¹ Nau Devit i kam long Nob long lukim Aimelek em work man bilong God Yawe. Aimelek em kam long bung wantaim David na i seksek wantaim poret na i tokim em, "Bilong wanem yu wanpela kam na nogat man i bihainim yu?" ² Devit i tokim pris Aimelek, " King i salim mi long mekim wanpela bikpela wok na em i tokim mi olsem, 'noken larim wanpela man mas save long wanem wok bisnis mi salim yu, na wanem mi tokim yu long mekim. Mi salim ol yangpela man i go long wanpela ples. ³ Na nau wanem samting yu gat long han bilong yu? Givim mi 5-pela bret , o wanem ol samting i stap long en." ⁴ Pris i bekim tok bilong Devit na i tok, "Nogat bret nating i stap long han, tasol i gat bret em i holi, sapos ol yangpela man i stap longwe long ol meri." ⁵ Devit i bekim tok bilong pris, "Mi tok tru ol meri bin i stap longwe long mipela 3-pela dei, na mi bihainim dispela pasin taim mi kam aut. Na tu ol samting bilong ol man ol i bin putim long sait bilong ol kainkain bikpela wok ol i givim long mekim . Hamas moa long nau ol bai i gat long en bai putim long sait!" ⁶ Olsem na pris i bin givim bret em i bin stap long sait. Nogat ol narapela bret i stap long hap tasol bret i save i stap long ai bilong God Yawe ol i rausim, ol i mekim olsem long putim bret i hot long ples bilong en long dispela dei ol i kisim i go. ⁷ Long dispela dei wanpela wokman bilong king Sol i bin stap, na i save weit tasol long ai bilong God Yawe. Nem bilong em Doek em man Edomit, bosman husait i save bosim ol man bilong lukautim ol abus bilong king Sol. ⁸ Devit i tokim Aimelek, "Nau yet yu no gat spia o bainat i stap? Mi no kisim bainat bilong mi i kam na tu ol pait samting bilong mi, long wanem wok bisnis bilong king i hariap tumas." ⁹ Pris i tok, "I gat bainat bilong Goliat bilong Pilistia, husait yu bin kilim em long ples daun bilong Ela, i stap hia ol i pasim long laplap i stap bihain long klos bilong pris. Sapos yu laik kisim dispela, yu kisim, nogat narapela samting bilong pait i stap long hia." Devit i tok, "No gat narapela bainat i olsem dispela bainat, olsem na givim mi." ¹⁰ Long dispela dei Devit kirap na ranawe long Sol na i go long Akis, king bilong Gat. ¹¹ Wokman bilong Akis i tok long em, "Ating em i no dispela Devit, king bilong graun? Ol i no bin singsing i go kam long em na ol i mekim ol danis na tok, 'Sol i kilim ol tausen bilong em, na Devit kilim 10-tausen bilong em?" ¹² Devit i kisim dispela ol tok insait long bel bilong em na em i pret nogut tru long king Akis, king bilong Gat. ¹³ Nogut ol bai save long em na em i senisim pasin bilong em na mekim olsem em i longlong man long ples bilong ol, em i mekim ol mak long ol dua bilong geit na mekim maus wara bilong em kam daun long maus gras bilong em. ¹⁴ Na Akis i tokim wokman bilong em, "Lukim, yu save dispela man em i longlong. Bilong wanem na yu kisim em i kam long mi? ¹⁵ Yu ting mi sot long ol longlong man, olsem na yu kisim dispela man i kam long mekim olsem long ai bilong mi long lukim? Yu ting tru dispela man bai kam insait long haus bilong mi?"