¹ Ni ianaini anuraba taramo entai'ama ibo, "Bainti ko amireba iro taraue o taramo nabuma bira tabaika baibarabe." ² Te baka tibakauro taukae haru kumi mintiha bo haika bata minti bariaka te tara enta ni ianaini anuna'a, te anirante turo, te e'a aniaina, kiama ma bi bainti nahentika kaai a'i umina bibabe. ³ Te bi ubara ni tiba nimuna bira nanare Karaitibba ti'i hairo u'a uba tibaibo. Biba kiama ni uba nimiainarara paruibo. Iboma, Biba ni'ira kempu kai'abiro baibo. ⁴ Bira aikaro kia baimanta bira hiri tarabe, biba Kotira aikaro'a a'i bairabe. Tenabu bata Karaitira'i kia aikaro baibo, iboma tenabu a'i arakama Karaitira batake Kotira aikaro'a ni abutana bairabe. ⁵ Ne nenta rairake tabate ne mara'ura ututaba kempukai'a biroe baibo o kiae. Nenta mara'ura ututera aba'ake tabate. Ne tabate Karaitiba ni'i bairoe o kiae? Nenta bira'i hi'iribi barabe. ⁶ Te mara'ura uturo ne tabebarabe tenabu bi aba'ara atarama kauro. ⁷ Tenabu bate Kotirai mantiakema nunabu'i bauro ne kiama bo a'uhaika bata mintibarabe. Kia te mantiake nunabu turo tenabu bi aba'ara atara kauro tirabe. Boha'aroro baibo, te nunabu'uro, ne ekahika abu abu'akema barebarabe, kia tenabu bi aba'ara atarauro. ⁸ Bira nanare kiama tenabu u'a uba kuke'are nanahika kia ko'e inahikara mintirabe, iboma nanahika tenabu mintiaina u'a hika'ima mintirabe. ⁹ Mintira ne kempu kai'abi baibo tinabu aikaro kia bairera, tenabu uahauro. Tenabu eka enta Kotirai nunabu tibauro, ne kempu kai'ake mara'ura uti bainti nahentika bariatera. ¹⁰ Te ma bihaikara araruna te ni niarai'abi baiha ararua taunabe, bira nanare te ni hampata baiha, kiama te niara kempu kai'ake uba tirabe Nora kai'a bainti bauna kempukaba kiama kai'a baranarobe, te ni kaha'a nimitai kempu kai'abi himpi baiha kia ne hi'irua terabe. ¹¹ Ekanainibe ata bakauka, ne uahate! ni himpi kai kempu kai'abi bariaterabe, boka batake boha auha bate baiha, iha'ara auha batake bariate. Antu ari baiba bata iha'ara auha nimibai Kotiba ni'ira bariaire. ¹² Borara bata ko'eiha taku'ira mo'ara bora bata amiane. ¹³ Eka mara'ura utua bainti nahenti ma'i bariaka niara kuari'abe tiabo. ¹⁴ Nora Ihu Karaitiba niara a'urihi tanarobe, Kotira antu arirano ni batake bariaire, Aiho Bainti bano mintiakaira ne eka boha auha batake bariate.