belhat bilong God Yawe i bagarapim olgeta manmeri na i nogat wanpela i ranawe o i stap laip. Husait mi lukautim ol, ol birua bilong mi i bagarapim tu.