¹ Ol man bilong Israel i mekim promis long Mispa, Nogat wanpela long mipela bai givim pikinini meri bilong em i go long ol Bensamin long marit. ² Na ol manmeri i go long Betel na bung long ai bilong God na sindaun i stap i go abinun, ol i bikmaus na i krai strong tru. ³ Na ol i singaut i go, Bilong wanem God Yawe, God bilong Israel i kamapim dispela samting long ol Israel, olsem wanpela tumbuna lain bilong mipela bai i lus nau? ⁴ Long dei bihain ol manmeri i kirap long hap moning na mekim alta na givim ofa bilong paia i kukim olgeta na ofa bilong belisi. ⁵ Ol manmeri bilong Israel i tok, Wanem tumbuna lain bilong Israel i no kam antap na bung long ai bilong God Yawe? Ol i mekim strongpela promis long husait yupela i no kam antap long ai bilong God Yawe long Mispa. Ol i tok em bai i dai. ⁶ Ol manmeri bilong Israel i gat bikpela sori long brata bilong ol Bensamin. Na ol i tok, Nau yet wanpela tumbuna lain bilong Israel bai i lus olgeta. ⁷ Husait bai givim ol meri i go long ol liklik lain i stap yet, taim mipela mekim promis long ai bilong God Yawe olsem mipela i no inap larim ol i maritim pikinini meri bilong mipela? ⁸ Ol i tok, Wanem ol tumbuna lain bilong Israel i no kam antap long ai bilong God Yawe long Mispa, Ol i painim aut olsem nogat man long Jabes Gileat i kam long bung. ⁹ Taim ol manmeri i kam sindaun long bung, orait ol lukim olsem nogat wanpela lain manmeri bilong Jabes Gileat i bin stap. ¹⁰ Ol i salim 12 tausen strongpela man i go na kilim olgeta manmeri long Jabes Gileat wantaim bainat na tu ol i kilim ol meri na ol pikinini wantaim. ¹¹ Mekim olsem, yupela i mas kilim olgeta man na olgeta meri husait ol i silip wantaim man pinis. ¹² OL sampela man i go na lukim olsem 400 yanpela meri bilong Jebes Gileat husat i no bin slip wantaim man na ol i kisim ol i kam long kem long Silo long Kenan. ¹³ Olgeta dispela lain i salim tok i go long tokim ol manmeri bilong Bensamin husait i stap long ston bilong Rimon olsem ol i laik pasim tok long kamapim bel isi. ¹⁴ Taim ol pikinini lain bilong Bensamin i kam bek, orait ol i givim ol meri bilong ol Jebes Gileat i go long ol, tasol i nogat planti meri i stap long inapim ol. ¹⁵ Ol manmeri i sori long wanem samting i bin kamap long ol pikinini lain bilong Bensamin, bilong wanem God Yawe em yet i rausim ol namel long ol lain Israel. ¹⁶ Nau olgeta hetman bilong dispela bung i tok, Olsem wanem na bai yumi painim ol meri bilong ol lain pikinini man bilong ol Bensamin husait i stap yet, long ol bai marit, bilong wanem ol i bin kilim i dai olgeta pikinini lain meri bilong ol Bensamin. ¹⁷ Ol i tok, Ol pikinini lain bilong Bensamin husait ol i stap yet, ol i mas i gat graun long kamapim olgeta samting bek olsem na ol i noken lus namel long ol Israel. ¹⁸ Mipela i no inap givim pikinini meri bilong mipela long ol long marit, ol manmeri bilong Israel i mekim tok promis pinis, bagarap bai kam long yu husait man i givim meri long ol lain pikinini man bilong Bensamin. ¹⁹ Olsem na ol i tok, Yupela i save pinis i gat taim bilong kaikai long tingim God Yawe long olgeta yia long Silo (em long hap not bilong Betel, long hap bilong san kamap long rot i go antap long Betel long Sekem na hap saut bilong Lebanon). ²⁰ Ol i tokim ol man bilong Bensamin, yupela i go na noken larim ol man i lukim yupela na hait long ol gaden wain na weit stap. ²¹ Taim yupela was i stap na ol meri bilong Silo i kam aut long danis, yupela mas kamaut hariap long gaden wain na yupela wanwan mas holim ol meri bilong Silo long maritim ol na go bek long graun bilong Bensamin. ²² Taim ol papa o ol brata bilong ol i kam tok strong long mipela, mipela bai tokim ol olsem, 'Soim mipela gutpela pasin na larim ol i stap, long wanem mipela i no kisim meri long taim bilong pait. Yupela i nogat asua, em i gutpela olsem yupela i no bin givim ol pikinini meri bilong yupela i go long ol." ²³ Ol pikinini lain manmeri bilong Bensamin i mekim olsem, ol bin kisim ol wanwan yanpela meri husait ol bin kam danis i stap long kamap meri bilong ol. Ol i go bek wantaim ol dispela meri long hap graun ol i stap long en. Ol i go wokim gen ol taun bilong ol na i stap long em. ²⁴ Na ol manmeri bilong Israel i lusim dispela ples ol i stap long en na i go bek long ples, long wanwan tumbuna lain bilong ol na long wanwan ples graun bilong ol yet. ²⁵ Long dispela taim ol Israel i no bin i gat king, tasol olgeta manmeri i save bihanim wanem em i stret long ai bilong ol.