¹ Ol lain Moap i no laik aninit long ol lain Israil bihain long dai bilong Ehap. ² Orait na Ahasia i pundaun i go daun long varenda bilong haus bilong em long Samaria na i kisim bikpela bagarap. Olsem na em i salim ol wokman bilong em na i tok, "Go na askim Bal-Sebup, dispela god bilong ol lain Ekron olsem, bai mi kamap orait long dispela bagarap." ³ Tasol ensel bilong God Yawe i tokim Elaija dispela man long Tisbe olsem, " Kirap na go bungim ol wokman bilong king bilong Samaria na askim ol olsem, 'Ating i nogat God bilong ol Israil olsem na yupela i go long Bal- Sebup dispela god bilong ol lain Ekron? ⁴ Long dispela na God Yawe i tok, "Bai yu no inap kirap long bet bilong yu na kam daun long ples yu go antap, tasol tru tumas bai yu dai." Na Elaija i go. ⁵ Taim ol wokman i go bek long Ahasia, em i askim ol olsem, "Bilong wanem na yupela i kam bek?" ⁶ Na ol i tokim em olsem, "Wanpela man i bungim mipela na i tokim mipela olsem, 'Go bek long king husat i salim yupela na tokim em olsem, "God Yawe i tok olsem. 'Ating i nogat God long Israil olsem na yu salim ol wokman i go long Bal Sebup dispela god bilong ol lain Ekron? Long dispela as yu no inap kirap long bet yu go antap long en, nogat, bai yu dai." ⁷ Na Ahasia i askim ol wokman bilong en olsem, "Em wanem kain man i kam bungim yupela na i tokim yupela dispela tok?" ⁸ Na ol i bekim tok bilong em olsem, "Em i pasim longpela klos ol i wokim long gras bilong animol na i pasim let ol i wokim long skin bilong animol ." Olsem na king i tok, "Em Elaija man long Tisbait." ⁹ Orait king i salim wanpela kepten wantaim 50 soldia i go long Elaija. Kepten i go long Elaija long liklik maunten na i tokim em olsem, Na kepten i tok, "Yu wokman bilong God, king i tok yu kam daun." ¹⁰ Na Elaija i bekim tok bilong kepten olsem, "Sapos mi wokman bilong God orait larim paia i kam daun long heven na pinisim yu wantaim ol dispela 50 soldia." Orait paia i kam daun long heven na i kukim kepten wantaim olgeta 50 soldia. ¹¹ Na king Ahasia i salim gen narapela kepten wantaim 50 soldia i go long Elaija. Na dispela kepten i mekim wankain tok long Elaija olsem, "King i tok, yu wokman bilong God, yu kam daun hariap." ¹² Na Elaija i tokim ol olsem , "Sapos mi wokman bilong God orait larim paia i kam daun long heven na kukim yu wantaim olgeta 50 soldia." Na paia bilong God i kam daun gen long heven na i kukim kepten wantaim ol 50 man. ¹³ Tasol king i salim 50 man bilong pait namba tri taim gen. Na dispela kepten i go antap na brukim skru long pes bilong Elaija na i askim em olsem, "Yu wokman bilong God, mi askim yu long larim laip bilong mi wantaim 50 wokman bilong yu na lukim mipela olsem samting i dia tumas long ai bilong yu. ¹⁴ Tru tumas, paia i kam daun long heven na i kukim na pinisim tupela kepten wantaim ol dispela soldia. Tasol nau larim laip bilong mi i stap olsem samting i dia tumas long ai bilong yu." ¹⁵ Na ensel bilong God Yawe i tokim Elaija olsem, "Go daun wantaim em. Noken pret long em." Olsem na Elaija i kirap na i go daun long king wantaim dispela man. ¹⁶ Na bihain Elaija i tokim Ahasia olsem, "Em wanem God Yawe i tok, 'Ating i nogat God i stap long Israil long askim na painim aut olsem na yu salim ol wokman bilong yu long go lukim Bal-Sebup dispela god bilong ol lain Ekron? Olsem na nau yu no inap kirap na lusim bet bilong yu na kamap orait, tru tumas bai yu dai" ¹⁷ Olsem na king Ahasia i dai olsem God Yawe i tok long maus bilong Elaija. Na Joram i kisim ples bilong en long namba tu yia bilong Jehoram pikinini man bilong Jehosafat i stap king bilong Juda, long wanem Ahasia i nogat pikinini man. ¹⁸ Na ol narapela samting Ahasia i bin mekim, ol i no bin raitim long buk bilong ol king bilong Israel.