¹ Jisasimi 12'a yogam watayu yarami yema ruwantu emo, afo bemi anona eran nampai yibinampa yimemi, yemi savi sava awamu siyikatemo, madem madam yi'gui manta asofa yikatemo. ² Afo bemi yiyikemi Kotini eraranti yogega bogo, madem, madam yi'i asofa yikago. ³ Afo bemi mani siremi yiyimemi yigemi mana yanta'i buwa marago yige'i biranteotei. Mone'o yukurewa unami buwa marago, yuna nampa, nesu unam wadonampa. ⁴ Afo yigemo mana maguga erave'o mana naupa ofegateote, afo mini naupa bage ega yerare ena magufa bogo. ⁵ Afo mana magufikena wata anasi mano bu yibigaotei, mini magu ifa dega bogo, afo ifadeose biranteotei yigakena yomi yera aruntega bogo, afo yemi minuremi intemi yemi sayekemi minifimi emono yemo minopimi. ⁶ Afo yemi yogam wata yui Jisasimi yema aremi magufipai ofegemo, Kotini waya yiyimemi ewam wata anasi manta asofa yikemo. ⁷ Herotimi, ananta rafisinti Galili magufimi wage'emi, bemi intemi masden yantao Jisasimo uwarami, afo bemi nesu intiri'i emi naye yara mana'a semi Joni mono nomo feyikewa yimi fubuga pikemi yerademi itavemi. ⁸ Afo mana'a mano semi Elaisami yerademi fawaremi, mana'ami semi feyapakena yogam wata yui yerademi fawaremo fubuga pikemi. ⁹ Afo Herotimi manisemi, semi Jonimi anugami akefa rukaupo, mini watami item wata wafi, semi inta naunami ma'de yanta'i uwarimi. Afo Herotimi bemi amonarati semi. ¹⁰ Yogam wata yui orade yeravemi, Jisasimi sasamemo masiden yanta ose uwaremi. Afo Jisasimi yogam wata yui yibigemi, yemi ayofaremi aupakemi mana magufimi bemo mini magu avi'i Betsaidai. ¹¹ Ugami nesu wata anasi mi intami Jisasimi Betsaidai, bimi afo yemi bemi awakuremo. Jisasi amoyemi bemi awakure wami, afo bemi wayami Kotini yogaranti yemi yiyimemi, bemi yi'ewam wata anasi asofa uyikemi. ¹² Enantano yeravimi 12'a yogam watayu yeravemi Jisasi waka sasamemi manisemo, "Mave wafaunafai wata buve mono minugafo wata anasi siyi kafanaya adeka magufaya bogo bavi nayom ma'i afakeveya yunami afakago". ¹³ Ugami Jisasimi yen yami mani serime yega nanao, " yunami yimego" Afo yogam wata yui semi, seyuyami 5'pia breti mageya, 2'a noya'ano makafauna masidem wata anasi amaka uyikanti yunami aya ureyana masidemi amakagi uyikafa. ¹⁴ Mini waya semi nayeyara wata anasi yui nampa mano 5000 adekai. Afo Jisasimi beyi yogam wata yui yiyimemi 50'a wata anasi mana mana ikufi da. ¹⁵ Afo yogam wata yui Jisasimi sinte'emo. ¹⁶ Jisasimi 5'ia breti nampa 2'a noyai mantemi Inarufa amonevemi augam mukemi, augam mukuremi mini breti nampa noya'i kidi kidi uremi yoga watayu yimemi, wata anasi yimego yanti. ¹⁷ Maside yu nami yimudami, afo ara'a yunami mante ruwanturami 12'a basigetimi itugemo. ¹⁸ Mana nurami Jisasimi augam muke vemi wami, afo yogam wata yui ben nampai wami. Bemi yintaemi semi wata anasimi senanti iyebe sebeye? ¹⁹ Afo yogam wata yui ami anona emi semi, emi mono mo feyikewa Joni mano mana'ami semi, emi Ilaija mo mana amano semi, emi feyapakena Koti adeka wam watami itavemino. ²⁰ Afo Jisasi yogam watayu yinta emi, "Semi, afo yigemi senanti iyeve sevege?" Pita anona emi semi, "Emi Kraisi mano Koti aga'i wana masidem nura bari bari ugayimi". ²¹ Jisasi ake waya yiyimemi enom wai mana waya mi bu yiyimego mini wayami. ²² Bemi yiiymemi, "Wata aga'ano mi umanti maratemi, anom watayu nampa yinom watayu nampa lo manoni inti watayu bemi bu ayi akemi manta fasada temo, bemi aritemo, ugamifo naemi kamore wa'yawam yakagami yerademi itavi temi". ²³ Jisasi mani siremi yiyimemi, "Mana wayimo semo siwakuri ranti, afo beyi ayiru'i danana kuminana, beyi maripo yami afunadena mana mana waya wami siwakurino. ²⁴ Nayeyare, mana wayimo be yaumo fakama akeiran temotemi, ben aumi afi'itemi, ugami mana wayimo be yaumo setibikao ratemi, wama kipatemi masidem nurami. ²⁵ Naye avogu yantaga fawaritene, mana wata manomo magaga yanta ose ruwantu ewanamo ben aumo afi itemi? ²⁶ Mana wata manomo setivi ganto agayemo, seti waya yanto agaye itemi, afo wata aga'ano mini wata yanti agaye itemi, bemo yera remo beyi eran nampa yitemi. Ofo'eni eran nampa, eran era ankero yu nampa. ²⁷ Ugami fuga ugami yiyimeu, yigepikemi mana'ami bumi fubuge'i Kotini ake gu'i amona nogomi. ²⁸ 8'tia wa'yawami yakagemi Jisasi mini waya siragakeni, Pita, Joni, Jemisimi yibigemi anufa augam muki ranti, uremi. ²⁹ Augam mukevemi wami, orasi ano ena emi, beni unam wado mano efari emi. ³⁰ Kam wata mano benampai aseven warami, mini Mosesi ya Ilaija. ³¹ Yeganti Kotini eran nampai fawa rentamo, yeganti Jisasi nampa aseventa wage entamo mana maga, yeraremi binoyanti, mini yantagui Jerusalemi fawa ritemi. ³² Pita nampa ka yogam wata rugenta wage'entamo, afo itaventami, Jisasini saga nampa ake nampa amonami kam wata benampa itagenta benampa warami. ³³ Kam wata ganti Jisasi arenta bira owami, Pitami Jisasimi sasamemi sisao avogu emino managa yefaunami, kamore ma'i uwarate yane, mana enintami mana Mosesimi manami Ilaija nintami, ugami Pitami bu intemi, naye waya simi. ³⁴ Pitami asewam mana kona mano yimugai yemi, yemi fegemo, konam mano fikarami. ³⁵ Afo mana awaunti konapike semi mani semi, minimi setiga ino, semi bemi uyadukau seti yogari ino yanti, ugafo yigemi beni wayawa intano. ³⁶ Mini awauntano sima kiparami yemi amonami Jisasi beya'o itare mi wage'emi yemi kepavemi bu yiyimemo naye yanta ose amonami. ³⁷ Ena waya wami, Jisasi nampa yogam watayu anumi yera remi kumemo, nesu wata anasimi yema amonemo. ³⁸ Mana wata ma wata anasi yiwana pakemi aravoka uremi, mani semi, "Sisao, setigai ofaono, sini sana mana iyaonti rukau namino. ³⁹ Savi awamu'o beka ose yikanami evemino, savi awamu ano bemi manta duntu evemi efa kantimi itugewa be awaunti. Mini savi awamu mano bemi manta savi sava e'emi benaumi, yera bu ara ranti ewa. ⁴⁰ Minugai eni yogam wata yui yintae'i mini savi awamui manta fasa akago sunam, yemi kana buyuga. ⁴¹ Jisasi waya anona emi semi, "Yigemi wata anasi yima kukumo bu rukayimi, yigenti intitano atedemo buwayi, nade yaga semi yigen nampa bego yigenti umanti maranu? Afo Jisasimi iya'ontanoni afoemi sasamemi, "Eyaga avige mana aga yeno. ⁴² Mini iya'ontano jisasi adeka yimi savi awamu ano mini aga'i rauma dufantami magagai manta runtu emi. Ugami Jisasimi eram wayami mini savi awamu nampa semi, mini agai soke ino, mini agai Jisasi yerademi ben afoemi amemi. ⁴³ Wata anasimi Kotini eranti amonemo, antu afo demo. Nesu intiri'i ewami Jisasimi era rera yogan marewa nanti, beyi yogam wata yui yiyimemi semi. ⁴⁴ Yigemi intama soke ogo watayu anomi. Wata mano agai namugo yiyapimi ratemono". ⁴⁵ Ugami yogam wata yui mini waya yanti ani'i bu emo nayeyare mini waya mano yikai ayofaremi bage'emi, ugami yemi fegemo Jisaimi inta irante mi waya manoni anta yanti. ⁴⁶ Mana'a nurami naemi yogam wata yui yeyiranti asuvemo, iyewa yepikemi ano watenafi. ⁴⁷ Ugami Jisasimi yenti intirui wafa inta ruka, afo mana sito agai avima beyage duka. ⁴⁸ Yogam wata yui yiyimemi semi, mana wayimo mana aga'o setivipimi avige motemi, semi sibigatemi. Iyemo semo sibigana niyimi bemi avigatem semose sisika ose yunsyimi, mana wata mano avio bu rukemo yigen yiwanapa wayimi bemi anantai vemi. ⁴⁹ Joni Jisasini waya intaremi anona emi semi, "Sisao, seyuya amona faunami mana wayimi en avipimi savi awamui sasaka manta fasa de'en uga seyuya a'ao sasaka fau nayeyara bemi senuya pikena buwa. ⁵⁰ Ugami Jisasi mani siremi sasamemi, "Yigemi sima bu faka akgo, wata manomo namugoyi bu uakayimi yigenti mana akumi bemino. ⁵¹ Kanami adeka ugam uga Kotimo avigemo Inarufa urinanimi, ugami beni intiti uyademi Jerusalemi bemi. ⁵² Bemi yiyikemi wayamo maremo anata binayomi mana magumi Samaria beni anene manta ategananimi. ⁵³ Ugami Samaria wayimi bu ayemo Jisasimi buyino yanti yenti magufai nayeyara yemi rayimami Jisasimi anona intiti ruka Jerusalemi biranti. ⁵⁴ Kam yogam wata, Jemisiya Joniya mini wayami intetami, yeganti sentami, anonao, emi arinayimi Kotimi inta ofanami igami Inarufakem dana kumena mana akumi igami yigano yare'a? ⁵⁵ Ugami Jisasimi wayevemi yimo wapa eram waya semi, yigemi mini'om wayami busego. ⁵⁶ Afo mini magu yera demi ena magufai bemo. ⁵⁷ Jisasi nampa beni yogam wata yui fami akafami bewmi, mana wayi Jisasi nanti semi mani semi, semi emi awakuronu maside ayapa bino nafai. ⁵⁸ Jisasi mani siremi sasamemi, iyanui ruka maose bave wami, nunu wai ma'i ruka, ugami wata aga'ano mana ayaypa bu ruka anomose rananimi ⁵⁹ Jisasimi ena wata manomi sasamemi semi, emi semi yema siwakurono'o semi sesifo'emi maroma masifare onuno. ⁶⁰ Ugami Jisasi sasamemi semi, "Eanam fugim wata mano fugim wata masifano. Ugafo emi bewa simara Kotini yoganti yiyimemo masiden ayapai. ⁶¹ Ena wata mano semi, semi emi awakuro nuno anonao, afo bonupo, sesi anasi iyaonti maro yiyikarego. ⁶² Jisasi beni waya anona emi semi, wata manomo siti aga ose fakarukemi maside nuramo anepa amona'egem rewayimi mini wata manomi Koti Yoganti bu maranani.