¹ . Ne Poruvama. Gotiva nrai sasa siraqa ni nroraqama saisana ne nroraqama vi varitana Sisasira kua nraase qora timwa niqi vi varuvama varina. Te Timotisa ² . qine Gotira nraase qora Korosiqi variasainima mwaa kuara qara numwa tenta. Qine Sisasiravaqa varitanta mwirara qai riaaqi vi variasara tinta, qine tiri qata vasaama varinta. Gotiva tiri qova qini suqema nitairaro qini mwuntusa qisaasa si variranta variate. ³ . Qine mwitaa siara mwirara rietantama te tenta nrora vainti Sisasira qora Gotirara aasara netanta suqeve timwaqi vunara. ⁴ . Qine Sisasirara kempusaqama se riaaqi vuavro qini mwuntusavanovaqa esaa Gotira nraase qorara vasira mwira te rienta napisi saunarave. ⁵ . Ntaaru quqaa mwasaasa Sisasira kua qini timwa niavanta qine mwi kuara riaavaro mwuntusaqintairo suqe sisanta titanta, Mwi kuara rienta sia raumpiri siraitinta, naantiara soma naavuni qaqi variqi vuanarave, tiara. Qine mwitaa timwa se naantiara qine naavuni uro suqema se varira, mwi enara vesa varitantara tinta, qine Sisasirara kempusaqama se riaaqi vitanta nrariara nrariara mwuntusa vaisanta variara. ⁶ . Ntaaru qine Sisasira kua suqe kua riaavaro qini vu aatovano napisisanta qine Gotiva qini suqema nitaanirara anoma se rienta, mwiaqaantai qine satarivano tamwa suqe sira riainema senta qine suqe saiqa varaqi vi variara. Mwo mwatanaa mwo mwatanaasa variavaro Sisasira kuavano viro nriro sisanta mwisavaqa mwi kuara rienta mwiaqaantai mwisa qini aananenta suqe saiqa qai varaqi vi variara. ⁷ . Vainti mwo Epaparaasiva Sisasira kua osara qini timwa nisanta qine suqema se mwi kuara riaara. Mwi vaintiva tiritana senava nkuaa saiqa mwia varaiva varitaro mwiva tiri saaisaqa sitaro nraase qora timwa ni varira. ⁸ . Gotira mwaraquravano qini saaisaqa sisanta qine nrariara nrariara mwuntusa vasisanta variqi vi varia kuara Epaparaasiva nrima tiri timwa mwisanta riaunara. ⁹ . Qiniara tiri timwa mwisanta mwi enaraqaantai sia mwo ena qiniara tauru saraitinta, mwo ena mwo ena rietanta Gotirara aasara namwaqi vi varunara. Gotiva qini naumaqara suqema sairanta qine Gotira saiqa osara so riaaqinta vitanta Gotira nrai mwira sasa sira qine napisi se takuetanta so vari nraase qorasa variate tinta, te Gotirara aasara ne varunara. ¹⁰ . Gotiva mwitaama sero qini saaisaqa siranta qine mwiaqaantai soma mwira saiqa qai suqema se varaqi vivara. Mwitaamaqi vitanta qine mwo saiqa mwo saiqa suqe saiqa vare varivaro Gotiva qiniara quasetaro varianaro. Mwitaamaqi vitanta qine satarivano tamwa suqera riainema senta suqe saiqa, mwo saiqa mwo saiqa varetanta Gotira osarara riaaqi vitanta uro saata qai mwoqavaqa rievara. ¹¹ . Gotiva anoma kempusavano varirara tinta, te mwirara aasara netanta qiniara mwisa kempusaqama nitaane tinta. Gotiva qini kempusaqama nitairaro qini sia qamwarama sero puposairanta kempusaqama se variqi vivaro qini mwuntusaqintai suqe si variranta variqi vivara. ¹² . Gotiva nuvaasaaniraqaa varitaro naqisi variani mwatusara Gotiva nrai nraase qorara rietaro mwi mwatusara mwisa saama tero. Mwiva qinivaqa soqama sairara tinta, qinevaqa naantiara soma Gotira nraase qora mwo sisa sampaqa mwi mwatusaraqi variqi vivara. Qine mwirara rietanta tiri qora Gotirara suqeve timwaqinta vuata. ¹³ . Ntaaru te varuraro ena si inraisava tiri numwaqu saisanta te ena siraqi varuraro Gotiva mwiaqaantairo tiri uvanu sero vitaqiro uro nrai mwaaqu mwirara mwuntusa ni vaintiva naqisi varinaini saira. ¹⁴ . Mwira mwaaquvano Gotiraini saiqa utu tairaqaantai te qaqinaini uvanu vinta varuraro Gotiva te maquqa si saiqara varauna kuara taiqa sero nrunka mwitaira. ¹⁵ . Te sia so takuaarava mwariqa Gotivavaqa, te so takuaarava Sisasivavaqa, mwitana nkuaa meraqama senta variara. Sisasiva Gotira mwaaqu vunaava varisaro esaa utu tai inraisava mwira mwemwainima vasiro. ¹⁶ . Gotiva Sisasira nroraqama saisaro mwiva naavuvaqa mwatavaqa esaa inraisa utu sero vataira. Vaintivano sia so takuaani inraisarave, so takuaani inraisarave, mwataini qoqa varitantave qumpau se varitanta naqisiasave, naavuni naqisiasave, mwiva mwisa mwisa utu sero vatero. Esaa inraisavano Sisasiraini qai vasiarive tiro, Gotiva Sisasira nroraqama saisaro mwiva esaa inraisa utu sero vataira. ¹⁷ . Vuni esaa inraisavano sia vasi enara Sisasiva qaqi variqiro vira. Mwaa enara Sisasiva qaqi varisarora tiro, esaa inraisavano nraiqarama sero so vasiqiro vi varira. ¹⁸ . Sisasiva vuni varitaro qiata voqiama sero varisanta te mwira nraase qoravano mwira naantiaraini mwira mwavana voqiama senta varunara. Mwiva vuni qaqi varitaro visantara tinta, te mwira nraase qoravano so qaqi variqi vi varunara. Sisasiva qai esaa inraisa aatara sero uro vuni variarive tiro, Gotiva mwira naane qutu viraqintairo qaqi vara ntivuma saira. ¹⁹ . Gotiva nraivaqa titaro, Sai ne Sisasiraqi variqi vitana esaa nena kempusavaqama se mwiraqi variqi virerave, tisaro Gotira kempusa osaravano esaa Sisasiraqi vasira. ²⁰ . Gotiva naavunive mwatainive vasi inraisara ne mwi inraisara sampaqa mwaateraqama varitana nkuaaqi varirerave timwa sero nrai mwaaqu titaisaro mwiva satariqaa nraare qarauru sero qutu visaro mwira nraarevano esaa mwatanaa vara mwaateraqama saisanta mwisa Gotiravaqa nkuaaqi variqi vi variara. ²¹ . Qine ntaaru Gotiraqaantai nriaarasanta varitanta qine maquqa si saiqara utiva qai qini naumaqara vasisanta qine maquqa si saiqara mwia qai utuqi vitanta qine mwira saara Gotira nravutaasa variara. ²² . Qine Gotira nraavutaasa variavaro Sisasiva vainti mwavana varero qiniara rietaro qutu vira. Mwitaa siraqaantairo Gotiva qinivaqa mwaateraqama varirara tinta, qine soma uro Gotira vuqaa varivaro mwiva qiniara ni nraase qora suqe siasave, maquqa si saiqava sia qiniqi vaisanta variasave, sia qiniqaa kua vaisanta variasave, tianaro. ²³ . Ntaaru Sisasira kua qini timwa niavanta qine mwi kuara rienta titanta, Te Sisasira nraaqiaraqama vinta variqi vinta naantiara suqema se naavuni uro varianarave, tiara. Qine sia mwi kuara qaqira senta mwo kua riaraitinta, Sisasira qua qai kempusaqama se riaaqi vitanta sia puposairanta variqi vivera qine soma titanta, Gotiva tirivaqa taaqau viro nkuaaqi variso, tivara. Ne Poruva Sisasira kua suqe kua nraase qora timwa nirera nroraqama vuvama varina. Te esaa mwaa mwataraqaa varia nraase qorasa mwi kuara timwa niqinta vi varunara. ²⁴ . Ne qiniara rietana ita vi inraisara varaqi vura ne so mwirara quasetana varuko. Sisasiva Gotira nraase qorara ni mwisa ni mwavana voqiama sentama variavo timwa sero mwisara rietaro ita vi inraisara varaqiro virave. Mwisara rietaro ita vuani inraisara varaqiro vuariva sini qaqi vaisanara tina, ne Sisasira nraase qorarara rietanta ne Sisasira saaisaqama seita vi inraisara nena mwavanaqaavaqa varaqi vuariro soma viro taiqaarive. ²⁵ . Qine Gotira nraase qoraqi saiqa varaarive tiro, Gotiva ni nroraiqama saisana ne Sisasira kua osaravaqa, tavaaravaqa, turuvaqa, esaa mwi kuara qini timwa ni varuko. ²⁶ . Vota ntaaru varia nraase qorasa sia mwi kuara riaavaro mwi kuava qumpauvi vasira. Mwaa enara Gotira nraase qoravano qai mwi kuara riaate tiro, mwi kuara qovarama saira. ²⁷ . Mwo mwatanaa mwo mwo mwatanaa mwira kempusa osara suqe osara takuaate tiro, Gotiva nrai qumpau tai kuara mwia osara mwataamama vasiro: Sisaisva qini mwuntusaqi variqiro vi variva variso. Mwiva qini mwuntusaqi variqiro vi varirara tinta, qine naantiara Gotiravaqa varitanta mwira voqiaama se kempusa nraase qora varivarave. ²⁸ . Gotiva qumpau tai kuava mwitaama vasirara tinta, te Sisasira kua mwo mwatanaa mwo mwatanaasa timwa niqi vi varunara. Mwisa mwaa kuarara nroraiqamase riaate tinta, te mwisa Gotira osara kua, mwo kua mwo kua timwa niqi vi varunara. Mwisa Sisasiravaqa nkuaaqi varitanta sia nraaqiara uapaa voqiama se variraitinta, mwisa nkuaiqa nkuaiqavano kempusa nraase qora varitanta Gotira vuqaa so uro variate tinta, te Sisasira kua mwisa timwa niqi vunara. ²⁹ . Nraase qoravano mwitaama variate tina, Sisasiva kempusa ni mira mwia qontai ne kempusaiqama se mwi saiqara vare varura.