¹ Devit toktok long bel bilong em, '' Wanpela dei bihain bai mi dai na pinis olgeta long han bilong Sol; em bai gutpela long mi long ranawe na go hait long graun bilong ol Filistia; Sol bai i no inap ting moa long painim mi insait long ol mak bilong ol graun bilong ol Israel; long dispela rot tasol Sol bai i no inap long kilim mi." ² Devit wantaim 600 man ol i kirap na lusim graun bilong ol Israel na igo long Akis pikinini man bilong Maok, Akis em king bilong Gat. ³ Devit i bin stap wantaim Akis long Gat, em wantaim ol 600 man , wanwan man wantaim meri pikinini bilong ol, Devit wantaim tupela meri bilong em, Ahinoam meri long Jesrel na Abigail meri long Kamel, bipo em meri bilong Nabal. ⁴ Ol i tokim Sol olsem Devit i ranawe na i go stap long Gat, olsem na em i no wok moa long painim em. ⁵ Devit i tok long Akis, " Sapos yu bel gut long mi, larim ol i givim mi wanpela hap graun insait long biktaun bilong yupela na mi ken i stap. Bilong wanem, mi wokman bilong yu bai mi i stap wantaim yu long biktaun bilong ol king?" ⁶ Olsem na long dispela dei Akis givim em Sikla; long dispela as Sikla i stap long han bilong ol king bilong Juda i kam inap nau, ⁷ Devit i bin stap long graun bilong ol Filistia inap long wanpela yia na 4-pela mun olgeta, ⁸ Devit wantaim ol lain man i stap wantaim em ol i kirapim pait wantaim ol kainkain ples, ol i go na bagarapim ol Gesurit, ol Gisit na ol Amalek, long wanem ol dispela manmeri i bin stap long ol dispela hap graun long bipo yet, Stat long graun bilong ol Sur i go olgeta long Isip. ⁹ Devit i karim pait i go na em i no save marimari long wanpela man o meri na larim em i stap laip, em kisim ol sisip, ol bulmakau man, ol donki, ol kamel na ol klos samting, em bai kam bek na go long Akis. ¹⁰ Akis bai i tok , '' Yu bin go pait wantaim wanem ol lain manmeri long dispela dei?" Devit bai bekim tok olsem, " Mi pait wantaim ol lain i stap long saut bilong Juda," o " wantaim ol lain i stap long saut bilong Jeramet," o " wantaim ol lain i stap long saut bilong Kenit." ¹¹ Devit i no larim wanpela man o meri i stap laip long kisim ol i kam bek long Gat, Devit i ting, " Nogut ol bai kam na tokaut olsem Davit i mekim olsem na olsem." Taim Devit i stap long graun bilong ol Filistia oltaim em i save mekim ol dispela kain pasin. ¹² Akis i bilipim tok bilong Devit na tok " Ating ol manmeri bilong Israel ol i no laikim em tru, olsem na em bai i stap wokman bilong mi oltaim."