¹ Em i bin kamap olsem long taim, Jeremaia i tokaut pinis long olgeta manmeri long olgeta tok bilong God Yawe, God bilong ol i bin tokim em long autim. ² Asaria, pikinini man bilong Hosaia, Joanan pikinini man bilong Karia na ol man i save litimapim ol yet i tokim Jeremaia olsem, "Yu tok giaman. God Yawe, God bilong mipela i no salim yu i kam long tokim mipela olsem, 'Yupela i noken go stap long Isip. ³ Bilong wanem, Barus pikinini man bilong Neria i mekim tok giaman long putim mipela i go long han bilong ol Kaldins, long ol bai kilim mipela na i go kalabusim mipela long Babilon." ⁴ Olsem na Joanan pikinini man bilong Karia, ol kepten bilong ami long Juda na olgeta manmeri i no laik harim tok bilong God Yawe long stap long graun bilong Juda. ⁵ Joanan pikinini man bilong Karia wantaim ol kepten bilong ami i kisim olgeta liklik hap lain bilong Juda em ol i bin i go stap nabaut long ol narapela ples long kam i stap long Juda. ⁶ Ol i kisim ol manmeri, ol pikinini, ol pikinini meri bilong king na olgeta man em Nebusaradan kepten bilong ol wasman bilong king i bin lusim ol wantaim Gedalia, pikinini man bilong Aikam na pikinini bilong Sapan. Ol i kisim profet Jeremaia na Barus pikinini man bilong Neraia. ⁷ Ol i go long graun bilong Isip long Tapanes, long wanem ol i no harim tok bilong God Yawe. ⁸ Na tok bilong God Yawe i kam long Jeremaia long Tapanes olsem, ⁹ "Kisim sampela bikpela ston long han bilong yu long ai bilong ol manmeri bilong Juda na haitim aninit long simen long dua i go long haus bilong Fero long Tapanes." ¹⁰ Na tokim ol olsem,"God Yawe i gat olgeta strong, God bilong Israel i tok olsem, "Lukim, Mi laik salim ol man bilong karim toksave i go long kisim king Nebukadnesa bilong Babilon i kam stap olsem wokman bilong mi. Bai mi putim sia king bilong em antap long ol dispela ston em yu Jeremaia i bin karamapim. Na Nebukatnesa bai wokim haus bilong em antap long ol dispela ston. ¹¹ Em bai i kam pait na bagarapim graun bilong Isip. Man mi makim long i dai, em ol bai i kilim em i dai. Man mi makim long i go kalabus bai ol i kalabusim em. Man mi makim long bainat em ol bai kilim em long bainat. ¹² Orait bai mi kukim haus lotu bilong ol giaman god Iong Isip. Nebukadnesa bai kukim sampela na em bai karim sampela i go long ples bilong em. Em bai klinim graun bilong Isip olsem ol wasman bilong sipsip i save rausim ol laus long klos bilong ol. Em bai bagarapim ol tru na i go wantaim amamas. ¹³ Em bai brukim ol bikpela pos ston bilong haus i stap long Heliopolis long graun bilong Isip na kukim ol haus lotu bilong ol giaman god long Isip.