¹ Long pinis bilong olgeta 7- pela yia, yupela i mas lusim tingting long olgeta dinau. ² Dispela em i pasin bilong kamap fri. Olgeta man mas lusim tingting long wanem samting ol wantok i bin kisim long em, ol i noken askim wantok o brata bilong ol long bekim bek, long wanem God Yawe i mekim stretpela pasin pinis long bekim ol dispela dinau. ³ Tasol long man bilong narapela hap yupela i mas askim na kisim dinau bilong yupela, tasol wanem samting bilong yupela i stap wantaim brata bilong yupela, yupela mas lusim. ⁴ Olsem, bai i nogat wanpela man i sot long wanpela samting namel long yupela, bilong wanem God Yawe i tok pinis long mekim gut long yupela na givim yupela nupela samting. ⁵ Sapos yupela inap harim gut tok bilong God Yawe na bihainim olgeta lo bilong em, nau mi givim long yupela. ⁶ God Yawe, God bilong yupela bai i mekim gut long yupela, olsem em i bin promis long yupela pinis, yupela bai i givim dinau long planti kantri tasol yupela bai i no inap kisim dinau long ol, yupela bai bosim planti kantri, tasol bai ol i no inap bosim yupela. ⁷ Sapos wanpela man i sot namel long yupela, em brata bilong yupela i stap klostu long yupela insait long graun God Yawe givim yupela, yupela i noken strongim bel o noken pasim han long helpim dispela brata, ⁸ tasol yupela mas amamas na opim han long helpim na redi long givim em wanem em i laikim tru. ⁹ Lukaut long holim kranki tingting long bel bilong yupela na tok, namba 7 yia, em yia bilong kamap fri em i klostu, olsem na yupela i noken givim baksait long brata i sot long samting na tu noken larim em i go nating, nogut em i singaut i go long God Yawe long dispela pasin yupela mekim na em bai i olsem yupela i gat asua. ¹⁰ Yupela mas amamas na givim em, yupela i noken sori taim yupela givim em, long wanem God Yawe bai i mekim gut long yupela long olgeta wok na wanem yupela i redi long givim. ¹¹ Ol turangu manmeri bai i stap yet long dispela graun, olsem na mi mekim strongpela tok long yupela, yupela mas amamas na redi long helpim brata husait i sot tru na helpim ol turangu man i stap long graun bilong yupela. ¹² Sapos brata bilong yupela, em i man Hibru o meri Hibru, ol i salim long yupela long mekim wok bilong yupela long 6- pela yia, orait long namba 7 yia yupela i mas larim em i go fri. ¹³ Taim yupela larim em i go fri, orait yupela noken larim em i go han nating. ¹⁴ Yupela mas sori tru na givim sampela sipsip long banis, ol samting bilong haus na sampela wain. Olsem God Yawe, God bilong yupela i bin mekim gut long yupela, yupela mas givim em. ¹⁵ Yupela mas tingim olsem yupela bin stap kalabus man long graun bilong ol Isip na God Yawe i bin kisim bek yupela, olsem na mi givim dispela strongpela tok nau long mekim olsem. ¹⁶ Sapos em i tok olsem long yupela, mi no inap lusim yupela ol lain na go, bilong wanem em i laikim yupela na haus bilong yupela, bilong wanem em i stap gut tru wantaim yupela, ¹⁷ orait yupela mas kisim em i go klostu long dua na kisim wanpela nil na sutim yau na mekim hul bilong makim olsem em bai i stap wokboi nating bilong yupela i go inap em i dai. Yupela mas mekim wankain long wokmeri nating tu. ¹⁸ Em i noken hat long yupela long larim em i go fri long yupela, bilong wanem em i bin wok long yupela 6- pela yia na mekim tupela taim win moni moa na givim yupela olsem wanpela wok man. God Yawe, God bilong yupela bai i mekim gut long yupela long olgeta samting yupela i mekim. ¹⁹ Olgeta namba wan man sipsip na bulmakau yupela i mas putim i go long sait bilong God Yawe, God bilong yupela. Yupela bai i no mekim wok wantaim namba wan sipsip o kilim namba wan sipsip. ²⁰ Yupela mas kaikai olgeta namba wan pikinini sipsip long ai bilong God Yawe, God bilong yupela long wan wan yia long ples God Yawe bai i makim bilong yupela na ol lain i stap wantaim yupela. ²¹ Sapos em i gat sua na makmak samting i bagarapim skin bilong en, olsem lek nogut o ai pas, o kain samting olsem yupela i no ken mekim ofa long God Yawe, God bilong yupela. ²² Yupela bai kaikai insait long banis bilong yupela yet, maski yupela stap klin o i no stap klin, yupela kaikai tasol olsem yupela save kaikai ol wel abus na dia. ²³ Yupela i noken kaikai blut bilong en, yupela i mas kapsaitim blut long graun olsem wara.