¹ Taim ol dispela samting i kamap long yupela, gutpela na nogut mi putim long ai bilong yupela, yupela i mas tingim gen ol dispela taim God Yawe God bilong yupela i rausim yupela namel long ol narapela manmeri. ² Taim yupela i kam bek long God Yawe God bilong yupela na harim tok bilong em na bihainim olgeta wanem tok mi tokim yupela nau, wantaim ol pikinini bilong yupela long bel na long tingting bilong yupela, ³ olsem bai God Yawe God bilong yupela bai marimari long yupela na kisim yupela bek gen long kalabus, God Yawe God bilong yupela bai kam bek na bungim yupela long ol manmeri em i bin rausim yupela i go stap long en. ⁴ Sapos sampela lain bilong yupela i lusim ples na i go stap longwe tru aninit long dispela skai, orait God Yawe God bilong yupela bai bungim yupela na kisim yupela i kam. ⁵ God Yawe God bilong yupela bai kisim yupela i go long graun bipo papa lain bilong yupela i bin kisim na bai yupela i kisim gen, em bai mekim yupela i stap gut na mekim yupela i kamap planti lain moa na winim namba bilong papa na tumbuna lain bilong yupela. ⁶ God Yawe God bilong yupela bai katim bel bilong yupela na bel bilong ol tumbuna pikinini bilong yupela tu, bai yupela i laikim tumas God Yawe God bilong yupela wantaim olgeta bel na tingting bilong yupela na bai yupela i stap laip. ⁷ God Yawe God bilong yupela bai putim ol dispela hevi i go antap long ol lain birua na long ol lain i save bel nogut long yupela na long ol lain i save bagarapim yupela. ⁸ Yupela bai kam bek na bai stap aninit long tok bilong God Yawe na bihainim olgeta lo bilong em we mi tokim yupela nau. ⁹ God Yawe God bilong yupela bai mekim yupela i kamap planti long wanem hatwok yupela bai kamapim long han, long ol pikinini yupela karim na long pikinini bilong bulmakau bilong yupela na prut bilong kaikai long graun tu, long mekim yupela kamap gut, taim yupela kamap orait God Yawe bai amamas long yupela gen, olsem em i bin amamas long ol papa bilong yupela. ¹⁰ Em bai mekim ol dispela samting sapos yupela bihainim tok bilong God Yawe God bilong yupela, sapos yupela lukautim lo na ol lo toktok we em i stap long buk bilong lo, sapos yupela kam long God Yawe God bilong yupela wantaim bel na tingting bilong yupela. ¹¹ Dispela lo mi tokim yupela nau i no hatpela long bai yupela i bihainim na tu em i no stap longwe long yupela long bungim. ¹² Em i no stap long heven na bai yu tok olsem, husait tru bai i go kisim na kam daun na tokim mipela long harim na mipela ken bihainim.' ¹³ Na tu em i no stap longwe long solwara na bai yupela kirap na i tok, husait bai i go kisim i kam na toksave na mipela bai harim na bihainim' ¹⁴ Tasol tok i stap klostu tru long yupela, insait long maus bilong yupela na long bel bilong yupela na bai yupela isi long mekim. ¹⁵ Lukim, nau mi putim laip na gutpela, dai na nogut . ¹⁶ Sapos yupela bihainim tok bilong God Yawe God bilong yupela, long wanem mi tokim yupela nau long laikim tru God Yawe God bilong yupela na long wokabaut long tok bilong em na bihainim ol lo bilong em, bai yupela stap laip na kamap planti tru na God Yawe God bilong yupela bai mekim gut long yupela long graun bai yupela i go kisim na bai stap. ¹⁷ Na sapos yupela i givim baksait na yupela i no harim na i go longwe na brukim skru long ol narapela god na lotu long ol, ¹⁸ long nau mi tokaut long yupela olsem yupela bai dai, yupela i no inap stap longpela taim long graun bai yupela i kisim long narapela sait bilong Jodan i go daun olsem. ¹⁹ Long ai bilong heven na long graun mi mekim dispela toktok na putim laip na dai, gutpela na nogut, olsem na yupela yet i mas tingim laip na bai yupela stap laip, yupela wantaim ol tumbuna pikinini lain bilong yupela. ²⁰ Yupela i ken bihainim dispela long soim olsem yupela i gat laik long God Yawe God bilong yupela, harim na bihainim tok bilong em na stap klostu long em. Bilong wanem em i laip bilong yupela long nau na i go olsem long taim bihain tu, bihanim na bai yupela i ken stap longpela taim long graun God Yawe i bin promis long ol tumbuna papa bilong yupela, Abraham, Aisik na Jekob."