¹ Itaama vauduu mmata aavau gioonna kiaapuuya suvuairavai, Gioonnaiyaa kayau kiaatannaiyauva mmatooduu suvuairavai. ² Udaangaiva mmaapuuya vaidi mmatayaiya raunnaiyauvara avu nnammaridaa ngiauvakidiri reemirada iyauva nnaata vareeravai. ³ .Aaginiivo iya tunoo, ni mmannasaivo fai hama ngiiki varinaravaivee, tiravai. Mminna mminna masaiyau voono ngiiki suvuau kioo vaivaara hama vovoono aikiooma 120 nuanu mata aavau varinaravaivee, tiravai. ⁴ Vaidi yokovaiya vaa mmata aavau variravai. Iva nnaangiai Udaangaiva nnaakaraiya iya raunnaiyauva nnaata vareeravai.Varakiada iyayaadiri mmatoo nnaakaraiya hokobai yauvota iya yagueeqai yauvotama yaatareeravai. ⁵ Udaangaivo toodu iiqii vaidi iya mminna mminna maisai yauva yagueeqama kiada iiravai.Iya ausa tinniyauvo yaagueeqama kiada iiravai . ⁶ Itaama vauduu Aaginiva ausaivaki gioonna kiaapuuyara yaata utuoo boo tioo mmuakiaa mminnaiyauvaa iiravai. ⁷ Udaangaivo tunoo, neenoo mmataivaadiri ngii iima kiau gioonna kiaapuuyatama fayai mmararaa mmaguyaki varida ausaya nuairaiyaatama ngiamma ngiau nuairaiyaatama runganaraiyauvara na boo kiauno. ⁸ Nuvuaanna mmuaa vaidivaara Udaangaivo innara nnaasu mmuduuya ruaikioo inna avuvau safutuana vaidivai varivai. ⁹ Aa kua aayauvo Nuvuaanna suaivaki vairayauvai. Ii suai ivaki varuu gioonna kiaapuuya aakiai vaki Nuvuaava nnaasu Anutuuqa avunnigiataa varioo inna tasipama nuairavai. ¹⁰ Nuvuaava inna Seemo, Haamo, Yafeetainna koovavee. ¹¹ Anutuuqa avuuvau mmuakiaa mmatavau mminna mminna maisaivo rummua apukioo vairavai. ¹² Anutuuqo tooduu mmuakiaa mmatavau vau yoosinnaiyauvaki gioonna kiaapuuya ngiari nnaba iikiataira aataruuyauvaa uudu pinavai vairavai. ¹³ Anutuuqo Nuvuaanna tunoo, mmuakiaa mminna mmata aavau varira varada variaiya rummua raubirira suaivo nninoo, mminna mminna maisaiyauvo vaa mmata aava rummua apukioo vaino, fai na mmataivaatama rummua raubirinaravai. ¹⁴ Aiiyara yaata utuee siipaiva yaagueeqa yatari sipereesaivaadiri heeka kiee atauyauva aakiaivaki rummua kiee manu suuyai vaadiri geerinnai yauvaki raataruee aakiaa mmaanai yauvata raataru kiaanee. ¹⁵ Ataama ii kianee, siipaiva hokobaivaa 300 atauya vakiaivee, siipaiva pinaivo 50 atauya vakiaivee, siipaiva kieetaivo hayuoo atau 30 ivau vakiaivee. ¹⁶ Iima kiee mmemmaiva hokobavai rinoo rakanaivaudiri rinoo kieetaya kuaivee. Mmua sipuvai tammaivau yapaanee. Atauda taaravoomada hatokaanee. ¹⁷ Rikiaanee, neeno Udaanga Anutuuqono kiauno nnoorivo mmuakiaa mmata aavau rummua aputaikakioo mmuakiaa mminna varira vai mminnaiyauvatama gioonna kiaapuuyaatama ruputu taika kianaravai. ¹⁸ Na iita kua kiaa yeena raukiee kiauno, eetama aii nnaataivootama ai mmaapuu yaatama iya nnaataiyaatama nnaasuu siipaivaki kuaaravai. ¹⁹ Mmuakiaa vasingiammai yauva taara tiee nnaasu yapaanee, vaati vitee nnaata vitee yapaanee. ²⁰ Ngiaammaiyauva mmuavai mmuavai yapaanee. Pinaa vasingiaiya mmuavai mmuavai yapaanee. Mmata aavau nuai mminaiyauva taara tiee yapaane. ²¹ Hauyanai yauvaata yeenna nneerai yauvaata kayauma yapaane. ²² Nuvuaava mmuakiaa kua Udaangaivo tuuyauva vatoo itaama iiravai.