¹ Jisasi wen onanim mana wainta wen ano macdanimi aracpimpac okam poctikanin wainta wanimi onemoni. ² Wenic yokar intauc andaeno. Iyeno o, iyeci numoic uranaci mana wainta okami poctikenafino, mana wainta wenafuyafino, aca wen ano afouyaci numoic eyafo. ³ Jisasi yeweken tiyimemi. Mana wainta wenafuyac numoic enafi, aca wen ano afofuyafi, afo Koctinic eran ecanan wenkin afotafic inowani micnukemino. ⁴ Iyeci teni tisinkenafi, pa kakewanakaci yokani marano. Mana waintawac ayufunkim yokani iyen marantemino. ⁵ Te pa mana makakac weke, teni yenyic mana makakackena onic ukantecumpe. ⁶ Jisasi mini wayayuc tiremi, maka pakaremi akanofo yoyic uremi mini wainta okampemi demi . ⁷ Tamemi wewaci Siloamic nompim maro kacdano. Mini wainta yereremi maro non kacdaranimi wen okami antekemoni. ⁸ Wen acnakac wayon akandauc onacdeni macninteno. Manami kumanten inanana takenin waintafino? ⁹ Mayaic oyou teni weninon teyomi, enuni teni weseke wan waintainon tenoyo. Afo weni ukukaekemi macnin tiren temi, teni miyin wecumpe tiremi tiyimemoni. ¹⁰ Yeni macnin tire andaeno. Inkecnurananaci en okami anaenafino? ¹¹ Weni yemi macnin tiren tiyimem, Jisasi nen teyon waintan yoni pakaremi tukampemi demi temi maro Siloamiken teyon nompim maro kacdanon tici maro kacdareci make onecumpe . ¹² Yeni manintire tameno, Akac weni inkec wena? Weni temi,iyen indikeko. ¹³ Mini wainta yo awikeni man dafisiruc wayopaci wenoyo. ¹⁴ Sabati yamuci mini wainta okam macankemoni. ¹⁵ Yewekeni man dafisiruc andaeno, inkecnurenaci enokami macankenafino tireni andaeno. Weni yewekemi tiyimemi, weni yoni pakaremi tukampemi daci maro nonocdami antekemino. ¹⁶ Kamore man dafisiruc macnin tire teno, mana waintai Koctimpatewa yewenaino newarafi, weni Sabati iyen akecemino. Akac enuni teni, inkecnurenaci numoic ewananin wainta macnukenin andanda ampamintenafino? Mikimi yenyirani daimini ampamemoni. ¹⁷ Yewekeni mini okam potikanin waintakaci andaeno. En okam macankarayan wenaninakac tirec tefe. Profetinon tiremi tiyimemi. ¹⁸ Ju iniya wainta minikac iyen yindun mukeni wen ano afousaci yarereni yindaeno. ¹⁹ Mana en akac okam potikakenifno? Akac inkecnurenai make yonenafino? ²⁰ Wen ano afo yewekeni tiyimeno. Mana mayau tikaci okam potikakeninino? ²¹ Inkecnurenai make yonenafino, mayauni iyen indikecu, iyec okami macankenafi, mayauni iyen indikecu. ²² Newarafi yeni Juc yikani pekenoyo. Iyec weyan tenaci kraistin weko tintenafi, wemi donan mapaci acnintenone. ²³ Mini wani indeni andaoko weni amankaci tiyiminteminon tire teno. ²⁴ Mayauni indinkeumpe mini waintai numoic ewam wainta wemifo eni anom wikaci ameno. ²⁵ Yeweken tiyimemi temi, teni iyen indikecumpe weni numoic ewafino. Afo mana andanda indikekunai peni tukami potikemoni, afo make amankaci onantecu. ²⁶ Nec emi uwarankarenaci , akac inkecnurenaci okam macankenafi? ²⁷ Yewekemi tiyimemi, aci tiyimecumpo naec iye indekafono. Newarac ikeni enayacwac indiran tindaekafono? Ikeni wenic yokar intaic irani iyen indamino? ²⁸ Yeni wemi wacduankareni tameno, Eni wenic yokar inta wanamifo, mayauni Mosesinic yokar intauci weumpe. ²⁹ Mayauni indikekunai kocti weya Mosesi namac asewami. Afo mana wainta inkepatec yewenafi iyen indikecumpe. ³⁰ Weni yemi macnin tiremi tiyimemi.Mana enaic mukemino mana waintai inkepatec wenaci tukam temi tukami matinkenafino. ³¹ Mayauni indinkecumpe kocti numoic eyouyani iyen indemino. ³² Afo wenic ayir awakureyou yanana indemino. Mana maka uwaranamac iyen indecumpe mana wainta ukukaekem ena wainta okam macankenine. ³³ Afo mana wainta we Koctimpate iye wene, iye mana andandawac uwarantemino. ³⁴ Yeni yeweke tameno, eni numo andakinukam wakeonom wemi eni mayauni tisimanaminon tireni donam mapac acneno. ³⁵ Anom mam mackinkena awacman acnurayomi Jisasi wen afakaremi tamemi, eni wanta akakakaci anduni munkecwefe? ³⁶ Weni yeweken macnin tiren tamemi, iyec weni iyeno wakaci wenkac tinduni munkonuno? ³⁷ Jisasi wemi yewekemi tamemi aci onanamino mini miyin enamac asemino. ³⁸ Mini wainta temi, Iyeno o aci tinduni munkecumpen tiremi wenkaci mantiankemi. ³⁹ Jisasin temi, "Mana makakac yekunai wanta mandec yaindana iye oneyou onewayaci oneyouni yemi yukam potikano." ⁴⁰ Manaic oyom man dafisiruc wen namac wayou miniuc indireni wemi andaenoyo, "Mayau yacwakaci tukami potikenafino?" ⁴¹ Jisasi yeweken yemi tiyimemi, "En okam potikanawe, eni numo iyen dukactino, make eni temi, teni aci oneko tewe, enkimi pani numo wemino.