¹ Moses na ol lida bilong ol Israel i tokim ol manmeri na tok, ''Lukautim gut olgeta dispela lo mipela tokim yupela nau. ² Long dispela dei taim yupela i brukim wara Jodan na i go long graun, God Yawe, God bilong yupela i givim. Yupela mas bungim ol bikpela ston na pasim long simen. ³ Yupela i mas raitim olgeta tok bilong dispela lo antap long ston taim yupela go kamap pinis, bai yupela i go insait long graun God Yawe, God bilong yupela i givim. Graun i pulap tru long milk na hani, olsem bipo God Yawe, God bilong ol tumbuna bilong yupela em i tok bai em i givim yupela. ⁴ Taim yupela i go kamap long Jodan, redim ol dispela ston olsem mi tokim yupela nau long Maunten Ebal na pasim wantaim simen. ⁵ Long dispela hap yupela wokim wanpela alta long God Yawe, God bilong yupela. Wanpela alta long ol ston, tasol yupela i no ken mekim wok long ain tul. ⁶ Yupela mas wokim alta bilong God Yawe, God bilong yupela long ol nupela ston. Yupela i mas mekim ol ofa bilong paia i kukim olgeta antap long en i go long God Yawe, God bilong yupela ⁷ na bai yupela i bung na kilim animol na mekim ofa na bai yupela i kaikai long hap na bai yupela i amamas long ai bilong God Yawe, God bilong yupela. ⁸ Yupela bai raitim olgeta tok bilong dispela lo antap long ol ston i klia tru.'' ⁹ Moses na ol pris, em ol livai, i tokim ol Israel na tok, "Yupela Israel, noken mekim nois na harim. Nau yupela i kamap lain manmeri bilong God Yawe, God bilong yupela. ¹⁰ Em i olsem na yupela i mas bihainim maus bilong God Yawe, God bilong yupela na bihainim ol lo na pasin bilong em olsem nau mi tokim yupela.'' ¹¹ Moses i givim strongpela tok long ol manmeri i mas mekim long dispela dei yet na tok, ¹² ''Dispela lain manmeri bilong Simion, Levi, Juda, Isakar, Josep na Benjamin i mas sanap long Maunten Gerisim long mekim gut long ol manmeri bilong Israel taim yupela i go brukim wara Jodan. ¹³ Dispela ol manmeri bilong lain Ruben, Gat, Aser, Sebulun, Dan na Naptali i mas sanap long maunten Ebal na mekim tok bilong bagarapim man. ¹⁴ Ol livai bai i bikmaus na bekim na tokim olgeta man bilong Israel olsem, ¹⁵ "Sapos wanpela man i katim diwai, ston na wokim piksa bilong man na i lotu long en long ples hait. God Yawe bai i belhat na bagarapim em. Orait olgeta manmeri i mas bekim tok na tok, "Tru tumas, God Yawe i ken bagarapim em." ¹⁶ Sapos wanpela man i bagarapim nem bilong papamama bilong em. Dispel man bai i bagarap.' Orait olgeta manmeri i mas tok, "Tru tumas, God Yawe i ken bagarapim em." ¹⁷ Sapos wanpela man i surukim mak long graun bilong wantok bilong em. Dispela man bai i bagarap. Orait olgeta manmeri i mas tok, "Tru tumas, God Yawe i ken bagarapim em." ¹⁸ Sapos wanpela man i paulim aipas na em i abrusim rot. Dispela man bai i bagarap. Orait olgeta manmeri i mas tok, "Tru tumas, God Yawe i ken bagarapim em." ¹⁹ Sapos wanpela man i strong na mekim rong long man bilong narapela hap na pikinini papa i dai pinis na meri man bilong en i dai pinis. Dispela man bai i bagarap. Orait olgeta manmeri i mas tok, "Tru tumas, God Yawe i ken bagarapim em." ²⁰ Sapos wanpela man i slip wantaim meri bilong papa bilong em. Dispela man bai i bagarap, long wanem em i mekim rong long papa bilong em. Orait olgeta manmeri i mas tok, "Tru tumas, God Yawe i ken bagarapim em." ²¹ Sapos wanpela man i mekim pasin pamuk wantaim ol animol na wel abus. Dispela man bai i bagarap. Orait olgeta manmeri i mas tok, 'Tru tumas, God Yawe i ken bagarapim em." ²² Sapos wanpela man i slip wantaim susa bilong em, pikinini meri bilong papa o mama bilong em. Dispela man bai bagarap. Orait olgeta manmeri i mas tok. "Tru tumas, God Yawe i ken bagarapim em." ²³ Sapos wanpela man i slip wantaim tambu mama bilong meri bilong em. Dispela man bai i bagarap. Orait olgeta manmeri i mas tok, "Tru tumas, God Yawe i ken bagarapim em." ²⁴ Sapos wanpela man i kilim wantok bilong em long pasin em i hait. Dispela man bai i bagarap. Orait olgeta manmeri i mas tok, "Tru tumas, God Yawe i ken bagarapim em." ²⁵ Sapos wanpela man i kisim gris mani na kilim wanpela man i nogat asua. Dispela man bai i bagarap. Orait olgeta manmeri i mas tok, "Tru tumas, God Yawe i ken bagarapim em." ²⁶ Sapos wanpela man i no tok orait long bihainim ol tok bilong dispela lo. Dispela man bai i bagarap. Orait olgeta manmeri i mas tok, "Tru tumas, God Yawe i ken bagarapim em."