¹ Taim Solomon na ol wokman bilong em i pinisim olgeta wok long haus bilong God Yawe, Solomon i kisim ol silva, gol na olgeta samting papa bilong em Devit i bin makim pinis long en na i putim insait long bakstua long haus bilong God Yawe. ² Orait Solomon i bungim ol hetman bilong ol lain Israel na olgeta hetman bilong bikpela lain na hetman bilong wanwan famili bilong Israel long kisim bokis kontrak bilong God Yawe long biktaun bilong Devit long Saion i kam insait long Jerusalem. ³ Olgeta man bilong Israel i kam bung long bikpela kaikai long ai bilong king long namba 7 mun. ⁴ Olgeta hetman bilong Israel i kam na ol Livai i karim bokis kontrak. ⁵ Ol pris long lain bilong Livai i kisim bokis kontrak na haus sel bilong Bikpela wantaim olgeta samting i stap insait long haus sel. ⁶ King Solomon wantaim olgeta Israel i bung klostu long bokis kontrak na i kilim ol sipsip na ol bulmakau man bilong mekim ofa, namba bilong ol man i no inap kaunim. ⁷ Ol pris i karim bokis kontrak bilong God Yawe i go insait long rum tambu tru na putim long ples ol i redim bilong en aninit long wing bilong tupela ensel. ⁸ Wing bilong tupela ensel i op i stap na i karamapim bokis kontrak wantaim tupela stik bilong karim bokis. ⁹ Tupela stik bilong karim bokis kontrak i longpela tumas na man i sanap long rum tambu em inap long lukim na sapos man i sanap autsait em i no inap lukim arere bilong en. Tupela stik i stap olsem yet. ¹⁰ Insait long bokis kontrak tupela ston i gat tok bilong lo tasol i stap, em Moses i bin putim long taim ol Israel i bin lusim Isip na i kam long Horeb na God Yawe i mekim kontrak wantaim ol. ¹¹ Ol pris i bin kam autsait long ples holi. Na ol i kamap klin long ai bilong God Yawe long ol pasin birua bilong ol yet. ¹² Olgeta man bilong singim song long lain bilong Livai wantaim Asap, Heman, Jedutun na ol pikinini man bilong ol na ol brata bilong ol i pasim waitpela laplap na i paitim plet bras, gita na ol samting bilong mekim musik wantaim 120 pris i winim biugel i sanap klostu long alta long hap san kamap. ¹³ Ol man bilong winim biugel na ol man bilong singim song i bung wantaim na mekim musik. Ol i singim song na mekim musik wantaim na i kamap olsem wanpela nek tasol na ol i litimapim God Yawe. Ol i bin singim song olsem, ''Em i gutpela tru long yumi, oltaim oltaim em i save laikim yumi,'' Ol i singim song olsem na wantu tasol haus bilong God Yawe i pulap long smuk. ¹⁴ Ol pris i no inap moa long sanap na mekim wok bilong ol, Long wanem smuk i pulap na lait bilong God Yawe i lait moa insait long haus.