¹ Olsem na ol dispela tripela man i no moa bekim tok bilong Jop long wanem em i stretpela man long ai bilong em yet. ² Na Elihu pikinini man bilong Barakel man long Busait, long famli bilong Ram, belhat bilong en i kirap olsem paia, em i kirapim paia long Jop long wanem em i kisim ples bilong God Yawe na i tok long em yet olsem em i stretpela man. ³ Belhat bilong Elihu i olsem paia i kirap long ol tripela wantok bilong en long wanem ol ino painim ansa long askim bilong Jop na ol i bin tok bagarapim Jop. ⁴ Nau Elihu i bin wait long toktok long Jop long wanem em i yangpela man na ol arapela i lapun. ⁵ Orait, taim Elihu i lukim olsem i nogat ansa long maus bilong dispela tripela man, belhat bilong en i olsem paia i kirap. ⁶ Na Elihu pikinini man bilong Barakel long Busait i kirap na i tok, "Mi yanpela man tumas na yupela i lapun man. Olsem na long dispela as mi stap bek na mi no tokim yupela tingting bilong mi. ⁷ Mi tok, "Longpela taim bilong dei i mas toktok, na planti bilong ol yia i mas skulim gutpela tingting. ⁸ Tasol i gat spirit insat long man, win bilong God Yawe i gat olgeta strong i givim em save. ⁹ I no ol bikpela manmeri tasol i gat gutpela tingting, olgeta sais manmeri husat i klia long gutpela pasin. ¹⁰ Long dispela as mi tokim yupela, Harim mi, Mi bai tokim yu long save bilong mi. ¹¹ Lukim, Mi bin wait long ol toktok bilong yu, Mi harim ol tok kros bilong yu taim yu wok long tingting long wanem samting yu bai toktok long en. ¹² Na mi harim yu, tasol, lukim, i nogat wanpela bilong yupela inap mekim Jop i wanbel o husat inap harim ol toktok bilong em. ¹³ Lukaut noken toktok, " Mipela i painim gutpela tingting!" God Yawe i ken daunim Jop, man nating i no inap mekim olsem. ¹⁴ Long wanem Jop i no bin salim tok kros bilong em long mi, olsem na mi no inap givim ansa long em wantaim ol toktok bilong yupela. ¹⁵ Dispela tripela man i guria nogut tru, ol i no inap long givim ansa long Jop, ol i nogat tok moa long toktok. ¹⁶ Inap mi wait long wanem ol i no toktok, bilong wanem ol i sanap isi tasol na ol i no bekim tok moa? ¹⁷ Nogat, Bai mi bekim ansa long sait bilong mi, Mi bai tokim ol tingting bilong mi tu. ¹⁸ Long wanem mi pulap long ol toktok, dispela spirit i stap insat long mi i kirapim mi.. ¹⁹ Lukim, susu bilong mi i olsem wain ol i brukim na i nogat rot bilong win i go aut, olsem nupela wain skin, em i redi long bruk. ²⁰ Mi bai toktok long mekim tingting bilong mi i kamap gutpela gen, Mi bai opim maus bilong mi na tokaut. ²¹ Mi i no inap soim pasin bilong laikim wanpela tasol na tu mi no inap givim biknem long ol man. ²² Long wanem mi no save long givim kain namba olsem, sapos mi mekim olsem, klostu taim bai God Yawe bilong mi bai i kisim mi go.