¹ Na ol i tokim Devit olsem, "Lukim, ol Filistia i wok long pait wantaim ol Keila na i stilim ol gutpela samting." ² Na Devit i prea long God Yawe na i askim em olsem, "Inap mi go pait long ol dispela Filistia?" Na God Yawe i tokim Devit olsem, "Go na pait long ol lain Filistia na sevim ol lain Keila." ³ Ol lain man bilong Devit i tok olsem, "Lukim, mipela i pret taim mipela i stap long Juda, em bai olsem wanem sapos mipela i go long Keila na pait wantaim ol lain ami bilong lain Filistia?" ⁴ Orait na Devit i beten gen long God Yawe long helpim em. Na God Yawe i bekim tok bilong em olsem, "Kirap na go daun long Keila. Bai mi mekim yu i winim ol lain Filistia." ⁵ Devit wantaim ol lain man bilong en i go long Keila na pait wantaim ol Filistia. Em i kisim ol bulmakau bilong ol na em i kilim ol na mekim ol i lus. Olsem na Devit i sevim ol samting bilong ol lain Keila. ⁶ Taim Abiata pikinini man bilong Ahimelek i ranawe long Devit long Keila, em i holim wanpela longpela kolos ol pris i save werim na i kam daun. ⁷ Na taim Sol i harim olsem Devit i go pinis long Keila. Sol i tok, "Nau God i givim em i kam long han bilong mi. Long wanem em i go insait long biktaun i gat banis na dua bilong en." ⁸ Orait Sol i bungim ol ami bilong pait, long go daun long Keila na banisim Devit wantaim ol ami bilong em. ⁹ Na Devit i save olsem Sol i pasim tok long bagarapim em. Olsem na em i tokim Pris Abiata olsem, "Kisim longpela klos ol pris i save werim i kam." ¹⁰ Orait na Devit i tok olsem, "God Yawe, God bilong Israel, mi wokman bilong yu i harim pinis olsem Sol i laik bagarapim biktaun Keila long mi tasol. ¹¹ Olsem na bai ol manmeri bilong Keila i givim mi long han bilong em? Na Sol bai i kam daun olsem wokman bilong yu i harim? God Yawe, God bilong Israel, mi singaut long yu, plis tokim wokman bilong yu." Na God Yawe i tok, "Em bai kam daun." ¹² Orait na Devit i tok, "Olsem wanem, bai ol man long Keila i givim mi wantaim ol ami bilong mi long han bilong Sol?" Na God Yawe i bekim tok olsem, "Ol bai i givim yupela long han bilong ol." ¹³ Orait Devit wantaim ol 600 man bilong em i lusim Keila na ol i go long wanpela ples na long narapela ples. Taim ol i tokim Sol olsem Devit i ranawe long Keila, em i no bihainim em moa. ¹⁴ Na Devit i stap insait long gutpela ples hait long ples nating, long ol liklik maunten ples long ples nating bilong Sif. Olgeta dei Sol i painim em tasol God i no givim em i go long han bilong en. ¹⁵ Na Devit i stap long ples nating bilong Sif long Hores na Devit i lukim olsem, Sol i kam long kilim em. ¹⁶ Orait na Jonatan pikinini man bilong Sol i go long Devit long Hores na tokim em long putim olgeta tingting bilong em long God. ¹⁷ Na tu em i tokim em olsem, "Yu noken pret. Long wanem papa bilong mi Sol bai i no inap painim yu. Na bai yu stap king bilong ol Israel na bai mi stap aninit long yu. Papa bilong mi Sol tu i save long dispela." ¹⁸ Long ai bilong God Yawe ol i mekim tok promis. Devit i stap long Hores na Jonatan i go bek long ples. ¹⁹ Na bihain ol lain Sif i kam long Gibea long Sol na i tokim em olsem, "I tru Devit i hait long ol liklik maunten bilong Hakila klostu long mipela em long Hores, em long hap saut bilong Jesimon? ²⁰ King, yu kam daun nau! Bai mipela i bihainim laik bilong yu na givim Devit long han bilong king. Kam daun!" ²¹ Na Sol i tokim ol olsem, "Bai God Yawe i mekim gut long yupela, long wanem yupela i mekim gut long mi. ²² Orait go na painim na save gut. Long ples hait bilong em na husait i lukim em long dispela hap. Na ol man i tokim mi olsem, dispela man i pulap long gutpela tingting. ²³ Olsem na lukim olgeta ples em i save haitim em yet. Na kam bek long mi na toksave, orait na bai mi go wantaim yupela. Sapos em i stap long dispela graun, bai mi painim em na rausim em namel long ol planti lain Juda." ²⁴ Orait ol i lusim Sip na i go pas long Sol. Nau Devit wantaim ol lain man bilong em i stap long ples nating bilong Maon, em long Araba hap saut bilong Jesimon. ²⁵ Orait Sol na ol ami bilong em i go long painim em. Tasol Devit i save pinis, olsem na em i go hait long ol liklik ston maunten na i stap long ples nating bilong Maon. Na taim Sol i harim, em i ronim Devit long ples nating bilong Maon. ²⁶ Na Sol wantaim ol ami bilong em i go long narapela sait bilong maunten na Devit wantaim ol lain man bilong em i go long narapela sait. Na Devit i laik hariap na ranawe long Sol. Olsem Sol na ol lain ami bilong em i raunim Devit wantaim ol lain man bilong em long kisim ol, ²⁷ na wanpela wokman i kam givim toksave long Sol olsem, "Yu kam hariap, ol lain ami bilong ol Filistia i kam na bagarapim ples." ²⁸ Olsem na Sol i no moa ronim Devit na i go pait wantaim ol Filistia. Long dispela as tasol na ol i kolim dispela ples olsem Ston ples bilong Ranawe . ²⁹ Orait Devit i go antap na i stap long dispela ston ples long Engedi.