¹ Pentikos enta anumanta, eka bika ruba'i baria batukara'a ruba'uabi baubaro, nora aubai bano nora ubai aubai bo'ara anumanta bika rabukubura, biba narubai hairo tubiro eka nabu'ira o'ubi bariara'ira mpi'a bura. ³ Bika baiha tabobaro inara inara ihau piri bo'aba eka bohau bohau bainti nahenti'ata bibaura. ⁴ Eka Aiho Bainti'ira pmi'abi bika bo'uba bo'uba tibaura. Aiho Bainti bano nai bi ubara nimura. ⁵ Bate Juda batanaka Jerusaremini bariaka bata, mono tibarika bata, eka bainti eka batanaka ani baiha. ⁶ Irubaro bi aubaiba autimanta, airu bainti nahenti ani ruba'uabi baiha airu abuato iriha birananare, bohau bohau bainti nai uba nai uba'ihai abu abu'ake tibaumanta. ⁷ Bika iri oraha rabukubi, bika tiha: "u'ai'akema turo, ma bika kiama Kiariri uba ihai'ai uba tiabo? ⁸ Nantimantae tenabu tentabu uba iruro, tinabu noba tinabu batakero tibatimi ubara birama abu abu'ake tibariabo? ⁹ Bika Patia bata, Midia bata, Elami bata, Mesapotemia bainti bata, Judia bata, Kapadosia bata, Pontusi bata, Esia bata. ¹⁰ Bira Firikia bata, Pamfilia bata, Isipi bata, Libia bika bata Sairini aumantohai bata Romu batana bainti nahenti bata. ¹¹ Juda batanaka bata hinikiaka bika mono tia okara abatebariaka bata, bika Kirit bata Arabia bata, tenabu irura kempuka kai'a kotiba mintira tintanabu uba ihaima abu abua'kema tibariabo. ¹² Bika rabukubi airu abuato iribaura; bika nai abutana uba tiba buruke birike iha tiha, "Ma bihaikara u'ai'ake nanahikae ibo ti?" ¹³ Mintumanta hinikiaka bika ruha nimiteha tiha, "Bika waini namai airu nekebe ti. ¹⁴ Mintibo Pitaba 11-kai'a bainti nabu, hampata himpiro naberai tibakero tiharo, " Ne Judia bainti bata eka bainti nahenti Jerusaremini bariaka, ne iriate; nanahikano obarinama te ni tibanimirabe! ¹⁵ Kia ma bika waini namai nabo ne bira tianteke, ma 9 kiroki to'a'ibe. ¹⁶ Ma bihaikara obarai'ira baka poropeti Joeliba tibataira'abe: ¹⁷ Kotiba tiharo ekara enta ani'e, te tenta kempuka Aiho bainti nahenti'a ahiama kabe tirabe. Ni orainti bainti bata nahenti bainti bata poropeti bo'arama uba tibarabe, ubara baintima taira bo'arinama tabe bairama konta baka'orama taira tabe baibarabe. ¹⁸ Bi entara te tenta kempuka Aiho ahia kaima ti kai'a bainti bata kai'a nahenti bata bika poropeti ubama tibarabe. ¹⁹ Te bohika bohika naruba'a umi'ehama bataini te mirikorima autirabe, narebata, ihabano bata, iroma nora tonabu bano mura bo'ama ianarorabe. ²⁰ Kuari bano tu'anta biro konkirai'a biro, tora bano tu'anta biro nare'a biro, bihaikaba minti bairo bira nantiarama Nora enta bano anianarobe. ²¹ Mintira eka bainti taukae Noraini akarantaika bika mara'urama barebarabe. ²² Ne Isireri bainti nahentibe, Ne ma ubara iriate: Ihuba Nasareti nihaina bainti bano ni hampata baira, Kotiba bira a'ira'a obarai'akero bira barakaibo tubirabe, bira kau'u'ira, Kotiba ni abutana kempuka kai'a bareharo mirikori auti bairabe, ne nentama tabatabo. ²³ Kotiba bi baintira ni kau'u'ira batairabe, biba iriro bihaikabama anianarobe tibataira'abe. Kumi bainti bira aruke taurinia katari'a hiritarabe. ²⁴ Iboma, Kotiba bira a'ima uri himpi kaibo, kiama biba bira a'ira kaibo utirahika'i aihahika bareharo baibo, birananare utirahika bano kiama bira uata narobe. ²⁵ Debitiba bira tibamiro tiharo, te u'ai'ake tabauro Nora bano ti aumantoma baibo, birananare biba ti kau'u tanarai baima kiama te eteha anirante buainabe. ²⁶ Mintiboma ti auha bano ho baiboma ti no bano Kotira ko'e autuara tiba o'ai'ibo. Boha bata, ti baata bano kempu kai'abiro baibo. ²⁷ Are kiama ti a'ira kai'e te utubuaka batuka'i bairabe, o kiama are taku'ina baintira kairo matimati'ira orai'a buanarobe. ²⁸ Are ti aiho barebaria arara umi'ane, are ti mintiakai'e te ai biri'a uahaina. ²⁹ Ata bakaukabe, te tentanabu na'ura Devitirara ni tibanimirebe: bira matimati bano tinabu batakero bari'i aniro ma bate enta anira. ³⁰ Iboma biba poropeti bano biba nai tabairabe Kotiba nai antu'i hairo bira nainti bano bira batuka barero Kinirai'a buaina baintira. ³¹ Biba bira tabero Karaitiba himpuainarara tirabe kiama biba matimati'ira bairo bira baata bano orai'ianarobe turabe. ³² Bi Ihura Kotiba himpi kai'e, tenabu ekama tabarabe. ³³ Mintiro biba a'i himpiro Kotira kau'u tanarai o'ubiro baiharoma Aiho Baintin nai Oraihairo barakeroma, nanahikae are irira tabaina rauru kanarobe. ³⁴ Devitiba kiama Naruba batuka orubibo, iboma biba tiharo, "Nora baubo ti Nora tibamiane, ti kau'u tanarai o'ubina. ³⁵ Te mintiakaima ai nabutaka ai ai'u'ima baibarabe. ³⁶ Mintirama, eka Isireri batanaka tabebarabe Kotiba Ihura bara Norai'a kero Karaitirabe tina, bi Ihura ne taurinia katari'a hiritababe." ³⁷ Bainti nahenti bira iriabaro, bika auha bano urihimpu manta Pitara bata hinikia kai'a baintika bata tibanimi tiha, atabakaukabe, tenabu nantie irabe ti?" ³⁸ Pitaba bika tiba nimiro tiharo, "Auha tu'antare namai barate, ne bohau bohau, Ihura autu'abe, nenta kumi okara a'irake, ne Aiho Bainti paresenti barate. ³⁹ Biba ni bata ni baintiti bata nimireba tibatairabe, niaraini baraika bata, hinikiaka taukae birara naberai tibake araika batabe." ⁴⁰ Airu uba batakero, aurira uba tibanimiro tiharo, "Taukae kia auha tu'antarakara rauruhama bariate tiro," ⁴¹ Mintumanta bika bira uba iri, bika namai barora, bi entara'i 3000 bainti nahenti namai barora. ⁴² Bika bira'a bariamanta kai'a bainti bika kempukai'a nimite nunabu tiba nimitora, bika nunabu'ake pareti kuura. ⁴³ Eka bainti nahenta oraha etora, bira nanare airu mirikori bata nora kai'a bata kai'a bainti kau'u ihairo obarubaumanta. ⁴⁴ Eka bainti nahenti taukae mara'ura utuaka ruba'uabi baiha bika ekahika iara tu'abuke, ⁴⁵ ekahika sarimi'ake abo'iaka nimura. ⁴⁶ Boha enta boha enta bika boha ruba'iha boha okarara mono nabu'iara irireka, bika nai nabu'ira pareti kuike, bika kara uahara batake tu'abuke, nai bara muntubike ko'e auha batake baura. ⁴⁷ Bika Kotira autu tuahereha ko'e auha hinikia bainti nahentika nimibaura. Nora bano bainti nahenti bitero anibaumanta boha enta boha enta auha tu'antare baura.