¹ Okeke ukami wayani wemoni, wayani weni koctin wemi wenamaci mini wayani wemoni. ² Miyin weni kukarantapa koctinamac wemoni. ³ Masicden andanda wenkinkac mana ampamemoni, afo ma uwanteninuke, we iye wakenimi iyen uwantatino. ⁴ Wenkimi ayum pawan wani wemi mini wanana wantakimi kakani yimemoni. ⁵ Kakani ayufunkin oraimi ayufumi iyen kakani dacdemi. ⁶ Mana Wainta wen awici Joni wemi kocti tankanim yenim waintan wemoni. ⁷ Weni yenimi kakarandawan tiyimiyaci maside yindun munkoko wani yemoni. ⁸ Jonin yenimi weni mini kakara wena onino, pa mini kakaran tiyimirani yemoni. ⁹ Puka Kakani masicden iniya waintakim darani mana makakac yemoni. ¹⁰ Weni mana makakac wanimi wenkinkac mana masicden andandauc ampamemoni, Afo anasi wanta mini onaic iye menoyo. ¹¹ Weni weyic anasi wantakimi yemonifo yeni wemi iyen marenoyo. ¹² Iyeci wenkim andum munkintefe, enani temi tentikaci wanamino wici amintemino. ¹³ Mini-i uwokina ampamenaino, aca mana wuic ayiraino, aca wantaic ayiraino, iyeino, koctinic ayinino. ¹⁴ Wayani wantaic uemi mayausimi wemoni. Ikeunamac aci wenic erani onecumpe, mini erani wenafompatem manaren yeniwe. Wenkimana akun andandanamac puka anda namaci untikakemino. ¹⁵ Joni waduremi tiyimemoni, teni mana wainta wani tiyimec mokumpe. Iyec ten tinaem yenafi, weni temaci tirukemi wenana acnantapac wemoni. ¹⁶ Wenic anon erantoni awacwa anda yemana wemino. ¹⁷ Ake wayani Mosesimi amemoni. Awacwac namac puka waya namaci Jisasinkinke yemino. ¹⁸ Iyem mayawac koctimi onakemino. Weni weyan kocti wemi weyan Weyafon acnakac wami, wemi onaic mukeno. ¹⁹ Jonimpac orae andaoko wani Ju iniya wantauc namac mankin dafitayon pristiuc namac Livaitiuc namaci tiyinkayoni Jerusalemike yerereni wenoyo. Oraeni wemi andaenoyo. Eni iyec wefono? ²⁰ Weyani iyen ayofemi pacwamurem tiyimemoni, Teni Kraistiwa wekauno? ²¹ Yewekeni andaeno, ackac eni iyec wewa? Eni Ilaijac wewa? Weni temi miyiwa wekauno. Eni profeti wewa? Miyiwa wekauno. ²² Yeni yewekeni tameno, afo eni iyec wewa make mayau tisimikaci maro tisinkaci yekuna waintauc maro tiyimeno. Weni, temi, eni eyani nakac tirec tintefono? ²³ Weni temi, wanta anawac iyewapaten tararemi temi, Iyenonic ayaci antekano, mini wani profet Asaiyan Temoni. ²⁴ Manaic oyon man dafisiruc kinken tiyinkareni ²⁵ macnin tireni wemi andaenoyo. Afo eni Kraisti iye wei, Ilaija iye wei akac profetiwac iye wei eni newarec tireci man nom manyinkewawa? ²⁶ Joni yewekemi tiyimemi macnintiren temi. Teni emi nomponi marankecumpo. Afo make iken yicwanapaci ikeni iyen indikekom waintan ukuckakemino. ²⁷ Tentinaemi yenim wainta su nani iyen amanka utuankanteumpe. ²⁸ Jodanic nompac Joni man nom manyinkewanimi mini andandauc Betanici ampamemoni. ²⁹ Ena nuram anaempaci Jisasi yenimi Joni onademi manintemoni.Onako Koctin Akaci anasi wanta yic mumo nonoc yinkananino. ³⁰ Mini wani teni tewacumpe. Mayan tenaemi yeni-i weni temac yesankaremi wemi wenana peyukami wemonino. ³¹ Teni wemi iyen indikecumpo te man nom yimenunafoni Israilic iniya waintauc yukami diyinkanyeumpe. ³² Joni weyan temi manin tiren temi, teni onewami nunkewan Amami wenaroci kumandewaci oneko. ³³ Teni wemi onaic ecumpo, man nom manyinkanowani tisinkaci yekuno weni temi manin tiren tisimemi. Onewam wenaropa kumandinanin nune, miyi weyan Ayun Aunkimi man nom manyinkantemino. ³⁴ Make aci onaic mureci teko, manami Koctin Akacino. ³⁵ Ena nuran anaempaci Joni wenic yokar intakandanamaci ukukakemoni. ³⁶ Yeni onayomi Jisasi ye wayopaci yewanimi Joni manin tiren temoni, onako, meyami Koctin Akaci yemino! ³⁷ Wenic yokar intakanda indewayomi micnintenini yeni yerereni Jisasimi awakure wenoyo. ³⁸ Jisasi yo waecemi yonanini wen anaemi awakuro yewayomi weni macnintiren tiyimemoni. Emi newarac ayewayafono? Yeni yeweke tameno, Tisao, eni inkepakac wefono. ³⁹ Weni yemi macnin tiremi tiyimemi, yerec onako. Yeni yereni weni waninkimi onenoyo. Mini wayam wenamac wayomi maro teni kiroki memoni. ⁴⁰ Kantani Joninamaci we ase wayonkinke mayan yereremi Jisasimi awakuremi wemoni, wen awici Endrui weni Saimo Pita afacawam wemoni. ⁴¹ Okeke wen afacawan akaremi macnin tiren tamemi. Aci mayauni Kraistimi akecumpe. ⁴² Wemi yo awikeni maro Jisasi wapac dami Jisasi onacdemi manin tiren temi,Eni Saimoni Jonin akai wanamino,Afo en awic areni Kepasinen tintenone. ⁴³ Ena nuran acnaempaci Jisasi Galilic kumiraremi Pilipimi afakaremi macnin tiremi tamemoni, ten tiwakurono. ⁴⁴ Pilipi weni Betsaidakem wemi, Endruc, Pitan kanda yimac makusinkeno wemoni. ⁴⁵ Pilipi, Natanelin onacdemi tamemoni. Wenani Mosesinic ake wayasimi tikemino, profetiuc namac aci mayauni onecumpe. Jisasi Josepin akaci wemi weni Nasaretifateno wemoni. ⁴⁶ Nataneli macnin tiren yeweken tiyimemi, Manaic eni ayokuc andanda Nasaretifac ampamintena? Pilipi yeweken tamemi, yere onano. ⁴⁷ Jisasi onanimi Nataneli we wanipac yewanimi wenani macnin tiren temoni, Onako mana puka Israilin wenkim mana umac andawaiyewaino! ⁴⁸ Nataneli yewekem macnin tiren tamemoni, Inkecnure temi tonaic ukewa? Jisasi macnin tirem yeweken tamemi,Pilipi iye ararukaci teni emi fiki ya andafin kumantanaci onecumpe. ⁴⁹ Nataneli yeweken temi, Tisao, eni koctin Akaci wanamino! Enana Israiliucyic Kimi wanamino! ⁵⁰ Jisasi yeweken macnin tiren tamemi, Teni emi onekon tekunai newarafi,Teni emi onana fiki yayandafimi kumantanaci onecumpo,eni aduni munkecwewa? Manan oneona amankai ena ena iyena andandauc waci onanonamino. ⁵¹ Weni temi,pukaukami emi tameko,inarun ona di-inami onewami Koctinic ensorouc kundae undae eni wanta akac wapac urewayan onanonamino.