¹ Bihain long dai bilong Josua, ol manmeri bilong Israel i askim God Yawe, ol i tok, "Husait bai i go pas long yumi na pait wantaim ol lain Kenan?" ² God Yawe i tok, "ol lain Juda bai i go pait. Lukim, mi givim ol pinis dispela graun long lukautim." ³ Ol man bilong Juda i tokim ol man bilong Simion, ol brata bilong ol, "kam wantaim mipela na go insait long dispela hap graun ol i givim long mipela, bai yumi bung wantaim na pait long ol Kenan. Mipela tu bai i go wantaim yupela long dispela graun ol i givim long yupela." Olsem na ol lain tumbuna bilong Simion i go wantaim ol. ⁴ Ol lain kenan na ol Peres i pait wantaim ol lain Judah na God Yawe i helpim ol na ol i winim pait. Ol i kilim 10 000 bilong ol long Besek. ⁵ Ol i painim Adoni- Besek long Besek na ol i pait wantaim em na ol i daunim ol Kenan na ol Peres. ⁶ Tasol Adoni-Besek i ranawe na ol i ronim em na holim em, ol i katim aut bikpela pinga bilong han bilong em wantaim bikpela pinga bilong lek bilong em. ⁷ Adoni- Besek i tok, "70 king husait ol i bin katim aut bikpela pinga bilong lek na long han wantaim bilong ol i bungim kaikai bilong ol aninit long tebol bilong mi. Olsem mi mekim wankain tasol God i mekim long mi." Ol i kisim em i go long Jerusalem na em i dai long hap. ⁸ Ol man bilong Juda i pait wantaim biktaun bilong Jerusalem na ol i kisim. Ol i kilim ol manmeri wantaim bainat na kukim dispela biktaun. ⁹ Bihain long dispela ol man bilong Juda i go daun long pait wantaim ol Kenan husait i save stap long maunten kantri long Negef na long ples i stap daunbilo long maunten long hap san i go daun. ¹⁰ Juda i go pait wantaim ol Kenan husait i save stap long Hebron ( nem bilong Hebron bipo ol i kolim Kiriat Aba ) na ol i winim Sesai, Aiman na Talmai. ¹¹ Long dispela hap ol man bilong Juda i go pait long ol lain bilong Debi ( nem bilong Debi bipo ol i bin kolim Kiriat Sefa ). ¹² Kalep i tok, "husait i go pait wantaim Kiriat Sefa na i kisim graun, bai mi givim Aksa pikinini meri bilong mi long kamap meri bilong em." ¹³ Otniel pikinini man bilong Kenas ( yangpela brata bilong Kalep ) i go na kisim graun Debi, olsem na Kalep i givim Aksa pikinini meri bilong em long kamap meri bilong em. ¹⁴ Hariap tasol Aksa i kam long Otniel na em i tokim em long askim papa bilong em long givim hap graun. Taim em i kam daun long donki, Kalep i askim em, "Yu laikim wanem?" ¹⁵ Aksa i tokim em, "Givim me wanpela gutpela samting. Olsem yu i bin givim mi graun bilong Negev, orait givim mi graun i gat wara. Olsem na Kalep i givim em graun i gat wara i stap antap na graun i gat wara long daunbilo. ¹⁶ Ol Kena husait i tumbuna lain bilong tambu bilong Moses i kam antap olsem long biktaun bilong Pam wantaim ol manmeri bilong Juda i go insait long ples nating bilong Juda, em i Negev long stap wantaim ol manmeri bilong Juda i stap klostu long Arat. ¹⁷ Ol man bilong Juda i go wantaim ol man bilong Simion ol brata bilong ol na pait long ol Kenan husait i save stap long Sefat na ol i bagarapim olgeta. Nem bilong dispela biktaun ol i kolim Homa. ¹⁸ Ol manmeri bilong Juda ol kisim Gasa tu na ol graun arere long en, Askelon na ol graun arere lo en wantaim Ekron na ol graun arere long en. ¹⁹ God Yawe i stap wantaim ol manmeri bilong Juda na ol i kisim ol ples long maunten kantri, tasol ol i no rausim ol lain i save stap long ol ples daun bilong wanem ol i gat ain karis. ²⁰ Hebron ol i givim long Kalep (olsem Moses i tok ). Na em i rausim tripela pikinini man bilong Anak long dispela hap. ²¹ Tasol ol manmeri bilong Benjamin i no rausim ol Jebu husait i bin stap long Jerusalem. Olsem na ol Jebu i stap wantaim ol manmeri bilong Benjamin long Jerusalem i kam inap long dispela dei. ²² Ol lain bilong Josep i redi long pait wantaim ol Betel na God Yawe i bin stap wantaim ol. ²³ Ol i salim ol man long luk stil long Betel ( dispela biktaun ol bin kolim Lus ). ²⁴ Ol man bilong luk stil i lukim wanpela man i kam autsait long biktaun na ol i tokim em, ''Inap yu soim mipela wanem rot long go insait long biktaun na mipela bai i mekim gut long yu." ²⁵ Em i soim ol wanpela rot i go insait long biktaun olsem na ol i kilim olgeta manmeri wantaim sap bainat, tasol ol i lusim dispela man wantaim ol famili bilong em i go. ²⁶ Na dispela man i go long graun bilong ol Hit na i mekim wanpela biktaun na i kolim Lus, dispela em nem bilong em i kam inap nau. ²⁷ Ol manmeri bilong Manase i no rausim ol manmeri i stap long biktaun bilong Bet San na ol haus lain, o ol haus lain bilong Tanak, o husait ol i save stap long haus lain bilong Do na ol lain husait ol i stap long haus lain bilong Iblem na haus lain bilong Megido, bilong wanem ol Kenan i strong moa na ol i stap long dispela graun. ²⁸ Taim ol Israel i kamap strong ol i mekim ol Kenan i kamap wokboi nating na hat wok tru, tasol ol i no rausim ol i go aut olgeta. ²⁹ Efraim i no rausim ol Kenan husait i save stap long Gesa, olsem na ol Kenan i stap yet long Gesa wantaim ol. ³⁰ Sebulun i no rausim ol manmeri husait i save stap long Kitron na ol manmeri i stap long Nahalol, olsem na ol Kenan i stap wantaim ol, tasol Sebulun i mekim ol Kenan i kamap wokboi nating na ol i wok hat tru. ³¹ Asa i no rausim ol manmeri i stap long Ako, o ol manmeri i stap long Sidon, ol manmeri i stap long Alap, Aksip, Helba, Afek na Rehop. ³² Olsem na ol lain bilong Asa i stap wantaim ol Kenan (husait i stap long dispela graun), bilong wanem ol i no rausim ol i go aut. ³³ Ol lain bilong Naptali i no rausim ol lain husait i save stap long Bet Semes na ol lain i stap long Bet Anat. Olsem na ol lain Naptali i stap wantaim ol lain Kenan ( ol manmeri i stap long dispela hap graun ). Tasol ol manmeri i save stap long Bet Semes na Bet Anat i kamap wokboi nating bilong Naptali. ³⁴ Ol lain bilong Amon i strong na rausim ol lain bilong Dan i go i stap antap long maunten kantri, ol i no larim ol i kam daun long stretpela ples. ³⁵ Olsem na ol Amo i stap long Maunten Heres, long Aisalon, long Salbim, tasol ol ami bilong lain bilong Josep i strong moa na i kisim dispela hap na ol i mekim ol i kamap wokboi nating na hat wok tru. ³⁶ Dispela mak bilong ol Amon i stat long maunten bilong Akrabim long Sela na i go antap long maunten kantri.