¹ Taim Rehoboam i kamap long Jerusalem, em i bungim ol insait long haus bilong ol Juda na Benjamin, em i makim 180,000 soldia man long pait wantaim ol Israel long kisim ol i kam bek long Rehoboam na em i ken bosim ol. ² Tasol tok bilong God Yawe i kam long Semaia man i save stap klostu tru long God na i tok, ³ "Tokim pikinini man bilong Solomon, Rehoboam king bilong Juda na olgeta manmeri bilong Israel long Juda na Benjamin, ⁴ 'God Yawe i tok olsem, "Yu noken karim pait i go o pait wantaim ol brata bilong yu. Olgeta i mas i go bek long haus bilong ol yet, long wanem mi yet i mekim ol dispela samting long kamap." Olsem na ol i harim tok bilong God Yawe na olgeta i go bek na ol i no pait wantaim Jeroboam. ⁵ Rehoboam i stap insait long Jerusalem na em i laik wokim ol biktaun long Juda long banisim em yet. ⁶ Em i mekim ol biktaun olsem Betlehem, Etam, Tekoa, ⁷ Bet Su, Soko, Adulam, ⁸ Gat, Maresa, Sip, ⁹ Adoraim, Lakis, Aseka, ¹⁰ Sora, Aijalon na Hebron. Dispela em ol strongpela banis i raunim biktaun insait long Juda na Benjamin. ¹¹ Em i strongim ol biktaun na putim ol ami ofisa long lukautim ol wantaim ol kaikai samting, ol oil bilong kuk na ol wain bilong dring. ¹² Em i mekim strong tru olgeta biktaun na em i putim ol hap plang na ol spia insait long ol. Olsem ol Juda na Benjamin i bilong em. ¹³ Ol pris na ol Livai husat i stap insait long ol ples bilong ol Israel na klostu long ol mak bilong ol i go long em. ¹⁴ Long wanem ol Livai i bin lusim ol graun bilong lukautim ol abus na ol haus samting bilong ol long kam long Juda na Jerusalem, long wanem Jeroboam wantaim ol pikinini man bilong em ol i bin rausim ol na ol i no bin mekim ol wok pris bilong God Yawe. ¹⁵ Jeroboam i makim bilong em yet ol pris long mekim wok pris long ol piksa bilong memek na pikinini bulmakau em ol giaman god em bin mekim. ¹⁶ Ol manmeri long olgeta lain long Israel husait i bilip long God Yawe, em God bilong ol Israel, ol i kam long Jerusalem long mekim ofa long God Yawe, God bilong ol tumbuna bilong ol. ¹⁷ Olsem na ol i strongim kantri bilong Juda na mekim Rehoboam pikinini man bilong Solomon i stap strong long tripela yia, ol i bihainim ol gutpela pasin bilong Devit na Solomon inap long tripela yia. ¹⁸ Rehoboam i maritim Mahalat, pikinini meri bilong Jerimot em pikinini man bilong Devit na Abihail pikinini meri bilong Eliap pikinini man bilong Jesi. ¹⁹ Meri bilong Rehoboam Mahalat i karim ol pikinini man, nem bilong ol em, Jeus, Semaria na Saham. ²⁰ Bihain long Malahat Rehoboam i maritim Maka pikinini meri bilong Apsalom, Maka i karim ol dispela pikinini, Abija, Atai, Sisa na Selomit. ²¹ Rehoboam i laikim tru Maka pikinini meri bilong Apsalom, laikim bilong em long Maka i winim tru laikim bilong ol arapela meri bilong em na ol namba tu lain meri bilong em, em i gat 18-pela meri na 60 namba tu lain meri na em i gat 28 pikinini man na 60 pikinini meri. ²² Rehoboam i makim Abija pikinini man bilong namba tu meri bilong em Maka long stap bosman bilong olgeta lain brata bilong em na papa bilong em, Rehoboam i gat tingting long makim em i kamap king. ²³ Rehoboam i lukautim gut tru ol graun bilong Juda na Benjamin, em i salim ol pikinini man bilong em long olgeta biktaun ol i banisim gut na stap strong. Em i givim ol planti kaikai tru na painim planti meri na givim ol.