¹ Wanpela taim, Samson i go long ples Gasa, em i lukim wanpela rot meri na em i go slip wantaim em. ² Ol lain Gasa i harim olsem, "Samson i kam stap pinis long ples." Ol lain Gasa i raunim dispela ples na stap hait long holim Samson. Ol i putim was na stap isi long bikpela dua bilong dispela biktaun na ol i tok olsem, "Mipela bai weit long em inap tulait i bruk na bai yumi holim em na kilim em." ³ Samson i stap wantaim dispela meri i go inap biknait tru. Long biknait em i kirap i go kamautim bikpela dua bilong biktaun na tupela pos bilong en wantaim ain. Em i putim long solda bilong em na kisim i go antap long het bilong mauten i stap klostu long Hebron. ⁴ Bihain long dispela taim i go pinis, Samson i stat long laikim wanpela meri i save stap long daun ples long Sorek. Nem bilong em Delaila. ⁵ Ol lida man bilong Pilistia i kam long dispela meri na ol i grisim em na tok, "Yu mas traim painim aut na save long wanem hap stret Samson i save kisim strong na mipela bai save long wanem wei bai mipela inap long daunim strong bilong en na taitim em long daunim em i go daun. Yu mas mekim dispela wok na mipela wan wan man bai givim yu 1,100 silva mani." ⁶ Na bihain Delaila i askim Samson, "Inap yu tokim mi long wanem samting i mekim yu i stap strongpela man tru na taim ol man i taitim yu long rop bai yu soim strong bilong yu olsem wanem?" ⁷ Samson i tokim Delaila, Sapos ol i taitim mi wantaim 7 pela nupela bunara rop ol i no draim long en, em bai mi lusim strong na stap olsem man nating. ⁸ Orait ol lida man bilong Pilistia i go long Delaila na givim em 7 pela nupela bunara rop ol i no draim long en na Dilaila i taitim Samson i go antap wantaim ol. ⁹ Orait Dilaila i tokim ol dispela man long hait insait long ples hait long rum bilong em. Dilaila i singaut na tok, "Samson! "Ol Pilistia i kam pinis long kilim yu, Samson i brukim ol dispela rop olsem paia i holim liklik rop. Em olsem na ol i no panim aut hait samting bilong en. ¹⁰ Orait Delaila i tokim Samson olsem, "Olsem wanem na yu bin giamanim mi long tok giaman bilong yu. Plis, yu mas tokim mi tru, long wanem rot ol man bai i daunim strong bilong yu." ¹¹ Samson i tokim em, Sapos yu pasim rop na taitim mi wantaim nupela rop ol man i no yusim yet, em bai mi lusim strong na stap olsem man nating. ¹² Orait Delaila i kisim ol nupela rop na taitim raunim Samson na i tok long em, Samson! Ol Pilistia i kam stap pinis long kilim yu. Ol birua i stap hait yet long rum bilong Delaila. Em olsem tasol, Samson i brukim ol dispela rop long han olsem liklik rop. ¹³ Delaila i tokim Samson, Yu bin giamanim mi i kam inap nau, tokim mi tru, long wanem rot ol man bai daunim strong bilong yu. Samson i tokim em olsem, Sapos yu pasim het gras bilong mi long 7pela hap na pasim strong wantaim pin, bai mi kamap wankain olsem ol narapela man. ¹⁴ Taim Samson i slip, Delaila i pasim het gras bilong Samson bihainim stret wanem Samson i tokim em. Na bihain Delaila i singaut na tok, Samson! Ol Pilistia i kam stap pinis long kilim yu, em i kirap long slip na rausim pin long het gras em i pasim long en. ¹⁵ Delaila i tokim Samson, Taim yu tok olsem, yu laikim mi, yu save giamanim mi, bilong wanem yu no tokim mi hait samting bilong yu. Yu giamanim mi tripela taim pinis na yu no tokim mi, long wanem hap yu save kisim dispela strong. ¹⁶ Olgeta taim Delaila i save tok hat na strong long Samson na Samson i save tingting planti olsem em i mas i dai. ¹⁷ Olsem na Samson i tokim Delaila hait tok bilong em. Samson i tokim em olsem, mi no save katim het gras bilong mi wanpela taim long resa long wanem, mi stap long bel bilong mama na God Yawe i promis long noken katim gras bai mi lusim strong na kamap olsem ol narapela man. ¹⁸ Taim Delaila i harim pinis tok hait Samson i tokim em, Delaila i salim tok i go long ol lida man bilong Pilistia na i tok olsem, Yupela mas kam antap gen, Samson i tokim mi olgeta hait tok bilong em pinis. Orait ol lida man bilong Pilistia i holim silva mani wantaim ol na i go antap long Dilaila. ¹⁹ Delaila i mekim Samson i ai slip na em i putim het bilong em long tais bilong em. Orait Dilaila i singautim wanpela long kam katim het gras long 7pela hap em i pasim. Samson i stat long bihainim tok bilong Dilaila, long wanem strong bilong Samson i lusim em pinis. ²⁰ Delaila i singaut strong long Samson, "Ol man long Pilistia i kam pinis! Samson i kirap long slip bilong em na em i tingting olsem, em bai ranawe, olsem em i save mekim, tasol em i no save olsem God Yawe i lusim em pinis. ²¹ Ol Pilistai i holim Samson na kamautim tupela ai bilong em na kisim em i go daun long ples Gasa na ol i pasim em wantaim sen i gat lok na em i tanim bikpela ston i raunim insait long haus kalabus. ²² Tasol het gras bilong em i stat long kamap gen bihain long ol i katim. ²³ Orait, Ol lida man bilong ol Pilistia, ol i kam bung wantaim na ol i mekim ofa i go long Dagon long amamas, em giaman god bilong ol na ol i tok olsem, em god bilong yumi tasol i kisim birua bilong yumi Samson na i givim long yumi. ²⁴ Taim ol manmeri i lukim Samson, ol i givim biknem long god bilong ol na tok, em god bilong yumi tasol i winim pait na givim dispela birua i kam long han bilong mipela, man husait i save bagarapim kantri bilong yumi na kilim planti bilong yumi pinis. ²⁵ Taim ol i amamas, ol i tok olsem, singautim Samson long kam na mekim yumi amamas. Ol i kisim Samson i kam aut long haus kalabus na putim em namel long tupela pos haus i sanap long en na em i mekim ol i lap long em. ²⁶ Samson i tokim yanpela boi husait i holim han bilong em, Inap yu helpim mi long mi ken holim han long tupela pos haus i sanap long en na bai mi putim baksait long en. ²⁷ Insait long dispela haus i pulap long ol man na ol meri. Olgeta lida bilong ol Pilistia tu i kam long haus. Namba bilong olgeta i stap insait long dispela haus i olsem 3,000 man na meri husait ol i lukim Samson taim em i amamasim ol. ²⁸ Samson i beten i go long God Yawe na i tok, "Bikpela God Yawe, yu tingim mi, yu God bilong mi, plis yu givim mi strong wanpela taim gen inap mi bekim bek long ol Pilistia wanpela taim tasol long tupela ai ol i bin kamautim." ²⁹ Samson i holim tupela pos haus i sanap long en na baksait em i bin putim long en, em i putim em yet i go pas long dispela tupela pos na han kais bilong em i holim narapela pos na long han sut em i holim narapela pos. ³⁰ Samson i tok olsem, mi bai dai wantaim olgeta Pilistia. Em i pusim strong dispela pos wantaim olgeta strong bilong em na haus i pundaun antap long olgeta manmeri i stap insait. Namba bilong ol dispela manmeri i dai wantaim em i winim namba bilong ol manmeri em i bin kilim taim em i stap laip yet. ³¹ Bihain ol brata bilong em na ol lain bilong papa bilong em i kam daun na kisim Samson i go bek na planim em namel long ples Sora na long ples Estaol long matmat bilong papa bilong em Manoa. Samson i save harim kot bilong ol Israel inap 20 pela yia.