¹ Inaemi Jisasi Taberiasi nompac wenic disaiporouc wayonkaci enayac afotafic emoni. ² Saimon Pita namac Tomasi ena awici Didmusi namac Natanieli Galili awafac Kana makusinke namac Sepedin akac kanda namac Jisasinic disaiporo kanda namac wayomi, ³ Saimon Pita tiyimemi, teni kauya amarirani wecumpe, tenini yeni teni mayauyawac enamac yeakaranumpe tireni botikim kumande oreni mini ayufun iyen kauya arenoyo. ⁴ Kukaconimi wanurampac Jisasi non akofac ukukakanimi wenic disaiporouc enom weminon tire indenoyo. ⁵ Jisasi yindaemi, "Pumarauko, nanakonuc afackekafono?" tenini "Iyewaken," teno. ⁶ Afo Jisasi tiyimemi, "Yiyan kukampac neti acnurekaci kauya pakako," tenini acnurayomi amucno kauya akaconini neti dirifarani aniyokenoyo. ⁷ Jisasi ayic karac ewanin disaiporo Pitami tamemi, "Iyenom wemino," temoni. Inaemi Pita indiremi, wayapo wakemi ananuc uyacdemi, nompimi acdemoni. ⁸ Ena disaiporouc non awafac adekac wakeni, botikin indoceni, amucno kauya netikim wanini diripenoyo. ⁹ Apac undeni onayomi ikakac kauya namac breti namaci wemino. ¹¹ Jisasi tiyimemi, "Kauyauc pakekonuc kamore timeko." ¹⁰ Saimon Pita oremi netikimi iyena kauyauci 153 wanimi dirifaeken apaci demoni. Amucnoukami wemonifo, neti iyewaci dackakemoni. ¹² Jisasi tiyimemi, "Yunan yemandec nako." Iyenom wani wenic disaiporouc indinkeni wenani iyec wefonowac tire iyen indaenoyo. ¹⁴ Jisasi yeremi breti nare yimiremi kauyawac yimemoni. ¹³ Jisasi masickinke ukuckemi kamore yakicuremi afotafic onini wenic disaiporouc onenoyo. ¹⁵ Disaiporouc yunan namandami Jisasi Saimon Pitami tamemi, "Saimon Jonin akako, eni temi ayec wefono?" Pita tamemi, "Eyo, Iyeno. Enan tiyenimi Eni indem wanamino. Yunami tentic sipipiukaci yimeno. ¹⁶ Kandayakic muremi yeweken tamemi, "Pita Jonin akako, tenani ayec wenafino? Eyo Iyeno, eni indem wanamino enani tiyem wanamino tenimi, Jisasi tamemi, tentic sipisipiu kakaci dafiseno temoni. ¹⁷ Kamore yakic muremi Jisasi temi, "Saimon Jonin akako, tenani ayec wenafino?" Kamore yakic muremi micni tirami Pita umani maremi. Pita tamemi, "Enani tiyenimi eni umacden andandauc indinkanamino." Jisasi tamemi, "Yunanaci tentic sipisipiuc yimeno. ¹⁸ Pukan emi tameko, pumaram wemi enafoni wacdoni ufekemi, eni wirani indeonafaci wanaminfo, ayokun kaei ayan yanicurani enon emi wacdoni ufec ankaren awikemi iyewac wirani indeonafaci wintenono." ¹⁹ Pita inkem pukirikac enaci Koctin awic yanicintenafi, mini wani Jisasi temoni. Micni tiremi Pitanan temi, "Tenac tiwakurono." ²⁰ Pita yowaecemi onanimi Jisasin ayewanin disaiporo yiwakuremoni. Wenanan yunan newayomi Jisasinkac indaemi, "Iyeno, iyec emi mandeken namukouc yiyankin dantenafinon," temoni. ²¹ Pitan wen onaremi Jisasin temi, "Iyeno, mana waintai nec uwarantenafino?" ²² Jisasi tamemi, "Pa wanakaci owekec yeno tiranai eni inken indirikaci intefono? Afo eni tiwakurono." ²³ Mini wayani wen afac awanampac orani, mana disaiporo iyewaci pukinteminon tenoyo. Jisasi Pitami tamenimi, mini disaiporo iyewaci pukintenowa tenaoni, mini disaiporo pawanakaci owekec yeno tenai eni inken indirikaci intefonon temoni. ²⁴ Mini disaiporo weni mini andandaukani tiremi tandukaci, ikeunamac mini wayayuc indunami pukam wemino. ²⁵ Jisasi ena ena andandauc waci uwaremoni, umacdem wayayuc tandukakeoyomi, mini buku dam makuni iyewaci amankafic onictino.